បារាំងមានអត្រាកំណើតធ្លាក់ចុះខ្លាំងមិនធ្លាប់មាន ដោយហេតុកូវីដ
នៅខែមករា២០២១នេះ បារាំងបានបង្កើតកូនយ៉ាងតិចបំផុត មិនធ្លាប់ទេ គិតចាប់តាំងពីឆ្នាំ១៩៧៥មក។ អត្រាកំណើតបានធ្លាក់ចុះដល់ទៅ ១៣%បើប្រៀបទៅនឹងចំនួនទារកកើតកាលពីខែមករាឆ្នាំ២០២០ ក្នុងរយៈពេលដូចគ្នា។ មូលហេតុ គឺទំនងជាបណ្តាលមកពីវិបត្តិកូវីដ១៩។ នេះបើតាមវិទ្យាស្ថានជាតិស្ថិតិ និងសិក្សាសេដ្ឋកិច្ចបារាំង ដែលជាម្ចាស់របាយការណ៍។
ចុះផ្សាយនៅថ្ងៃ៖
ស្តាប់ - ០២:១៩
អត្រាកំណើតនៅប្រទេសបារាំងបានធ្លាក់ចុះជាលំដាប់តាំងពី៦ឆ្នាំជាប់ៗគ្នាមក ប៉ុន្តែការធ្លាក់ចុះនៅខែមករានេះ គ្មានមូលហេតុពាក់ព័ន្ធនឹងការចុះថយកន្លងមកទេ។ គេត្រូវរាប់ថយត្រលប់ដល់ទៅ៤៥ឆ្នាំមុនឯណោះទើបឃើញមានករណីបារាំងបង្កើតកូនក្នុងចំនួនដ៏តិចខ្លាំងយ៉ាងដូច្នេះ។ ជាសរុបនៅខែមករាឆ្នាំ២០២១ បារាំងរាប់ឃើញមានទារកកើតតែ៥៣៩០០នាក់ ប៉ុណ្ណោះ ពោលគឺមួយភាគធំជាកូនដែលបានមកចាប់កំណើតក្នុងផ្ទៃម្តាយពេលប្រទេសបារាំងជាប់វិធានការបិទខ្ទប់ប្រទេសជាលើកទីមួយដើម្បីទប់ស្កាត់ការឆ្លងរាតត្បាតកូវីដ១៩ភ្លាម។
កាលពីខែធ្នូ២០២០ អត្រាកំណើតបានធ្លាក់ចុះ៧%ទៅហើយបើប្រៀបទៅនឹងខែធ្នូឆ្នាំ២០១៨ ហើយនៅខែមករា២០២១ ការធ្លាក់ចុះមានកំរិតដល់ទៅ ១៣% បើប្រៀបទៅនឹងខែមករា២០២០។ បើតាមវិទ្យាស្ថានជាតិផ្នែកស្ថិតិ អត្រាកំណើតបានធ្លាក់ចុះពីរខែជាប់គ្នានេះ ទំនងជាមានពាក់ព័ន្ធនឹងវិបត្តិកូវីដ១៩។ ដោយហេតុមានរោគរាតត្បាតសកល និងភាពមិនទុកចិត្តបង្កឡើងវិបត្តិសុខភាព វិទ្យាស្ថានសង្កេតឃើញថាមានគូស្វាមីជាច្រើនលុបឬលើកគម្រោងយកកូន។ ក្នុងពេលបិទខ្ទប់ប្រទេសលើកទីមួយ មជ្ឈមណ្ឌលសុខភាពទទួលបន្ទុកបង្កកំណើតកូនដោយមានជំនួយ បានបិទ។ ឯសេវាផ្អាកកំណើតកូនដោយស្ម័គ្រចិត្តក៏ពិបាករកទៀត។
ប៉ុន្តែគេត្រូវរង់ចាំមើលលទ្ធផលនៃស្ថិតិនៅខែខាងមុខ ទើបអាចវាយតម្លៃបានដោយប្រាកដថា ការធ្លាក់ចុះនៃអត្រាកំណើតនៅខែធ្នូ និងមករានេះ ជាបាតុភូតខ្លីមួយបង្កឡើងជំងឺរាតត្បាត ឬ ជាចំណុចចាប់ផ្តើមថ្មីនៃទិន្នាការធ្លាក់ចុះជានិរន្តរ៍អត្រាកំណើតនៅក្នុងប្រទេសបារាំង។ វិបត្តិកូវីដ១៩ និងសេដ្ឋកិច្ច អាចជំរុញឱ្យគូស្វាមីលែងចង់មានកូន និងបោះបង់ចោលទាំងស្រុងតែម្តងផែនការចង់មានកូន។
សូមបញ្ជាក់ថារបាយការណ៍របស់វិទ្យាស្ថានស្ថិតិស្តីអំពីអត្រាកំណើតនេះ ជាការបញ្ជាក់បន្ថែមនូវការប៉ាន់ស្មានចេញផ្សាយកាលពីថ្ងៃទី ១៩មករា២០២១សប្តាហ៍មុន ដែលថាអត្រាកំណើតក្នុងឆ្នាំ ២០២០បានធ្លាក់ចុះទាបបំផុត។ វិទ្យាស្ថានស្ថិតិព្យាករថាមានទារកតែប្រមាណ៧៣៥០០០ប៉ុណ្ណោះបានកើតនៅឆ្នាំ២០២០ (-២,៥%) ពោលគឺជាចំនួនដ៏ទាបបំផុតគិតចាប់តាំងពីសង្គ្រាមលោកលើកទីពីរមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ