បែលហ្ស៊ិក៖ សវនាការកាត់ទោសមនុស្ស២៣នាក់ ពាក់ព័ន្ធនឹងករណីសាកសពជនជាតិវៀតណាម៣៩នាក់ ក្នុងរថយន្តកុងទឺនឺកាលពីឆ្នាំ២០១៩
ហេតុការណ៍ប្រទះឃើញសាកសពជនជាតិវៀតណាម៣៩នាក់ នៅក្នុងរថយន្តកុងទឺនឺមួយ នៅជាយទីក្រុងឡុងដ៍ កាលពីខែតុលា ឆ្នាំ២០១៩ បានធ្វើឲ្យមានការតក់ស្លុតជាខ្លាំង នៅទូទាំងពិភពលោក។ នីតិវិធីស៊ើបអង្កេត ដើម្បីផ្តន្ទាទោសអ្នកទទួលខុសត្រូវ លើករណីនេះ បានដំណើរការទៅ នៅតាមប្រទេសចំនួនយ៉ាងហោច ៤ប្រទេស។ នៅថ្ងៃពុធទី១៥ធ្នូនេះ តុលាការទីក្រុងប៊្រុយហ្ស៍ ប្រទេសប៊ែលហ្ស៊ិក បានចាប់ផ្តើមបើកសវនការ ជំនំជំរះទោស លើជនសង្ស័យចំនួន២៣នាក់ ដែលពាក់ព័ន្ធនឹងបណ្តាញជួញដូរ ដឹកជញ្ជូនអន្តោប្រវេសន៍ខុសច្បាប់ ជនជាតិវៀតណាម ទាំង៣៩នាក់នេះ។
ចុះផ្សាយនៅថ្ងៃ៖
ថ្ងៃទី២៣ តុលា ២០១៩ សមត្ថកិច្ចអង់គ្លេស បានប្រទះឃើញរថយន្តកុងទឺនឺមួយ ចតចោល នៅតំបន់ឧស្សាហកម្មGrays ជាយខាងលិចទីក្រុងឡុងដ៍។ ក្នុងរថយន្តនោះ មានមនុស្សចំនួន៣៩នាក់ សុទ្ធតែជាជនជាតិវៀតណាម ប្រុស៣១នាក់ ស្រី៩នាក់ បានស្លាប់ដោយថប់ដង្ហើម គ្មានអ៊ុកស៊ីហ្សែន។
ឆ្លងកាត់ការស៊ើបអង្កេត យ៉ាងហោចជនរងគ្រោះចំនួន១៥នាក់ ត្រូវបានគេដឹកចេញពី សង្កាត់Anderlecht នៅជាយក្រុងប្រ៊ុយសែល នៅថ្ងៃទី២២ តុលា ដើម្បីធ្វើដំណើរអង់គ្លេស។ ថ្ងៃទី ២៦ ឧសភា ២០២០ សមត្ថកិច្ចប៊ែលហ្ស៊ិក បានឈានទៅចាប់ខ្លួនជនសង្ស័យជាង២០នាក់ ដែលពាក់ព័ន្ធនឹងបណ្តាញជួញដូរមនុស្ស ដ៏គ្រោះថ្នាក់នេះ។
ថ្ងៃពុធទី១៥ធ្នូ ២០២១ តុលាការទីក្រុងប្រ៊ុយហ្ស៍ បានចាប់ផ្តើមបើកសវនាការ កាត់ទោសមនុស្សចំនួន២៣នាក់ ក្នុងនោះ ភាគច្រើនសុទ្ធសឹងតែជាជនជាតិវៀតណាម។ ជនជាប់ចោទសំខាន់ជាងគេ មានភេទប្រុស អាយុ៤៥ឆ្នាំ ជាជនជាតិវៀតណាម ត្រូវតុលាការសង្ស័យថា គឺជាមេបណ្តាញក្រុមឧក្រិដ្ឋកម្មជួញដូរមនុស្ស។ ជននេះ អាចប្រឈមនឹងទោសជាប់ពន្ធនាគារ១៥ឆ្នាំ។ ចំណែកជនជាប់ចោទផ្សេងៗទៀត ត្រូវបានតុលាការចោទពីបទចូលរួមសមគំនិត ក្នុងសកម្មភាពដឹកជញ្ជូនជនអន្តោប្រវេសន៍ដោយខុសច្បាប់។
គួររំលឹកថា ករណីសាកសពជនជាតិវៀតណាម៣៩នាក់ ស្លាប់ក្នុងកុងទឺនឺនេះ បានសបង្ហាញឲ្យឃើញនូវ សកម្មភាពដ៏គ្រោះថ្នាក់ របស់បណ្តាញជួញដូរ ដឹកជញ្ជូនជនអន្តោប្រវេសន៍។ ពាក់ព័ន្ធនឹងករណីនេះ តុលាការអង់គ្លេស បានកាត់ទោសមនុស្ស៧នាក់ កាលពីខែមករា ឆ្នាំ២០២១ ដោយជាប់ពន្ធនាគារ ចន្លោះពី ៣ ទៅ ២៧ឆ្នាំ។ នៅវៀតណាមវិញ តុលាការបានផ្តន្ទាទោស មនុស្សចំនួន៤នាក់ កាលពីខែកញ្ញា ឆ្នាំ២០២០ ឲ្យជាប់ពន្ធនាគារ ពី២ឆ្នាំ ទៅ៧ឆ្នាំកន្លះ។
ដោយឡែក នៅប៊ែលហ្ស៊ិក ការស៊ើបអង្កេតនៅមិនទាន់ចប់នៅឡើយទេ។ សមត្ថកិច្ចប៊ែលហ្ស៊ិក បានកំណត់មុខសញ្ញាបណ្តាញជួញដូរ ដឹកជញ្ជូនអន្តោប្រវេសន៍ខុសច្បាប់ ដែលមានទំនាក់ទំនង ជាមួយបណ្តាញនៅបារាំង នៅហូឡង់ និងអាល្លឺម៉ង់ផងដែរ។ កាលពីពាក់កណ្តាលឆ្នាំ២០២០ សមត្ថកិច្ចបារាំង និងប៊ែលហ្ស៊ិក បានអះអាងថា បណ្តាញទុច្ចរិត បានដឹកជញ្ជូនជនអន្តោប្រវេសន៍ខុសច្បាប់ មកពីតំបន់អាស៊ីអាគ្នេយ៍ ជាច្រើនសិបនាក់ ជារៀងរាល់ថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ