សមាជិកសហភាពអឺរ៉ុប ខ្វែងគំនិតគ្នា ក្នុងការដោះស្រាយវិបត្តិតម្លៃថាមពលឡើងថ្លៃខ្លាំង
បណ្តាប្រទេសអឺរ៉ុប កំពុងរងជួបបញ្ហា ឡើងថ្លៃថាមពលខ្លាំងណាស់ មិនថាប្រេងឥន្ធនៈ ភ្លើងអគ្គីសនី និងហ្កាស។ កាលពីថ្ងៃអង្គារ ទី២៦តុលាម្សិលមិញ រដ្ឋមន្ត្រីពាក់ព័ន្ធនៃប្រទេសសមាជិកអឺរ៉ុប បានជួបប្រជុំគ្នាបន្ទាន់ នៅប្រទេសលុចហ្សំបួរ ដើម្បីស្វែងរកដំណោះស្រាយរួមគ្នា ទល់នឹងបញ្ហានេះ។ ក៏ប៉ុន្តែ ដោយសារតែការខ្វែងគំនិតគ្នា ប្រទេសសមាជិកអឺរ៉ុប មិនបានសម្រេចវិធានការអ្វីទាល់តែសោះ។
ចុះផ្សាយនៅថ្ងៃ៖
ស្តាប់ - ០២:៤២
តម្លៃថាមពល ទាំងអគ្គីសនី ហ្កាស និងប្រេងឥន្ធនៈ បានឡើងខ្ពស់ស្រឺតៗ ធ្វើឲ្យប្រជាជនអឺរ៉ុប ចាប់ផ្តើមរអ៊ូរទាំ។ រដ្ឋាភិបាលប្រទេសមួយចំនួន ចាប់ផ្តើមចេញវិធានការផ្សេងៗគ្នា ដូចជាការកំណត់ តម្លៃអតិបរមា មិនឲ្យក្រុមហ៊ុនផ្គត់ផ្គង់លក់លើសពីនេះ។ នៅបារាំង រដ្ឋាភិបាលបានសម្រេច ផ្តល់ជាថវិកា ចំនួន១០០អឺរ៉ូ សម្រាប់អ្នកណា ដែលមានចំណូលប្រាក់ខែក្រោម២០០០អឺរ៉ូ។
តែយ៉ាងណា ទាំងនេះ គ្រាន់តែជាដំណោះស្រាយបណ្តោះអាសន្ន សម្រាប់រយៈពេលខ្លី។ ប្រទេសអឺរ៉ុបខ្លះ មានបារាំង អេស្ប៉ាញ ក្រិក និងសាធារណរដ្ឋឆេកជាដើម បាននាំគ្នាអំពាវនាវ ថាត្រូវតែដោះស្រាយក្នុងក្របខណ្ឌសហភាពអឺរ៉ុប។ ពោលគឺ អឺរ៉ុបត្រូវតែរួមគ្នា ពិនិត្យ និងរៀបចំឡើងវិញ នូវទីផ្សារផ្គត់ផ្គង់ និងចែកចាយថាមពល ដើម្បីការពារកុំឲ្យតម្លៃឡើងចុះមិនទៀងបែបនេះ។
កិច្ចប្រជុំបន្ទាន់មួយ ត្រូវបានរៀបចំឡើង ក្នុងក្របខណ្ឌអឺរ៉ុប ដោយមានរដ្ឋមន្ត្រីពាក់ព័ន្ធ នៃប្រទេសសមាជិកទាំង២៧ នៅឯប្រទេសលុចហ្សំបួរ កាលពីព្រឹកថ្ងៃអង្គារទី២៦តុលា។ តែកិច្ចប្រជុំនេះ បានបិទបញ្ចប់ ដោយការខ្វែងគំនិតគ្នា យ៉ាងខ្លាំង រវាងប្រទេសសមាជិក។ នេះ បើផ្អែកតាមការបញ្ជាក់ ពីលោកស្រី Kadri Simson ស្នងការអឺរ៉ុប ទទួលបន្ទុកសំណុំរឿងថាមពល។ ពោលគឺគ្មានវិធានការរួមអ្វីទាំងអស់ នៅក្នុងក្របខណ្ឌអឺរ៉ុប ដើម្បីដោះស្រាយបញ្ហាថាមពលឡើងថ្លៃនេះ។
គួរបញ្ជាក់ថា នៅមុនពេលបើកកិច្ចប្រជុំ ប្រទេសអេស្ប៉ាញ បានស្នើឲ្យប្រទេសសមាជិកអឺរ៉ុប រួមគ្នាចរចាទិញហ្កាសរួមគ្នាតែម្តង ដើម្បីបានតម្លៃថោក ហើយត្រូវបើកលទ្ធភាពឲ្យប្រទេសនីមួយ អាចព្យួរប្រព័ន្ធកំណត់អត្រាតម្លៃអគ្គីសនី។ ក៏ប៉ុន្តែ មានប្រទេសចំនួនយ៉ាងហោច៩ ក្នុងនោះ មានអាល្លឺម៉ង់ បានប្រកាស ថាគេមិនគាំទ្រដាច់ខាត នូវគំនិតចង់ទៅធ្វើកំណែទម្រង់ទីផ្សារថាមពលអឺរ៉ុប ព្រោះថាវានឹងមិនមកជួយ បញ្ចុះតម្លៃថាមពលទេ ព្រោះតម្លៃថាមពល វារងឥទ្ធិពលដោយផ្ទាល់ ពីទីផ្សារពិភពលោក នៃតម្លៃវត្ថុធាតុដើមប្រភពថាមពលហ្វូស៊ីល ។
ដោយឡែក ប្រទេសអឺរ៉ុបខ្លះទៀត បានសង្ស័យក្រុមហ៊ុនផ្គត់ផ្គង់ហ្កាសរបស់រុស្ស៊ី Gazprom ថាបានបំប៉ោងតម្លៃ។ គណកម្មការអឺរ៉ុប បានសន្យថាគេនឹងពិនិត្យមើលរឿងនេះ។ គណកម្មការអឺរ៉ុប ក៏កំពុងសិក្សាដែរ ក្នុងករណីទិញហ្កាសរួមគ្នា ថាតើ អ្នកណាជាអ្នកចំណាយលើការស្តុកហ្កាស ហើយត្រូវបែងចែង ឲ្យគ្នាដោយរបៀបណា។
គួរកត់សំគាល់ថា វិបត្តិតម្លៃថាមពលឡើងថ្លៃខ្លាំងនេះ កំពុងតែដាក់សំពាធយ៉ាងខ្លាំង នៅតាមប្រទេសអឺរ៉ុប ខណៈដែលសន្និសីទអន្តរជាតិ COP26 កំពុងតែខិតជិតមកដល់។ បញ្ហានេះ បានធ្វើឲ្យមានការខ្វែងគំនិតគ្នា រវាងក្រុមអ្នកចង់ដំឡើងពន្ធលើប្រភពថាមពល ដែលបញ្ចេញឧស្ម័នកាបូនិក និងអ្នកដែលចង់ទាមទារបញ្ចុះអត្រាពន្ធ ដើម្បីបន្ថយតម្លៃលក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ