អឺរ៉ុបអំពាវនាវឱ្យវិស័យអាកាសចរណ៍បញ្ចេញកាបោនសូន្យត្រឹមឆ្នាំ២០៥០
វិស័យអាកាសចរណ៍ មិនត្រូវបន្តបញ្ចេញឧស្ម័នកាបូនិកដែលនាំឱ្យភពផែនដីឡើងកំដៅអាកាសធាតុទេ ចាប់ពីឆ្នាំ២០៥០ទៅ។ ពិភពលោកទាំងមូលត្រូវតែរួមគ្នាចាត់វិធានការ ដើម្បីសម្រេចបំណងនេះ។ នេះបើតាមសេចក្តីថ្លែងការណ៍អឺរ៉ុបដែលផ្តួចផ្តើមឡើងដោយបារាំងជាប្រធានផ្លាសវេនសហភាពអឺរ៉ុប ចេញផ្សាយនៅថ្ងៃសុក្រទី ៤កុម្ភៈ ២០២២។
ចុះផ្សាយនៅថ្ងៃ៖
ស្តាប់ - ០២:០៩
សេចក្តីថ្លែងការណ៍ទូលូ (ទូលូ Toulouse ក្រុងដែលជាមានទីស្នាក់ការAirbus តាំងនៅ) បានទទួលការចុះហត្ថលេខាគាំទ្រពីរដ្ឋចំនួន៤២ ពោលគឺប្រទេសសមាជិកសហភាពអឺរ៉ុបទាំង២៧ ព្រមទាំងសហរដ្ឋអាមេរិក អង់គ្លេស កាណាដា ម៉ារ៉ុក និងហ្សកហ្ស៊ី។ អង្គការជាង១០ ក្រុមហ៊ុនសហគ្រាស អាកាសយានដ្ឋាន ក្រុមហ៊ុនអាកាសចរណ៍ ក្រុមហ៊ុនផលិតយន្តហោះ ថាមពល ក៏បានភ្ជាប់ហត្ថលេខាលើសេចក្តីថ្លែងការណ៍ផ្តួចផ្តើមដោយបារាំងនេះដែរ។
ម្ចាស់ហត្ថលេខីទាំងអស់ បានអំពាវនាវឱ្យដៃគូនៅលើពិភពលោកសហការធ្វើការរួមគ្នា ដើម្បីឱ្យសេចក្តីថ្លែងការណ៍នេះនឹងក្លាយជាទម្រសេចក្តីសម្រេចចិត្ត និងត្រូវបានគ្រប់ប្រទេសព្រមអនុម័ត នាឱកាសមហាសន្និបាតអង្គការអាកាសចរណ៍ស៊ីវិលអន្តរជាតិ លើកទី៤១ ដែលនឹងប្រព្រឹត្តនៅខែកញ្ញាខាងមុខ ជាមួយកម្មវត្ថុដ៏ចំបងនិងប្រកបដោយមហិច្ឆតាមួយ គឺ នៅឆ្នាំ២០៥០ វិស័យអាកាសចរណ៍ស៊ីវិលអន្តរជាតិ បញ្ចេញសូន្យកាបោន។ ដើម្បីអាចសម្រេចអព្យាក្រិតយកាបោនបានក្នុងរយៈពេលតែ២៨ឆ្នាំ ក្រុមហត្ថលេខី បានលើកដំណោះស្រាយជាច្រើន ដូចជាអភិវឌ្ឍបច្ចេកវិទ្យា-ប្រតិបត្តិការអាកាសចរណ៍ឱ្យកាន់តែប្រសើរឡើង ប្រើប្រាស់ថាមពលប្រេងកើតឡើងវិញ ចាត់វិធានការដោយគោរពទីផ្សារ មានតារាងតម្លៃកាបោន ផ្តល់ហិរញ្ញវត្ថុនិងធ្វើទំនើបកម្មបរិស្ថានអាកាសធាតុក្នុងវិស័យអាកាសចរណ៍នេះ ព្រមទាំងមានកិច្ចសហប្រតិបត្តិការអន្តរជាតិល្អដើម្បីធានាសមភាពកំរិតពិភពលោក។ តែពុំមានគិតបញ្ចូលអំពីការកាត់បន្ថយឬកំរិត បរិមាណចរាចរណ៍ផ្លូវអាកាសទេ។ កម្មវត្ថុអព្យាក្រិតយកាបោនវិស័យអាកាសចរណ៍ត្រូវធ្វើចាប់អនុវត្តជាដំណាក់ៗ ទើបមានប្រសិទ្ធភាពល្អ។
សេចក្តីថ្លែងការណ៍ទូលូ គ្មានលក្ខណៈបង្ខិតបង្ខំតម្រូវឱ្យគោរពតាមទេ ប៉ុន្តែគោលការណ៍សអព្យាក្រិតកាបោនចាប់ពីពាក់កណ្តាលសតវត្សរ៍នេះ បានទទួលការគាំទ្រពីប្រទេសនិងស្ថាប័នអន្តរជាតិ ក្រុមហ៊ុនអាកាសចរណ៍ ជាង៣០០ដែលតំណាងឱ្យចរាចរណ៍ផ្លូវអាកាសពិភពលោកចំនួន៨០%ហើយ លើកលែងតែចិននិងរុស្ស៊ី និងកំពុងយកទៅបញ្ជ្រាបបណ្តាប្រទេសផ្សេងទៀត ដូចជាប្រេស៊ីល ឥណ្ឌា អាហ្វ្រិកខាងត្បូង ឬបណ្តាប្រទេសនៅតមបន់ដើមបូព៌ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ