ប៉ូឡូញចោទលោកពូទីនថាជាមេខ្លោងនៅពីក្រោយវិបត្តិជនអន្តោប្រវេសន៍
ក្រោយវិបត្តិជនអន្តោប្រវេសន៍នៅព្រំដែនជាប់បេឡារុសរីកកាន់តែធំខ្លាំង នាយករដ្ឋមន្ត្រីប៉ូឡូញលោក ម៉ូរ៉ាវីតស្គី បានចេញមុខចោទមេដឹកនាំរុស្ស៊ីលោក ពូទីន ពីបទរៀបចំឲ្យមានរលកជនអន្តោប្រវេសន៍។ ជនអន្តោប្រវេសន៍ដែលបាននិងកំពុងព្យាយាមសម្រុកចូលប៉ូឡូញដោយខុសច្បាប់ពីប្រទេសបេឡារុស និងដែលកំពុងបង្កជាការគំរាមកំហែងដល់ស្ថិរភាពសហភាពអឺរ៉ុប។
ចុះផ្សាយនៅថ្ងៃ៖
ស្តាប់ - ០២:០៩
សម្រាប់លោកនាយករដ្ឋមន្ត្រីប៉ូឡូញ ម៉ាតេអ៊ូស ម៉ូរ៉ាវីតស្គី(Mateusz Morawiecki)វិបត្តិជនអន្តោប្រវេសន៍ដែលកំពុងតែរីករាលដាលធំគឺជាគម្រោងផែនការវាយប្រហារមួយរៀបចំឡើងដោយប្រធានាធិបតីរុស្ស៊ី។
ប្រតិកម្មរបស់លោកនាយករដ្ឋមន្ត្រីប៉ូឡូញនេះ បានកើតឡើងនៅក្រោយមានការបារម្ភថាកាន់តែខ្លាំងថាវិបត្តិជនអន្តោប្រវេសន៍នឹងអាចធ្វើឲ្យការប្រឈមមុខដាក់គ្នាផ្ទុះឡើងដោយហេតុថាទាំងកងទ័ពប៉ូឡូញនិងបេឡារុសសុទ្ធតែមានវត្តមាននៅតំបន់ព្រំដែនជាប់នឹងគ្នា។
នាយករដ្ឋមន្ត្រីប៉ូឡូញ ដែលបានទៅសួរសុខទុក្ខឆ្មាំ ទាហាន និងប៉ូលិសនៅព្រំដែនកាលពីថ្ងៃអង្គារទី ៩ វិច្ឆិកា បានងាកមកវាយប្រហាររុស្ស៊ីដែលជាខ្នងបង្អែកដ៏សំខាន់របស់ប្រទេសបេឡារុស។ “ការវាយប្រហារដែលបេឡារុសកំពុងប្រើជនអន្តោប្រវេសន៍ជាអាវុធនេះមានមេខ្លោងនៅម៉ូស្គូ។ ហើយមេខ្លោងនោះគឺលោកពូទីន"។ នេះគឺជាការលើកឡើងរបស់លោកនាយករដ្ឋមន្ត្រីប៉ូឡូញ នៅក្នុងកិច្ចប្រជុំសភា ដោយបន្ថែមទៀតថាជនអន្តោប្រវេសន៍ត្រូវបានគេប្រើជាខែលដើម្បីបង្កអស្ថិរភាពក្នុងប្រទេសប៉ូឡូញ និងសហភាពអឺរ៉ុប។
ពីខាងទីក្រុងប៊ែរឡាំងវិញ អាល្លឺម៉ង់ដែលកំពុងបារម្ភពីវិបត្តិជនអន្តោប្រវេសន៍បានស្នើសុំអន្តរាគមន៍ពីមេដឹកនាំរុស្ស៊ី។ បើយោងតាមអ្នកនាំពាក្យរដ្ឋាភិបាលអាល្លឺម៉ង់ កាលពីថ្ងៃពុធម្សិលមិញ លោកស្រីអធិការបតីមែរគែល បានហៅទូរសព្ទទៅលោកពូទីន ដើម្បីស្នើសុំឲ្យលោកបញ្ឈប់បេឡារុសពីការប្រើប្រាស់ជនអន្តោប្រេវេសន៍ជាឧបករណ៍សងសឹកអឺរ៉ុប។
យ៉ាងណាក៏ដោយ គេនៅមិនទាន់ដឹងនោះទេថាតើមេដឹកនាំរុស្ស៊ីនឹងចូលជួយធ្វើអន្តរាគមន៍ក្នុងសំណុំរឿងជនអន្តោប្រវេសន៍ តបទៅតាមសំណូមពររបស់អាល្លឺម៉ង់ឬក៏អត់។ ដោយឡែក ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស អ្នកស្រី មីស្ហែល បាស្ហឺឡេ កាលពីថ្ងៃពុធម្សិលមិញបានចាត់ទុកវិបត្តិជនអន្តោប្រវេសន៍នៅតាមព្រំដែនរវាងប្រទេសប៉ូឡូញ និងបេឡារុសថាជារឿងមិនអាចអត់ឱនបាន និងថាគេមិនគួរបណ្តោយឲ្យអ្នកស្វែងរកសិទ្ធិជ្រកកោនចំណាយពេលច្រើនបន្តទៀតនៅទីនោះឡើយ ពីព្រោះថាអាកាសធាតុចាប់ចុះត្រជាក់ខ្លាំងហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ