តារាភាពយន្តបារាំងដ៏ល្បីល្បាញ លោក Jean Paul Belmondo ទទួលមរណភាព
ពិភពអ្នកសិល្បៈនិងភាពយន្តបារាំង ទើបបាត់បង់ តារាដ៏ល្បីល្បាញម្នាក់ គឺលោក ហ្សង់ប៉ូល ប៊ែលម៉ុងដូ ក្នុងវ័យ៨៨ឆ្នាំ។ ចូលប្រលូកក្នុងវិស័យភាពយន្ត តាំងពីទសវត្សរ៍ឆ្នាំ១៩៥០មក លោក ប៊ែលម៉ុងដូ ជាតារាដ៏ប៉ិនប្រសព្វ គ្មានគូប្រៀបឡើយ ក្នុងពិភពលោកភាពយន្តបារាំង។ លោកមានជំនាញសម្តែងឆាកឈុតគ្រោះថ្នាក់ៗដោយខ្លួនលោកផ្ទាល់តែម្តង។ បារាំងនឹងប្រារព្វពិធីរំលឹកវិញ្ញាណក្ខន្ធជាតិជូនលោក នៅថ្ងៃព្រហស្បតិ៍ ទី៩កញ្ញា២០២១ នៅវិមានយុទ្ធជនពលីអាំងវ៉ាលីដ Invalide។
ចុះផ្សាយនៅថ្ងៃ៖
ជាតារាដ៏ល្បីល្បាញនិងមានប្រជាប្រិយភាពបំផុតម្នាក់ ក្នុងវិស័យសិល្បៈទី៧របស់បារាំង លោក ហ្សង់ប៉ូល ប៊ែលម៉ុងដូ Jean-Paul Belmondo បានទទួលមរណភាព នៅថ្ងៃចន្ទទី ៦កញ្ញា ក្នុងជន្មាយុ៨៨ឆ្នាំ។
ក្នុងអាជីពជាតារាភាពយន្តរយៈពេល៣០ឆ្នាំ លោកបានសម្តែងតួក្នុងភាពយន្តចំនួន៨០រឿង ក្នុងនោះ៤៨រឿង មានអ្នកចូលមើលជាងមួយលាននាក់។ ភាពល្បីល្បាញនិងប្រជាប្រិយភាពរបស់លោក បានឡើងត្រដែតត្រដឹមខ្លាំង គ្មានគូប្រៀប ដោយសារតែលោកមានជំនាញនិងភាពប៉ិនប្រសព្វសម្តែងឆាកឈុតគ្រោះថ្នាក់ ដោយខ្លួនលោកផ្ទាល់ ដោយមិនប្រើតួជំនួស ដូចក្នុងភាពយន្តហូលីវូតមួយចំនួនឡើយ។ លោកបានបញ្ឈប់ការសម្តែងភាពយន្តក្នុងសកម្មភាពបែបប្រថុយប្រថានជីវិត នៅឆ្នាំ១៩៨៥ឆ្នាំ បន្ទាប់ពីមានគ្រោះថ្នាក់
លោកបានទទួលពានរង្វាន់តាល់ប័តមាសកិត្តិយសនៅឆ្នាំ ២០១១ ឧទ្ទិសដល់ស្នាដៃរួមនៃការសម្តែងភាពយន្តរបស់លោកតែម្តង។ ហើយនៅឆ្នាំ២០១៩ មហោស្រពកានបានផ្តល់កិត្តិយសជូនលោកម្តងទៀត តាមរយៈការលើកផ្លាកឆាកឈុតដ៏ល្បីល្បាញបំផុតមួយដែលលោកអើតចេញពីឡានមកថើបតូអង្គស្រី ក្នុងរឿងចេញបញ្ចាំងកាលពីឆ្នាំ១៩៦៥។ លោក ប៊ែលម៉ុងដូ ធ្លាប់បដិសេធមិនទទួលយកពានរង្វាន់César ជាតួសម្តែងល្អជាងគេទេ នៅឆ្នាំ១៩៨៩ និងបានទទួលពាន ព្រមទាំងមេដាយកិត្តិយសថ្នាក់ជាតិជាច្រើនទៀត។
មុននឹងចូលប្រលូកក្នុងវិស័យភាពយន្ត លោកប៊ែលម៉ុងដូធ្លាប់បានឆ្លងកាត់ការសិក្សានៅរដ្ឋបណ្ឌិតសិល្បៈ និងបានចាប់ចូលសម្តែងល្ខោន តាំងពីអាយុ១៦ឆ្នាំ។ នៅឆ្នាំ១៩៩០ លោកបានត្រលប់មកលេងល្ខោនជាច្រើនរឿង និងសម្រេចលែងឡើងឆាកសោះចាប់ពីឆ្នាំ២០០០ ដោយសុខភាពមិនអនុគ្រោះ។
លោកបានចូលសម្រាកព្យាបាលខ្លួននៅមន្ទីរពេទ្យជាថ្មី តាំងពីដើមឆ្នាំ២០២១មក និងបានទទួលមរណភាពនៅថ្ងៃចន្ទទី ៦ កញ្ញា២០២១ ក្នុងជន្មាយុ៨៨ឆ្នាំ។ ប្រទេសបារាំងទាំងមូល ទាំងថ្នាក់ដឹកនាំរដ្ឋាភិបាល អ្នកនយោបាយ អ្នកស្រលាញ់វិស័យសិល្បៈ បានសម្តែងការសោកស្តាយ ចំពោះការបាត់បង់រូបលោក។ ការឧទ្ទិសវិញ្ញាណក្ខន្ធថ្នាក់ជាតិជូនសពលោកប៊ែលម៉ុងដូ នឹងប្រព្រឹត្តទៅនៅថ្ងៃព្រហស្បតិ៍ទី ៩ កញ្ញា នៅវិមាន Invalide នាទីក្រុងប៉ារីស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ