ប្រធានាធិបតីបារាំងចង្អុលមុខគណបក្សនយោបាយលីបង់ទាំងអស់ពីបទធ្វើឲ្យបរាជ័យនៅក្នុងការបង្កើតរដ្ឋាភិបាលថ្មី
នៅថ្ងៃអាទិត្យ ទី២៧ កញ្ញា ប្រធានាធិបតីបារាំងលោកអេម៉ានុយអែល ម៉ាក្រុងបានបញ្ចេញប្រតិកម្មលើវិបត្តិនយោបាយ និងសេដ្ឋកិច្ចនៅលីបង់។ ប្រតិកម្មរបស់លោកម៉ាក្រុងបានធ្វើឡើងនៅក្នុងសន្និសីទកាសែតមួយនៅវិមានប្រធានាធិបតីអេលីហ្សេ និងក្រោយពីនាយករដ្ឋមន្រ្តីលីបង់លោកមូស្តាហ្វា អាឌីបបានប្រកាសក្នុងថ្ងៃសៅរ៍ ទី២៦ កញ្ញាពីការឈប់ព្យាយាមបង្កើតរដ្ឋាភិបាលថ្មី។ នៅក្នុងសន្និសីទកាសែត លោកម៉ាក្រុងបានចាត់ទុកភាពបរាជ័យក្នុងការបង្កើតរដ្ឋាភិបាលថ្មីនៅលីបង់ពេលនេះជាការក្បត់រួម។ តែទន្ទឹមគ្នា លោកម៉ាក្រុងមិនញញើតស្តីបន្ទោស និងទម្លាក់កំហុសដាក់គណបក្សឈីអ៊ីតរបស់ពួកហេស្បូឡាទេ។ គួររម្លឹកថា ក្រោយព្រឹត្តិការណ៍ផ្ទុះនៅកំពង់ផែក្នុងទីក្រុងបេរូត ប្រទេសលីបង់នាថ្ងៃទី៤ សីហា ប្រធានាធិបតីបារាំងលោកម៉ាក្រុងបានធ្វើដំណើរទៅកាន់លីបង់ក្នុងថ្ងៃទី៦ សីហា និងបានត្រឡប់ទៅជាថ្មីកាលពីថ្ងៃទី១ កញ្ញា។ កម្មវត្ថុរបស់លោកម៉ាក្រុង គឺជួយដោះស្រាយវិបត្តិនយោបាយ និងសេដ្ឋកិច្ចលីបង់ដោយបានជំរុញឲ្យគណបក្សនយោបាយទាំងអស់ឲ្យរួមគ្នាបង្កើតរដ្ឋាភិបាលថ្មីមួយឯករាជ្យ និងមានសមត្ថភាព។ លោកម៉ាក្រុងបានទុកពេល ២សប្តាហ៍ ពោលត្រឹមថ្ងៃទី១៥ កញ្ញាដើម្បីឲ្យលោកនាយករដ្ឋមន្រ្តីមូស្តាហ្វា អាឌីបរៀបចំរដ្ឋាភិបាលថ្មី។ តែនៅទីបំផុតក្នុងថ្ងៃសៅរិ៍ ទី២៧ កញ្ញា លោកអាឌីបបានសម្រេចបោះបង់ចោលវិញដោយពន្យល់ថា លោកពិបាកនិយាយស្តាប់គ្នាបានជាមួយក្រុមគណបក្សឈីអ៊ីត ពិសេសពួកហេស្បូឡា។
ចុះផ្សាយនៅថ្ងៃ៖
ស្តាប់ - ០១:១៩
« ពួកគេបានសម្រេចចិត្តក្បត់នឹងកិច្ចសន្យាដែលពួកគេបានសន្យា។ ខ្ញុំបានកត់សម្គាល់ឃើញថា រដ្ឋអំណាច និងកម្លាំងនយោបាយលីបង់បានសម្រេចជ្រើសយកផ្លូវគិតប្រយោជន៍ផ្ទាល់ខ្លួន និងប្រយោជន៍គណបក្សខ្លួនឯងដោយធ្វើឲ្យអន្តរាយនូវប្រយោជន៍រួមទូទៅរបស់ប្រទេស។ អ្នកទទួលខុសត្រូវនយោបាយលីបង់ទាំងអស់បានធ្វើឲ្យបរាជ័យនូវការបង្កើតរដ្ឋាភិបាល បេសកកម្មមួយដើម្បីធ្វើកំណែទម្រង់ប្រទេសឲ្យបានល្អ។
គណបក្សនយោបាយលីបង់ជាអ្នកទទួលខុសត្រូវនៅក្នុងភាពបរាជ័យនេះ ហើយបរាជ័យនេះនឹងធ្ងន់ធ្ងរណាស់។ ពួកហេស្បូឡាមិនអាចជាកម្លាំងប្រដាប់អាវុធធ្វើសង្រ្គាមប្រឆាំងអ៊ីស្រាអែលផង ជាកងជីវពលប្រឆាំងជនស៊ីវិលនៅស៊ីរីផង និងជាគណបក្សនយោបាយគួរឲ្យគោរពនៅលីបង់ផងបានទេ។ ពួកហេស្បូឡាមិនត្រូវមានជំនឿថា ពួកគេខ្លាំងដូចដែលពួកគេបានគិតនោះឡើយ។
គឺពួកហេស្បូឡាខ្លួនឯងដែលត្រូវបង្ហាញថា ពួកគេគោរពប្រជាជនលីបង់គ្រប់រូបទាំងអស់។ តែនៅក្នុងរយៈពេលប៉ុន្មានថ្ងៃចុងក្រោយនេះ ពួកហេស្បូឡាបានបង្ហាញជំហរផ្ទុយស្រឡះពីនេះ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ