រដ្ឋមន្ត្រីការបរទេសបារាំង ចាត់ទុកសមយុទ្ធយោធារវាងរុស្ស៊ីនិងបេឡារុសថាជា « កាយវិការដ៏សែនហិង្សា »
ចាប់ពីថ្ងៃទី១០កុម្ភៈនេះទៅ ទាហានបេឡារុស និង ទាហានរុស្ស៊ីបានបើកការធ្វើសមយុទ្ធយោធារួមគ្នា រយៈពេល១០ថ្ងៃ នៅភាគខាងត្បូងបេឡារុស ជាប់ព្រំដែនអ៊ុយក្រែន។ កាលពីដើមសប្តាហ៍នេះ លោកពូទីន បានសន្យាជាមួយលោកម៉ាក្រុង ថានឹងមិនធ្វើអ្វី ឲ្យស្ថានការណ៍ទៅជាធ្ងន់ធ្ងរទេ។ តែយ៉ាងណា ការធ្វើសមយុទ្ធយោធានៅពេលនេះ វាបានមកបន្ថែមការព្រួយបារម្ភកាន់តែខ្លាំង ទាក់ទិននឹងលទ្ធភាព នៃការឈ្លានពានអ៊ុយក្រែន ពីសំណាក់រុស្ស៊ី។
ចុះផ្សាយនៅថ្ងៃ៖
ស្តាប់ - ០២:១០
នៅតាមរលកធាតុអាកាសវិទ្យុបារាំង France Inter នៅព្រឹកថ្ងៃព្រសហ្បតិ៍ទី១០កុម្ភៈ លោក ហ្សង់អ៊ីវ ឡឺឌ្រីយ៉ង់ រដ្ឋមន្ត្រីការបរទេសបារាំងបានលើកឡើងថា បើពិនិត្យឲ្យល្អិតល្អន់ស្តីពីការធ្វើសមយុទ្ធយោធារួមគ្នា រវាងកងទ័ពបេឡារុស និងកងទ័ពរុស្ស៊ី គឺយើងអាចចាត់ទុកបានថា នេះវាគឺជាកាយវិការមួយ ដ៏សែនហិង្សា។
លោករដ្ឋមន្ត្រីបារាំងរូបនេះ បានសង្កត់បន្ថែមថា សមយុទ្ធយោធានេះ មានរយៈពេលដល់ទៅ១០ថ្ងៃ ហើយធ្វើឡើងនៅភាគខាងត្បូងបេឡារុស ដែលទីតាំងខ្លះ គឺនៅជាប់ព្រំដែនអ៊ុយក្រែនតែម្តង។ ទោះជាយ៉ាងនេះក្តី លោកហ្សង់អ៊ីវ ឡឺឌ្រីយ៉ង់ បានបញ្ជាក់ថា ភាគីបារាំង ក៏ដូចជាក្រុមប្រទេសលោកខាងលិច កំពុងរងចាំតាមដានមើល ថាតើក្រោយការបិទបញ្ចប់សមយុទ្ធទ្រង់ទ្រាយធំនៅថ្ងៃទី២០កុម្ភៈ តើរុស្ស៊ី និងបេឡារុស នឹងដកទ័ពថយទៅចូលបន្ទាយវិញដែរ ឬទេ!
គួរបញ្ជាក់ថា យោងតាមលិខិតប្រកាសរបស់ក្រសួងការពារជាតិរុស្ស៊ី សមយុទ្ធយោធានេះ មានកម្មវត្ថុការពារខ្លួន និងត្រៀមរុញច្រានសត្រូវ ក្នុងករណីមានការឈ្លានពានពីខាងក្រៅ។ តែយ៉ាងណា ក្រៅតែពីបញ្ជាក់ថា មានការប្រើប្រព័ន្ធខែលមីស៊ីល S-400 ទាំងខាងរុស្ស៊ី ទាំងខាងបេឡារុស មិនបានឲ្យដឹងថា មានទាហានប៉ុន្មានចូលរួមទេ។ បើតាមប្រភពពីប្រទេសលោកខាងលិច គឺយ៉ាងហោចណាស់ មានទាហានរុស្ស៊ីចំនួន៣ម៉ឺននាក់ ចូលរួមក្នុងប្រតិបត្តិការសមយុទ្ធដ៏ធំនេះ។
នៅព្រឹកថ្ងៃព្រហស្បតិ៍នេះ លោក Volodymyr Zelensky ប្រធានាធិបតីអ៊ុយក្រែន បានចេញលិខិតប្រកាសមួួយ ដោយបានលើកឡើងថា ការបង្កើនកម្លាំងទ័ពនៅក្បែរព្រំដែនរបស់អ៊ុយក្រែន វាគឺជាមធ្យោបាយដាក់សំពាធផ្លូវចិត្ត សតិអារម្មណ៍ ពីសំណាក់ប្រទេសជិតខាង មកលើអ៊ុយក្រែន។
សូមរំលឹកថា កាលពីដើមសប្តាហ៍នេះ លោកម៉ាក្រុង ប្រធានាធិបតីបារាំង បានទៅជួបនិយាយគ្នាដោយផ្ទាល់ ជាមួយលោកពូទីន នៅឯក្រុងម៉ូស្គូ។ ក្នុងជំនួបមួយទល់មួយ រយៈពេល៥ម៉ោងនោះ លោកពូទីន បានសន្យានឹងលោកម៉ាក្រុងថានឹងមិនធ្វើអ្វីឲ្យស្ថានការណ៍ ទៅជាធ្ងន់ធ្ងរជាងនេះឡើយ។ តែយ៉ាងណា សកម្មភាពសមយុទ្ធយោធារវាងរុស្ស៊ី និងបេឡារុស នៅពេលនេះ ហាក់បង្ហាញថា លោកពូទីននៅតែបន្តសង្កត់អ៊ុយក្រែន និងក្រុមប្រទេសលោកខាងលិច តាមរយៈការប្រើកម្លាំងកំញើញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ