ចិនចាប់ដៃជាមួយ អាមេរិក ដើម្បីចូលរួមដាក់សម្ពាធឲ្យគេបញ្ចុះតម្លៃប្រេង នៅទីផ្សារ
ប្រឈមនឹងវិបត្តិប្រេងឡើងថ្លៃ មហាអំណាចអាមេរិក និងចិន បានទុកជម្លោះពាណិជ្ជកម្មរវាងគ្នា នៅមួយកន្លែង ដោយងាកមកចាប់ដៃគ្នា ដើម្បីពង្រឹងកម្លាំងដាក់សម្ពាធលើក្រុមប្រទេសផលិត នាំចេញប្រេង។ តាមការប្រកាសរបស់សេតវិមាន កាលពីថ្ងៃអង្គារទី ២៣ វិច្ឆិកា ប្រទេសប្រើប្រាស់ប្រេងធំៗមួយចំនួន ដូចជា ចិន ឥណ្ឌា កូរ៉េខាងត្បូង និងជប៉ុនបានយល់ព្រមចូលរួមជាមួយអាមេរិក ដែលបានអំពាវនាវឲ្យគេប្រើប្រាស់ប្រេងក្នុងស្តុកបម្រុង ក្នុងគោលដៅ បញ្ចុះតម្លៃប្រេង នៅទីផ្សារប្រេងអន្តរជាតិ។
ចុះផ្សាយនៅថ្ងៃ៖
ស្តាប់ - ០២:៥១
ក្លាយជាដៃគូសហការគ្នា ដោយសារកាលៈទេសៈចាប់តម្រូវ។ តាមសេតវិមាន ចិនដែលជាប្រទេសទិញនាំចូលប្រេងដ៏ធំមួយក្នុងពិភពលោក បានចូលរួមជាមួយ អាមេរិក និងក្រុមប្រទេសសម្ព័ន្ធមិត្តរបស់អាមេរិកផ្សេងទៀតក្នុងយុទ្ធនាការបញ្ចុះតម្លៃប្រេង។ ទីភ្នាក់ងារព័ត៌មានអង់គ្លេសReuters បានចុះផ្សាយនៅថ្ងៃអង្គារថា ជប៉ុន និងឥណ្ឌាកំពុងពិចារណា លើជម្រើសប្រើប្រាស់ប្រេងក្នុងស្តុកបម្រុងរបស់ខ្លួន ព្រោះថា ក្នុងករណីជប៉ុន ច្បាប់បានហាមដាច់ខាតមិនឲ្យគេបញ្ចេញប្រេងពីក្នុងស្តុកបម្រុង ដោយលើកលែងតែករណីគ្រោះមហន្តរាយធម្មជាតិ ឬ ការខ្វះខាតប្រេងក្នុងស្រុកតែប៉ុណ្ណោះ។
នៅក្នុងសេចក្តីថ្លែងការណ៍កាលពីថ្ងៃអង្គារ សេតវិមានបានអះអាងថា នៅក្នុងបក្សសម្ព័ន្ធ ដែលទើបកើតមានជាលើកទី១ អាមេរិក ចិន ជប៉ុន កូរ៉េខាងត្បូង និងឥណ្ឌា នឹងប្រើប្រាស់ប្រេងក្នុងស្តុកបម្រុងរបស់ខ្លួន ក្នុងគោលដៅ បញ្ចុះតម្លៃប្រេង។ គំនិតផ្តួចផ្តើមរបស់អាមេរិក មានបំណងផងដែរ ដាក់សម្ពាធលើក្រុមប្រទេសផលិត និងនាំចេញប្រេង ដូចជា អារ៉ាប៊ី សាអូឌីត និងរុស្ស៊ី។
អាមេរិកដែលកំពុងប្រឈមនឹងវិបត្តិប្រេងឡើងថ្លៃ ធ្លាប់បានស្នើសុំឲ្យក្រុមប្រទេសបង្កើនបរិមាណ ផលិតប្រេងច្រើនជាងមុន ដើម្បីធ្វើឲ្យតម្លៃប្រេងធ្លាក់ចុះមកវិញ នៅទីផ្សារអន្តរជាតិ។ ប៉ុន្តែ សមាជិករបស់អង្គការក្រុមប្រទេសផលិតប្រេង OPEP ជាពិសេស រុស្ស៊ី បានបដិសេធ ប៉ុន្តែ សុខចិត្តបង្កើនការផលិតរបស់ខ្លួន តែត្រឹម ៤សែនបារីល ក្នុងមួយថ្ងៃតែប៉ុណ្ណោះ។
នៅអាមេរិក តម្លៃប្រេងឡើងថ្លៃ នៅក្នុងឱកាសបុណ្យ Thank giving ពេលវេលាដែលប្រជាជនអាមេរិកធ្វើដំណើរផ្លាស់ទីច្រើនដោយមធ្យោបាយរថយន្ត ជាសញ្ញាមិនល្អទេ សម្រាប់លោកប្រធានាធិបតីចូ បៃដិន ដែលបារម្ភខ្លាចចាញ់ឆ្នោត នៅក្នុងការបោះឆ្នោតសភាពាក់កណ្តាល ដែលត្រូវប្រព្រឹត្តទៅដើមឆ្នាំក្រោយ។
ដើម្បីបញ្ចុះតម្លៃប្រេងក្នុងស្រុក រដ្ឋបាលអាមេរិកនឹងបញ្ចេញប្រេងពីក្នុងស្តុកបម្រុង របស់ខ្លួន ប្រមាណ ៥០លានបារីល ទៅក្នុងទីផ្សារ។ ៣៨លានបារីល សម្រាប់ឲ្យក្រុមហ៊ុនខ្ចីទៅលក់បន្ត និងត្រូវសងមករដ្ឋវិញ ចាប់ពីឆ្នាំក្រោយ។ ចំណែក ១២លានបារីលផ្សេងទៀត នឹងត្រូវដាក់លក់ក្នុងទីផ្សារផ្ទាល់តែម្តង ក្នុងរយៈពេល ១៨ខែ។
អាមេរិកមានប្រេងក្នុងស្តុកបម្រុងជាយុទ្ធសាស្រ្តរបស់ខ្លួន ប្រមាណ ៧៥០លានបារីល។ អាមេរិកធ្លាប់អនុវត្តយុទ្ធសាស្រ្តបញ្ចេញប្រេងពីក្នុងស្តុកបម្រុង៣លើកមកហើយ ដោយចុងក្រោយបំផុត នៅឆ្នាំ ២០១១ នៅពេល លីប៊ី សមាជិករបស់ក្រុមប្រទេសផលិតប្រេង ធ្លាក់ក្នុងសង្រ្គាមស៊ីវិល នៅឆ្នាំ ២០១១។
ការប្រកាសបញ្ចេញប្រេងពីក្នុងស្តុកបម្រុងរបស់អាមេរិក ដែលមានការចូលរួមគាំទ្រពីប្រទេសទិញនាំចូលប្រេងធំៗ ដូចជាចិន ឥណ្ឌា បានធ្វើឲ្យតម្លៃប្រេងនៅទីផ្សារអន្តរជាតិធ្លាក់ចុះបន្តិច នៅថ្ងៃអង្គារ។ តម្លៃប្រេងនៅទីផ្សារអន្តរជាតិ បានធ្លាក់ចុះថ្លៃរួចហើយ នៅប៉ុន្មានថ្ងៃចុងក្រោយនេះ នៅបន្ទាប់ពីមានការព្រួយបារម្ភពីចំណាត់ការបិទខ្ទប់ប្រទេសសាជាថ្មី ដោយសារការកើនឡើងនៃករណីឆ្លងជំងឺកូវីដ ១៩។ អ្នកវិភាគវិញ វាយតម្លៃថា យុទ្ធនាការរបស់អាមេរិកដែលដើរបញ្ចុះបញ្ចូលឲ្យគេបញ្ចេញប្រេងពីក្នុងស្តុក មកប្រើ ក្នុងគោលដៅ ទម្លាក់តម្លៃប្រេង នឹងមិនសូវមានសម្ពាធខ្លាំងលើក្រុមប្រទេសផលិតប្រេងនោះទេ។ ក្រុមប្រទេសផលិតប្រេងនៅតែអាចយកលេសថា គេនឹងមិនបង្កើនការផលិតប្រេង ព្រោះ តម្រូវការប្រេងនឹងធ្លាក់ថយចុះ ដោយសារវិធានការបិទខ្ទប់ប្រទេសសាជាថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ