អង្គការពាណិជ្ជកម្មពិភពលោកកំពុងពិចារណាអំពីកម្មសិទ្ធិបញ្ញាថ្នាំវ៉ាក់សាំងប្រឆាំងកូវីដ១៩
ថ្នាំវ៉ាក់សាំងប្រឆាំងនឹងជំងឺកូវីដ១៩ គួរតែជាករណីលើកលែង “គ្មានរនាំងកម្មសិទ្ធិបញ្ញា” នេះជាសំណើដែលអង្គការពាណិជ្ជកម្មពិភពលោក បាននិងកំពុងជជែកពិភាក្សាគ្នានៅថ្ងៃព្រហស្បតិ៍ទី ១០ធ្នូនេះ។ បើគ្មានកម្មសិទ្ធិបញ្ញា នោះគេនឹងអាចចែកចាយចំណេះដឹងស្តីពីថ្នាំបង្ការកូវីដ១៩ បានយ៉ាងទូលំទូលាយ និងអាចបង្កើនចំនួនមណ្ឌលផលិតថ្នាំវ៉ាក់សាំង ជាប្រយោជន៍បន្ទាន់ក្នុងពេលកំពុងមានការរាតត្បាតផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
បើតាមអង្គការក្រៅរដ្ឋាភិបាល គ្រូពេទ្យគ្មានព្រំដែន គឺឥណ្ឌា និងអាហ្វ្រិកខាងត្បូង គាំទ្រដោយប្រទេសប្រមាណជាមួយរយផ្សេងទៀត ជាអ្នកដាក់សំណើសុំ ជាករណីលើកលែង មិនឱ្យថ្នាំវ៉ាក់សាំងប្រឆាំងនឹងកូវីដ១៩ មានកម្មសិទ្ធបញ្ញា។ សំណើនេះ បានទទួលការគាំទ្រ ជានិម្មិត្តរូបបំផុតពីសំណាក់អគ្គនាយកអង្គការសុខភាពពិភពលោក លោកតេដ្រូស អាដាណុម ហ្គេប្រេយេស៊ូស Tedros Adhanom Ghebreyesus ដែលបានគូសបញ្ជាក់ថា បើអង្គការពាណិជ្ជកម្មពិភពលោកយល់ព្រមមិនឱ្យមានកម្មសិទ្ធិបញ្ញាថ្នាំវ៉ាក់សាំងកូវីដ១៩ នោះអ្នកដែលត្រូវការនឹងអាចប្រើថ្នាំវ៉ាក់សាំង ការព្យាបាល ការធ្វើតេស្តប្រឆាំងនឹងកូវីដ១៩ ក្នុងតម្លៃសមរម្យ។
ម្យ៉ាងវិញបើគ្មានកម្មសិទ្ធិបញ្ញា គេនឹងអាចបង្កើនការផលិតថ្នាំបង្ការ នៅតាមបណ្តាប្រទេសកំពុងអភិវឌ្ឍន៍ជាច្រើនផ្សេងទៀតដែលមានសមត្ថភាព ដូចយ៉ាង ថៃ ប្រេស៊ីល ឬ បង់ក្លាដែស។ តាមសំណើ ថ្នាំបង្ការកូវីដគួរតែគ្មានរនាំងកម្មសិទ្ធិបញ្ញារហូតទាល់តែយុទ្ធនាការចាក់ថ្នាំវ៉ាក់សាំងនេះបានដំណើរការយ៉ាងទូលំទូលាយកំរិតពិភពលោក ហើយប្រជាពលរដ្ឋលើភពផែនដី ជាងពាក់កណ្តាលមានប្រព័ន្ធអង់ទីក័រការពារខ្លួន។
ប៉ុន្តែសំណើនេះមិនទទួលបានការគាំទ្រពីសំណាក់ក្រុមប្រទេសអភិវឌ្ឍន៍មានមន្ទីរឱសថធំៗទេ។ ក្នុងកិច្ចពិភាក្សាក្រៅផ្លូវការនាសប្តាហ៍នេះ ជប៉ុន សហរដ្ឋអាមេរិក សហភាពអឺរ៉ុប បានច្រានចោលសំណើនេះ ដោយយល់ថាក្រុមហ៊ុនឱសថបានចំណាយថវិកាច្រើនណាស់ក្នុងស្រាវជ្រាវរកថ្នាំវ៉ាក់សាំងនេះ ហើយវិធានច្បាប់បច្ចុប្បន្នស្តីពីកម្មសិទ្ធិបញ្ញា តម្រូវឱ្យមានការសុំអាជ្ញាបណ្ណ “ជាដាច់ខាត” មានលក្ខណៈពិសេសទៅតាមស្ថានភាពបន្ទាន់ ដូចក្នុងករណី មានរោគរាតត្បាតនាពេលនេះរួចទៅហើយ។
សម្រាប់ក្រុមអ្នកប្រឆាំង កម្មសិទ្ធិបញ្ញា ជាការលើកទឹកចិត្តឱ្យមានគំរូពាណិជ្ជកម្មទំនើបថ្មី។ បើគ្មានប្រព័ន្ធកម្មសិទ្ធិបញ្ញាទេ នោះក៏នឹងគ្មានលទ្ធភាពអភិវឌ្ឍថ្នាំព្យាបាលនិងថ្នាំវ៉ាក់សាំងបានលឿនដែរ។ នាយកវិទ្យាសាស្ត្រនៃក្រុមហ៊ុនឱសថ Johnson & Johnson លោក Paul Stoffels ដែលចូលរួមក្នុងកិច្ចពិភាក្សាបឋមនេះដែរ បានបំភ្លឺយ៉ាងខ្លីថា ក្រុមហ៊ុនកំពុងផ្ចង់លើការងារស្រាវជ្រាវស្តីអំពីស្ថិរភាពនៃបច្ចេកវិទ្យាផលិតថ្នាំវ៉ាក់សាំង ដើម្បីធានាថានឹងអាចផ្គត់ផ្គង់ជូនពិភពលោកនៅឆ្នាំក្រោយ បន្ទាប់មកទើបចាប់ផ្តើមគិតអំពីការផ្ទេរបច្ចេកវិទ្យានិងសមត្ថភាពទៅឱ្យអ្នកដទៃតាមក្រោយ។
សេចក្តីសម្រេចនឹងត្រូវជាបន្ទុករបស់ក្រុមប្រឹក្សាអង្គការពាណិជ្ជកម្មពិភពលោក ដែលនឹងបើកប្រជុំនៅថ្ងៃទី ១៦-១៧ធ្នូសប្តាហ៍ក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ