បាតុករនៅប៉ារីសទាមទារឲ្យសហភាពអឺរ៉ុបហាមឃាត់ទំនិញដែលប្រើពលកម្មជនជាតិអ៊ុយហ្គួរដោយបង្ខំ
បាតុករជាច្រើននាក់បានប្រមូលផ្តុំគ្នាក្នុងទីក្រុងប៉ារីសប្រទេសបារាំងកាលពីថ្ងៃសៅរ៍ ទី២ តុលាម្សិលមិញ ដើម្បីទាមទារឲ្យសហភាពអឺរ៉ុបចាត់វិធានការឆ្លើយតបទៅនឹងសកម្មភាពរំលោភសិទ្ធិមនុស្សរបស់ចិនទៅលើជនជាតិអ៊ុយហ្គួរ។ ក្រុមបាតុករចង់ឲ្យសហភាពអឺរ៉ុបដាក់ចេញនូវការហាមឃាត់ចំពោះមុខទំនិញទាំងឡាយណាដែលមានជាប់ពាក់ព័ន្ធនឹងការប្រើប្រាស់កម្លាំងពលកម្មរបស់ជនជាតិអ៊ុយហ្គួរដោយបង្ខំ។
ចុះផ្សាយនៅថ្ងៃ៖
ស្តាប់ - ០២:០៨
បាតុកម្មខាងលើនេះបានកើតឡើងប៉ុន្មានសប្តាហ៍ក្រោយប្រធានគណៈកម្មការអឺរ៉ុបលោកស្រី អួរស៊ូឡា វ៉ុនឌែរ ឡេយែន ប្រកាសអំពីគម្រោងផែនការរបស់សហភាពអឺរ៉ុបដែលចង់ហាមឃាត់ការនាំចូលមុខទំនិញដែលផលិតចេញពីការបង្ខំប្រើកម្លាំងពលកម្ម។
នៅក្នុងសុន្ទរកថាកាលពីថ្ងៃទី ១៥ ខែកញ្ញាកន្លងទៅនេះ លោកស្រី វ៉ុនឌែរ ឡេយែន មានប្រសាសន៍ថា សហភាពអឺរ៉ុប មិនអាចទទួលផលិតផលដែលផលិតចេញពីការប្រើពលកម្មដោយចាប់បង្ខំ ឲ្យលក់ក្នុងហាងទំនិញនានានៅអឺរ៉ុបទេបានឡើយ។
ដោយឡែកនៅឯបាតុកម្មក្នុងទីក្រុងប៉ារីសកាលពីម្សិលមិញ សមាជិកសភាអឺរ៉ុបម្នាក់គឺលោក Raphaël Glucksman បានចោទប្រកាន់ក្រុមហ៊ុនអឺរ៉ុបមួយចំនួនថាប៉ុនប៉ងរារាំងកិច្ចខិតខំប្រឹងប្រែងរបស់សហភាពអឺរ៉ុបក្នុងការត្រួតពិនិត្យទំនិញនាំចូលដែលជាប់ពាក់ព័ន្ធនឹងការចាប់បង្ខំប្រើប្រាស់កម្លាំងពលកម្ម។
សមាជិកសភាអឺរ៉ុបរូបនេះបានគូសបញ្ជាក់ថាក្នុងសភាអឺរ៉ុប នៅពេលគេចង់ចាត់វិធានការ និងអនុម័តច្បាប់ថ្មីដើម្បីដាក់សម្ពាធចិនរឿងរំលោភសិទ្ធិមនុស្សលើជនអ៊ុយហ្គួរនៅតំបន់ស៊ីនជាំង អ្នកដែលគេត្រូវប្រឈមខ្លាំងមិនមែនអាជ្ញាធរចិននោះទេ តែជាក្រុមអ្នកតំណាងក្រុមហ៊ុនអឺរ៉ុប។ ក្រុមហ៊ុនអឺរ៉ុបដែលជាអ្នកទទួលបានផលប្រយោជន៍នៅក្នុងប្រទេសចិនពីការផលិតមុខទំនិញដែលជនជាតិអ៊ុយហ្គួរត្រូវធ្វើដោយបង្ខំ។
គួរបញ្ជាក់ថាមានជនជាតិអ៊ុយហ្គួរយ៉ាងតិចមួយលាននាក់ត្រូវបានអាជ្ញាធរចិនចាប់ឃុំខ្លួននៅតាមជំរំលត់ដំជាច្រើនកន្លែងក្នុងតំបន់ស៊ីនជាំង។ នេះបើយោងតាមរបាយការណ៍សិទ្ធិមនុស្សរបស់អង្គការសហប្រជាជាតិ។ ប៉ុន្តែចិនតែងបដិសេធចំពោះការចោទប្រកាន់នេះ និងថាជំរំទាំងនោះ គឺជាមណ្ឌលអប់រំបង្កើតឡើងដើម្បីបណ្តុះបណ្តាលជំនាញដល់ជនជាតិអ៊ុយហ្គួរ និងដើម្បីទប់ស្កាត់កុំឲ្យមានជនជ្រុលនិយមតែប៉ុណ្ណោះ។
ជនជាតិអ៊ុយហ្គួរនៅស៊ីនជាំងភាគច្រើនគឺជាអ្នកកាន់សាសនាអ៊ីស្លាម ហើយសកម្មជនសិទ្ធិមនុស្ស បានចោទចិនថាបានប្រព្រឹត្តឧក្រិដ្ឋកម្មប្រឆាំងមនុស្សជាតិលើសហគមន៍ជនជាតិភាគតិច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ