WhatsApp ត្រូវអាជ្ញាធរអៀរឡង់ ពិន័យ២២៥លានអឺរ៉ូ ពីបទគ្មានតម្លាភាព ក្នុងការគ្រប់គ្រងទិន្នន័យឯកជនរបស់អ្នកប្រើប្រាស់
ក្រុមហ៊ុន WhatsApp ដែលជាសាខាមួយរបស់ Facebook ត្រូវបានអាជ្ញាធរគ្រប់គ្រងទិន្នន័យបច្ចេកវិទ្យា របស់ប្រទេសអៀរឡង់ ពិន័យជាប្រាក់ ចំនួន២២៥លានអឺរ៉ូ ដោយចោទថាគ្មានតម្លាភាព ទាក់ទិននឹងការពារ និងគ្រប់គ្រងទិន្នន័យឯកជន របស់អ្នកប្រើប្រាស់។ នេះគឺជាការពិន័យធ្ងន់បំផុតមិនធ្លាប់មាន ដែលអាជ្ញាធរអៀរឡង់ ដាក់ទៅលើក្រុមហ៊ុនបច្ចេកវិទ្យា ខណៈដែលប្រទេសនេះ គឺជាទីស្នាក់ការធំប្រចាំអឺរ៉ុប របស់ក្រុមហ៊ុនបច្ចេកវិទ្យាអន្តរជាតិជាច្រើន។
ចុះផ្សាយនៅថ្ងៃ៖
ស្តាប់ - ០២:៥៣
នេះគឺជាការពិន័យធ្ងន់ធ្ងរបំផុត លំដាប់ទី២ ដែលអាជ្ញាធរប្រទេសអឺរ៉ុប បានដាក់ទៅលើក្រុមហ៊ុនបច្ចេកវិទ្យា បន្ទាប់ពីប្រទេសលុចហ្សំបួរ ដែលបានដាក់ពិន័យក្រុមហ៊ុន Amazon ចំនួន៧៤៦លានអឺរ៉ូ កាលពីខែកក្កដា។ ឆ្លងកាត់ការស៊ើបអង្កេត ដែលបានចាប់ផ្តើមតាំងតែពីឆ្នាំ២០១៨ ទីបំផុត អាជ្ញាធរគ្រប់គ្រងទិន្នន័យបច្ចេកវិទ្យាអៀរឡង់ បានសន្និដ្ឋានថា ក្រុមហ៊ុនWhatsApp មិនបានគោរពគោលការណ៍គ្រិះនៃច្បាប់របស់សហភាពអឺរ៉ុប ដែលតម្រូវឲ្យក្រុមហ៊ុនបច្ចេកវិទ្យា គោរពលក្ខខណ្ឌតម្លាភាព ក្នុងការគ្រប់គ្រង និងការពារទិន្នន័យឯកជនរបស់អ្នកប្រើប្រាស់។
មួយវិញទៀត ដោយហេតុតែ WhatsApp គឺជាផ្នែកមួយរបស់ Facebook បញ្ហាកាន់តែចោទឡើង ដោយសារទិន្នន័យឯកជនប្រមូលដោយWhatsApp អាចត្រូវយកទៅចែករំលែក ឲ្យFacebook រួមទាំងសាខាផ្សេងៗទៀតរបស់ Facebook។ ក្រៅពីពិន័យជាប្រាក់ចំនួន ២២៥លានអឺរ៉ូ អាជ្ញាធរអៀរឡង់ បានតម្រូវឲ្យ WhatsApp ត្រូវទទួលស្គាល់កំហុស និងសុំទោសជាសាធារណៈ ព្រមទាំងត្រូវចាត់វិធានការ កែលំអកង្វះខាតទាំងឡាយ ឲ្យបានត្រឹមត្រូវ។
នៅថ្ងៃព្រហស្បតិ៍ទី ២កញ្ញា អ្នកនាំពាក្យក្រុមហ៊ុន WhatsApp បានចាត់ទុកការពិន័យនេះ ថាធ្ងន់ធ្ងរហួសប្រមាណ និងបានបញ្ជាក់ថា គេនឹងធ្វើការប្តឹងឧទ្ធរណ៍។ WhatsApp អះអាងថា ក្រុមហ៊ុនគេ បានព្យាយាម ការពារទិន្នន័យឯកជនរបស់អ្នកប្រើប្រាស់ ជានិច្ច ប្រកបដោយតម្លាភាព។
សូមបញ្ជាក់ថា អៀរឡង់គឺជាភ្នែកជាច្រមុះ សម្រាប់សហភាពអឺរ៉ុប នៅក្នុងវិស័យការពារទិន្នន័យឯកជនរបស់អ្នកប្រើប្រាស់បណ្តាញបច្ចេកវិទ្យា ដោយសារក្រុមហ៊ុនបច្ចេកវិទ្យាធំៗភាគច្រើន គឺមានទីតាំងធំប្រចាំអឺរ៉ុបស្ថិតនៅក្នុងប្រទេសអៀរឡង់។ យ៉ាងណាមិញ រដ្ឋាភិបាលអៀរឡង់ ធ្លាប់ត្រូវបានគេរិះគន់ជារឿយៗ ថាបានបិទភ្នែក បណ្តោយឲ្យក្រុមហ៊ុនបច្ចេកវិទ្យាទាំងនោះធ្វើតាមចិត្ត ដោយសារតែប្រទេសអៀរឡង់ បានទទួលផលចំណូលច្រើនសន្ធឹក ពីការបង់ពន្ធ ពីសំណាក់ក្រុមហ៊ុនទាំងនោះ។ យ៉ាងណាមិញ ពីដំបូងអាជ្ញាធរអៀរឡង់ មានគម្រោងចង់ពិន័យ ក្រុមហ៊ុន WhatsApp តែ៥០លានអឺរ៉ូតែប៉ុណ្ណោះ។ ក៏ប៉ុន្តែ អាជ្ញាធរអឺរ៉ុប គ្រប់គ្រងទិន្នន័យបច្ចេកវិទ្យា បានជំទាស់ និងបានជំរុញឲ្យអាជ្ញាធរប្រទេសអៀរឡង់ ត្រូវដាក់ការពិន័យឲ្យធ្ងន់ជាងនេះ ទៅលើ WhatsApp។
គួរបញ្ជាក់ថា ទាក់ទិននឹងករណីក្រុមហ៊ុន WhatsApp នេះ គឺមានពាក្យបណ្តឹងជាច្រើន នៅតាមប្រទេសផ្សេងៗនៅអឺរ៉ុប ជាក់ស្តែងនៅក្នុងប្រទេសអាល្លឺម៉ង់។ យោងតាមលោក Max Schrems ស្ថាបនិកអង្គការការពារទិន្នន័យឯកជន ឈ្មោះ « NOYB » (Non of your business) បានឲ្យដឹងថា អង្គការលោកបានទទួលពាក្យបណ្តឹង របស់អ្នកប្រើប្រាស់ យ៉ាងហោច១ម៉ឺនករណី ជារៀងរាល់ឆ្នាំ គិតចាប់ពីឆ្នាំ២០១៨មក។ សកម្មជនរូបនេះ បានអបអរ ចំពោះទឹកប្រាក់ពិន័យដ៏ធ្ងន់ ដែលអៀរឡង់ បានសម្រេចដាក់ទៅលើ WhatsApp៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ