វិបត្តិអន្តោប្រវេសន៍៖ បេឡារុសគំរាមបិទបំពង់បង្ហូរឧស្ម័ន បើអឺរ៉ុបនៅតែរឹងចង់ដាក់ទណ្ឌកម្មលើខ្លួន
វិបត្តិអន្តោប្រវេសន៍ រវាងសហភាពអឺរ៉ុប និងប្រទេសបេឡារុស កំពុងតែឈានជ្រៅទៅៗ ដោយភាគីទាំង២បន្តគំរាមគ្នាទៅវិញទៅមក។ សហភាពអឺរ៉ុប បានអះអាងថាគេនឹងពិចារណា ដាក់ទណ្ឌកម្មសេដ្ឋកិច្ចលើបេឡារុស នៅដើមសប្តាហ៍ក្រោយ ហើយភាគីបេឡារុសបានគំរាមតបវិញ ថាគេនឹងបិទបំពង់បង្ហូរឧស្ម័ន ដែលរុស្ស៊ីបញ្ជូនយកទៅលក់ឲ្យអឺរ៉ុប។ ខណៈដែលភាគីទាំងពីរបន្តគំរាមគ្នា ជនអន្តោប្រវេសន៍ជាច្រើនពាន់នាក់ឯណោះវិញ កំពុងកកកុញ រងចាំដំណោះស្រាយ ក្នុងសីតុណ្ហភាពដ៏ត្រជាក់ នៅតាមបណ្តោយព្រំដែន រវាងបេឡារុស និងប៉ូឡូញ។ បញ្ហានេះ ត្រូវបានក្រុមប្រឹក្សាសន្តិសុខអង្គការសហប្រជាជាតិ បើកការប្រជុំបន្ទាន់មួយផងដែរ កាលពីថ្ងៃព្រហស្បតិ៍ទី១១វិច្ឆិកា។
ចុះផ្សាយនៅថ្ងៃ៖
ស្តាប់ - ០៣:០៧
នៅចំពោះមុខអង្គសភាអាល្លឺម៉ង់ ព្រឹកថ្ងៃព្រហស្បតិ៍ទី១១វិច្ឆិកា លោក Heiko Maas រដ្ឋមន្ត្រីការបរទេសអាល្លឺម៉ង់ បានថ្លែងថា អាល្លឺម៉ង់ ព្រមទាំងដៃគូទាំងអស់ក្នុងក្របខណ្ឌអឺរ៉ុប នឹងពិភាក្សាគ្នា នៅថ្ងៃចន្ទ ដើមសប្តាហ៍ក្រោយនេះ ដើម្បីអនុម័តនូវទណ្ឌកម្ម ដាក់ទៅលើរបបដឹកនាំ របស់លោកប្រធានាធិបតីបេឡារុស លូកាឆិនកូ។
សូមបញ្ជាក់ ភាគីអឺរ៉ុប បានចោទរដ្ឋាភិបាលបេឡារុស ថាបានយកជនអន្តោប្រវេសន៍ជាអាវុធ ដើម្បីបង្កបញ្ហា និងសងសិកមកលើសហភាពអឺរ៉ុប។ យោងតាមប្រភពជាច្រើន បានអះអាងថា រដ្ឋាភិបាលបេឡារុស បានបើកដៃប្រគល់ទិដ្ឋាការ ឲ្យជនអន្តោប្រវេសន៍ជាច្រើនម៉ឺននាក់ ដែលភាគច្រើន មកពីតំបន់ដើមបូព៌ា និងបានដឹកជញ្ជូនពួកគេ យកទៅដាក់នៅព្រំដែនរវាងបេឡារុស និងប្រទេសប៉ូឡូញ ដែលជាសមាជិកអឺរ៉ុប ថែមទៀតផង។
កាលពីដើមសប្តាហ៍នេះ សហភាពអឺរ៉ុបបានចេញទណ្ឌកម្មជាលក្ខណៈបុគ្គល មានជាអាទិ៍ ការបង្កកទ្រព្យសម្បត្តិ និងការហាមឃាត់មិនឲ្យចូលជាន់ដីអឺរ៉ុប ដាក់ទៅលើមនុស្សចំនួន១៦៦នាក់ ដែលក្នុងនោះមានលោក ប្រធានាធិបតីបេឡារុស លូកាឆិនកូផ្ទាល់ និងកូនប្រុស២នាក់។ តែកាលពីល្ងាចថ្ងៃពុធ លោកស្រីប្រធានគណកម្មការអឺរ៉ុប បានបញ្ជាក់ថា អឺរ៉ុបនឹងបន្ថែមទណ្ឌកម្មសេដ្ឋកិច្ច ទៅលើប្រទេសបេឡារុស នៅដើមសប្តាហ៍ក្រោយ។
យោងតាមការលើកឡើង របស់លោករដ្ឋមន្ត្រីការបរទេសអាល្លឺម៉ង់ គឺអឺរ៉ុប អាចវាយឲ្យចំចំណូលសេដ្ឋកិច្ចរបស់បេឡារុស តួយ៉ាងដូចជាក្នុងវិស័យ ផលិតសារធាតុប៉ូតាស្យូម យកធ្វើជីកសិកម្ម ដែលបេឡារុស គឺជាប្រទេសនាំចេញសារធាតុនេះ ធំជាងគេទី២ក្នុងលោក។ ក្រៅពីនេះ អឺរ៉ុបអាចនឹងចាត់វិធានការ ដាក់ពិន័យក្រុមហ៊ុនអាកាសចរណ៍ស៊ីវីល Belavia ដែលជារបស់រដ្ឋបេឡារុស និងក្រុមហ៊ុនភ្នាក់ងារទេសចរណ៍បេឡារុស ជាច្រើនទៀត ដែលអឺរ៉ុបចោទថា ជាអ្នករៀបចំដំណើរមកដល់ របស់ជនអន្តោប្រវេសន៍។ ជាការឆ្លើយតបវិញ បេឡារុស អះអាងថា គេនឹងបិទខ្ទប់បំពង់បង្ហូរឧស្ម័នរបស់រុស្ស៊ី ដែលឆ្លងកាត់ប្រទេសគេ ឲ្យអឺរ៉ុបគ្មានឧស្ម័នប្រើ។
សូមបញ្ជាក់ថា យោងតាមអាជ្ញាធរប៉ូឡូញ គិតពីខែសីហាមក គឺមានករណីជនអន្តោប្រវេសន៍ខុសច្បាប់ ប៉ុនប៉ងឆ្លងពីបេឡារុស ចូលទៅប៉ូឡូញ ចំនួន៣២០០០នាក់ ដោយក្នុងនោះក្នុងខែតុលា មានចំនួន ជាង១៧០០០នាក់។ កាសែតប៉ូឡូញ Gazeta Wyborcza បានចុះផ្សាយថាមានជនអន្តោប្រវេសន៍យ៉ាងហោច១០នាក់ បានស្លាប់នៅព្រំដែន។ រដ្ឋាភិបាលប៉ូឡូញ បានបញ្ជូនទាហានទៅបន្ថែម ចំនួន១៥០០០នាក់ ដើម្បីយាមការពារព្រំដែន ខណៈជនអន្តោប្រវេសន៍ ជាង២០០០នាក់ កំពុងរងចាំនៅក្នុងព្រៃ ខាងព្រំដែនបេឡារុស ក្នុងសីតុណ្ហភាពត្រជាក់ ប្រមាណជា០°c។
ស្របពេលដែលភាគីអឺរ៉ុប និង បេឡារុស បន្តគំរាមគ្នានេះ លោកស្រីអង់ហ្កេឡា មែរគិល បានអំពាវនាវ ឲ្យរុស្ស៊ី ដែលមានឥទ្ធិពលខ្លាំងលើបេឡារុស ត្រូវចូលរួមជួយធ្វើអន្តរាគមន៍ ដើម្បីឲ្យលោកប្រធានាធិបតី លូកាឈិនកូ ឈប់យកជនអន្តោប្រវេសន៍ ធ្វើជាចំណាប់ខ្មាំងបែបនេះ។ តែយ៉ាងណា គិតមកត្រឹមពេលនេះ រដ្ឋមន្ត្រីការបរទេសរុស្ស៊ី បានអះអាងថា គឺភាគីអឺរ៉ុបទេ ដែលកំពុងចោទ សម្អុយកេរ្តិ៍ឈ្មោះ របស់បេឡារុស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ