ស្វីសអនុញ្ញាតឱ្យប្រើថ្នាំបង្ការរបស់ Pfizer/BioNTech អ៊ីតាលីបិទខ្ទប់ប្រទេសជាថ្មី
នៅថ្ងៃសៅរ៍ទី ១៩ធ្នូនេះ ស្វីសបានក្លាយជាប្រទេសទីមួយ ប្រចាំដែនដីអឺរ៉ុប ដែលបានផ្តល់ការអនុញ្ញាតឱ្យប្រើប្រាស់ថ្នាំបង្ការប្រឆាំងនឹងកូវីដ១៩ របស់ក្រុមហ៊ុន Pfizer/BioNTech។ ចំណែកអ៊ុតាលីដែលធ្លាប់រងគ្រោះយ៉ាងធ្ងន់ធ្ងរជាងគេ និងមុនគេបំផុតនោះ បានសម្រេចបិទខ្ទប់ប្រទេសជាថ្មី ក្នុងអំឡុងពេលបុណ្យណូអែលនិងបុណ្យឆ្លងឆ្នាំ ក្រែងអាចបញ្ចៀសរលកចម្លងថ្មីបាន។
ចុះផ្សាយនៅថ្ងៃ៖
ស្តាប់ - ០២:០៣
ក្រោយពីបានធ្វើការត្រួតពិនិត្យនិងវិភាគយ៉ាងល្អិតល្អន់ អាជ្ញាធរសុខាភិបាលស្វីសបានផ្តល់សេចក្តីសន្និដ្ឋានថា ថ្នាំវ៉ាក់សាំងប្រឆាំងកូវីដ១៩របស់ក្រុមហ៊ុន Pfizer/BioNTech ជាថ្នាំដែលមានប្រសិទ្ធភាពជាក់ច្បាស់ ផ្តល់ប្រយោជន៍ច្រើនខ្លាំងជាងបង្កផលរំខាន។ នេះតាមសេចក្តីថ្លែងការណ៍របស់អាជ្ញាធរស្វីស ក្នុងថ្ងៃសៅរ៍ទី ១៩ ធ្នូ ២០២០ ដោយបញ្ជាក់ថា នេះជាសេចក្តីសម្រេចចិត្តយ៉ាងឆាប់រហ័ស តែថ្នាំបង្ការរបស់ Pfizer/BioNTech ពិតជាឆ្លើយតបបានទាំងស្រុងនូវលក្ខខណ្ឌចាំបាច់បី គឺ ជាថ្នាំមានប្រសិទ្ធភាព សុវត្ថិភាព និង គុណភាព។
មានប្រជាជនសរុបជាង៨,៦លាននាក់ និងជាប្រទេសដែលមានអត្រាប្រេវ៉ាឡង់ចម្លងខ្ពស់ជាងគេមួយនៅអឺរ៉ុប (មានឆ្លងថ្មីបួនពាន់នាក់ក្នុងមួយថ្ងៃៗ និងស្លាប់ជាង៦ពាន់នាក់គិតចាប់តាំងពីផ្ទុះកូវីដ១៩មក) ស្វីសបានបញ្ជាទិញថ្នាំវ៉ាក់សាំងប្រឆាំងកូវីដ១៩ ចំនួន ១៥,៨លានដូស ពីក្រុមហ៊ុនបី ៖ Pfizer/BioNTechចំនួន៥លានដូស Moderna ៧,៥លានដូស និង៥,៣លានដូស ពីAstraZeneca។ ទន្ទឹមគ្នានេះ ដើម្បីទប់ស្កាត់កុំឱ្យរលកចម្លងកូវីដ១៩ ដែលបន្តស្ទុះឡើងខ្លាំង រដ្ឋាភិបាលស្វីសបានប្រកាសចាត់វិធានការថ្មីបន្ថែម បិទភោជនីដ្ឋាន មណ្ឌលវប្បធម៌ កីឡា ព្រមទាំងកន្លែងកំសាន្តផ្សេងៗ ចាប់ពីថ្ងៃទី ២២ធ្នូទៅសម្រាប់រយៈពេលយ៉ាងហោចមួយខែ។ ហាងទំនិញផ្សេងៗនៅបើកលក់ជាធម្មតាតែត្រូវគោរពលក្ខខណ្ឌសុខាភិបាលខ្លាំងជាមុន។ ជាវិធានការនៅខ្សោយណាស់សម្រាប់ក្រសែភ្នែករបស់ក្រុមអ្នកវិទ្យាសាស្ត្រ។
ចំណែកនៅអ៊ីតាលីជិតខាងវិញ រដ្ឋាភិបាលបានសម្រេចពង្រឹងវិធានការយ៉ាងតឹងតែង ដោយបានចេញក្រិត្យនៅថ្ងៃសៅរ៍ទៅ១៩ធ្នូ បិទខ្ទប់ប្រទេសជាថ្មី បន្ថែមពីលើបម្រាមគោចរដែលមានស្រាប់ពី ១០យប់ដល់ម៉ោង៥ភ្លឺ។ ចាប់ពីថ្ងៃទី ២១ធ្នូទៅ រហូតដល់ថ្ងៃទី ៦មករា២០២១ ប្រជាពលរដ្ឋអ៊ីតាលីមានសិទ្ធិជួបជុំ ប្រារព្ធពិធីបុណ្យណូអែលជាក្រុមគ្រួសារតូចៗដោយអាចអញ្ជើញភ្ញៀវពីរនាក់យ៉ាងច្រើន (មិនឱ្យលើសពី១៤នាក់រាប់ទាំងក្មេងៗផង) មានសិទ្ធិចេញពីផ្ទះទៅសួរសុខទុក្ខញាតិមិត្តម្តងក្នុងមួយថ្ងៃក្នុងតំបន់រស់នៅរបស់ខ្លួន តែគ្មានសិទ្ធិធ្វើដំណើរឆ្លងស្រុកឆ្លងខេត្តទេ។ ជាប្រទេសរងគ្រោះខ្លាំងជាងគេបំផុតមួយ អ៊ីតាលីរាប់ឃើញអ្នកស្លាប់ដោយកូវីដ១៩ ជាង៦៨០០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ