សហភាពអឺរ៉ុបទាមទារបង្កើតសន្ធិសញ្ញាទប់ស្កាត់ជំងឺឆ្លងរាតត្បាតសកលថ្មីៗ
សហភាពអឺរ៉ុប បានដាក់សម្ពាធលើពិភពលោកឱ្យសម្រេចកិច្ចព្រមព្រៀងមួយ សម្រាប់ការពារកុំឱ្យលេចជំងឺឆ្លងរាតត្បាតសកលថ្មីៗទៀត។ ជាកិច្ចព្រមព្រៀងដែលសំដៅហាមឃាត់មិនឱ្យមានទីផ្សារលក់សត្វព្រៃ និងលើកទឹកចិត្តឱ្យគ្រប់ប្រទេសផ្តល់ព័ត៌មានភ្លាមនៅពេលឃើញមានមេរោគលេចឡើងថ្មី។
ចុះផ្សាយនៅថ្ងៃ៖
ស្តាប់ - ០១:៥០
ជំនួបប្រជុំអន្តរជាតិ ដើម្បីស្វែងរកកិច្ចព្រមព្រៀង បង្កើតសន្ធិសញ្ញាការពារកុំឱ្យលេចជំងឺរាតត្បាតសកលថ្មី បានចាប់ផ្តើមបើក លើកទីមួយហើយនៅថ្ងៃពុធទី ៩កុម្ភៈ២០២២នេះ។ បើតាមតំណាងអឺរ៉ុបសុំមិនបញ្ចេញឈ្មោះ កម្មវត្ថុរបស់ក្រុមអ្នកទទួលបន្ទុកចរចា គឺចង់សម្រេចឱ្យបាននូវកិច្ចព្រមព្រៀងមួយ ឱ្យបានមុនខែសីហាឆ្នាំ២០២២។
ក៏ប៉ុន្តែគម្រោងសន្ធិសញ្ញា ផ្តួចផ្តើមដោយសហភាពអឺរ៉ុតាំងពីខែវិច្ឆិកា២០២០នេះ បានទទួលការគាំទ្រស្តួចស្តើងណាស់។ សហរដ្ឋអាមេរិក និងបណ្តាប្រទេសមហាអំណាចផ្សេងទៀត ព្រមទាំងប្រទេសខ្លះ ចង់បានត្រឹមតែកិច្ចព្រមព្រៀងមួយដែលគ្មានលក្ខណៈតឹងតែងត្រូវតែគោរពតាមជាដាច់ខាតទេ។
សេតវិមានបានបដិសេធមិនធ្វើអត្ថាធិប្បាយជុំវិញបញ្ហានេះឡើយ ហើយអ្នកនាំពាក្យរបស់លោក Charles Michel ប្រធានក្រុមប្រឹក្សាអឺរ៉ុប ដែលផ្តួចផ្តើមគំនិត បានប្រកាសថាគ្មានអ្វីថ្មីត្រូវបន្ថែមបន្ថយទៀតដែរ។
សម្រាប់សហភាពអឺរ៉ុប គម្រោងកិច្ចព្រមព្រៀង ដែលចង់តម្រូវឱ្យពិភពលោកបិទបន្តិចម្តងៗទីផ្សារលក់សត្វព្រៃ និងដែលចង់ឱ្យពិភពលោកមានយន្តការរាយការណ៍ភ្លាម នៅពេលឃើញឬលេចមេរោគថ្មីឡើង ជាវិធានការសំខាន់និងចាំបាច់ណាស់។ វិបត្តិកូវីដជាឧទារហណ៍ជាក់ស្តែង។
មេរោគកូវីដ១៩ ដែលបាននិងកំពុងចម្លងរាតត្បាត និងដែលបានធ្វើឱ្យពិភពលោកខ្លបខ្លាច ទំនងជាវីរុសរបស់សត្វព្រៃចម្លងមកមនុស្សផ្ទាល់ តាមរយៈពាណិជ្ជកម្មសត្វព្រៃនេះឯង។ នេះជាសម្មតិកម្មធំចម្បងជាងគេ។ ហើយគ្រាន់តែលេចករណីមេរោគកូវីដបំប្លែងខ្លួនអូមីក្រុង ភ្លាម ប្រទេសជាច្រើនបានសម្រេចបិទនិងព្យួរចរាចរណ៍ផ្លូវអាកាសជាមួយបណ្តាប្រទេសនៅអាហ្វ្រិក។ សកម្មភាពបែបនេះនឹងធ្វើឱ្យមានការភ័យខ្លាចលែងហ៊ានជូនដំណឹងនៅពេលមានលេចវីរុសថ្មី ប្រសិនបើពិភពលោកគ្មានវិធានការការពារពិតៗ ធានាឱ្យប្រទេសនីមួយៗត្រូវរាយការណ៍ព័ត៌មានភ្លាមនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ