សហភាពអឺរ៉ុបបើកជំនួបកំពូលក្នុងបរិបទនៃការចរចាBrexit ជាប់គាំង
សហភាពអឺរ៉ុបត្រូវបើកជំនួបកំពូលរបស់ខ្លួន នៅថ្ងៃទី ១០-១១ធ្នូនេះ ដើម្បីរកដំណោះស្រាយឱ្យប្រធានបទជាច្រើន មានអាទិ៍ ផែនការផ្តល់សន្ទុះសេដ្ឋកិច្ចក្រោយវិបត្តិកូវីដ១៩ បញ្ហាអាកាសធាតុ ការប្រយុទ្ធប្រឆាំងនឹងភេរវនិយម និងអំពីការស្វែងរកលទ្ធភាពដាក់ទណ្ឌកម្មលើតួកគី។ល។និង។ល។ បន្ថែមពីសំណុំរឿងធំៗ និងដ៏ធ្ងន់ធ្ងរទាំងនេះ ជំនួបកំពូលអឺរ៉ុប ត្រូវប្រឈមដោះស្រាយវិបត្តិ Brexit មួយទៀត ដែល នៅបីសប្តាហ៍មុនអង់គ្លេសផ្តាច់ចេញពីអឺរ៉ុបជាផ្លូវការ ការចរចាត្រូវជាប់គាំងទាំងស្រុង។
ចុះផ្សាយនៅថ្ងៃ៖
ស្តាប់ - ០២:១០
វិបត្តិ Brexit នឹងក្លាយជាប្រធានបទនៃជំនួបកំពូលថ្ងៃនេះដែរ ប៉ុន្តែជោគវាសនានៃទំនាក់ទំនងអឺរ៉ុបជាមួយអង់គ្លេស ក្រោយBrexit នឹងត្រូវសម្រេចនៅថ្ងៃអាទិត្យទី១៣ធ្នូ។ អឺរ៉ុបនិងអង់គ្លេសបានឱ្យពេលគ្នាចំនួនបីថ្ងៃទៀត សម្រាប់ចរចាគ្នាក្រែងអាចរកកិច្ចព្រមព្រៀងលែងលះគ្នាបាន។ នេះជាសេចក្តីសម្រេចរបស់លោកនាយករដ្ឋមន្ត្រីអង់គ្លេស លោក បូរីស ចនសុន និងលោកស្រីប្រធានគណៈកម្មការអឺរ៉ុប អួរស៊ូឡា វ៉ុនឌែរ ឡេយែន ពេលជួបទទួលទានអាហាររួមគ្នានៅយប់មិញ។ មានន័យថាការចរចាត្រូវចាប់មានសន្ទុះថ្មី ជាមួយក្តីសង្ឃឹមថានឹងទម្លាយភាពទ័លច្រក ឱ្យបានមុនថ្ងៃទី ៣១ធ្នូ២០២០ ថ្ងៃដែលអង់គ្លេសត្រូវផ្តាច់ចេះពីសហភាពអឺរ៉ុបជាស្ថាពរ។
ចំណែកផែនការផ្តល់សន្ទុះសេដ្ឋកិច្ចក្រោយវិបត្តិកូវីដ១៩ ទំហំ៧៥០ពាន់លានអឺរ៉ូ និងផែនការថវិកាអឺរ៉ុប ២០២១-២០២៧ ដែលត្រូវជាប់គាំងដោយវេតូរបស់ហុងគ្រី និងប៉ូឡូញ ទំនងជានឹងរកឃើញច្រកចេញ។ រដ្ឋសមាជិកទាំង២៧ ត្រូវផ្តល់ការព្រមព្រៀងនៅក្នុងជំនួបកំពូលនេះ លើយន្តការចែកចាយមូលនិធិអឺរ៉ុបដោយរដ្ឋនីមួយៗអាចមានលទ្ធភាពប្តឹងទៅតុលាការយុត្តិធម៌អឺរ៉ុប ជាមុនសិនមុននឹងអាចចាប់អនុវត្តបាន។ តាមរយៈការព្រមព្រៀងនេះ ផែនការផ្តល់សន្ទុះត្រូវទម្លាយ ផែនការថវិកាអឺរ៉ុប ក៏អាចចេញជារូបរាង គ្រាន់តែត្រូវការប្រើពេលវេលាបន្ថែមជាច្រើនខែទៀតប៉ុណ្ណោះ។ តែប្រមុខដឹកនាំសហភាពអឺរ៉ុប នឹងត្រូវរកឃើញការព្រមព្រៀងគ្នាយ៉ាងឆាប់រហ័សលើភាពចាំបាច់នៃការសហការប្រយុទ្ធប្រឆាំងនឹងកូវីដ១៩ កុំឱ្យអឺរ៉ុបជួបរលកចម្លងរាតត្បាតជាលើកទីបី។
ទណ្ឌកម្មលើតួកគី ជាសំណុំរឿងដ៏រសើបមួយទៀតដែលសហភាពអឺរ៉ុបត្រូវសម្រេចក្នុងជំនួបកំពូលលើកនេះដែរ។ ថ្វីបើសមាជិកសហភាពអឹរ៉ុបទាំងអស់ បានបង្ហាញសាមគ្គីភាពជាធ្លុងមួយ មិនពេញចិត្តនឹងទង្វើរុករកឧស្ម័នក្នុងសមុទ្ទមេឌីទែរ៉ាណេ ត្រង់តំបន់ជាប់ជម្លោះជាមួយក្រិក និងស៊ីបមែន ប៉ុន្តែទំហំនៃដាក់ទណ្ឌកម្មទំនងជាពិបាកកំណត់ ព្រោះផលប្រយោជន៍មានខុសគ្នា។ អឺរ៉ុបទំនងបានត្រឹមបង្ហាញជំហរដាច់ខាតដាក់តួកគីប៉ុណ្ណោះ ។ ប្រទេសជាសមាជិកជាច្រើន មានអាទិ៍ អាល្លឺម៉ង់ អ៊ីតាលី និងប៉ូឡូញ បានបដិសេធរួចជាស្រេចទៅហើយថានឹងមិនយកទណ្ឌកម្មសេដ្ឋកិច្ច ឬបម្រាមណាមួយលើសមាជិកអង្គការអូតង់ដូចគ្នាទេ។
សហភាពអឺរ៉ុបមិនភ្លេចទេបញ្ហាអាកាសធាតុ។ រដ្ឋជាសមាជិកទាំងអស់ត្រូវបញ្ជាក់អំពីកម្មវត្ថុនៃការកាត់បន្ថយឧស្ម័នផ្ទះកញ្ចក់របស់ខ្លួនពីពេលនេះដល់ឆ្នាំ២០៣០។ គណៈកម្មការអឺរ៉ុប បានស្នើបង្កើនកម្មវត្ថុ កាត់បន្ថយឧស្ម័នពុល ដល់៥៥% នៅ២០៣០ បើប្រៀបទៅនឹងឆ្នាំ១៩៩០ ទល់នឹងកម្មវត្ថុមុនដែលកំណត់ត្រឹម៤០%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ