លោកពូទីនចេញក្រឹត្យតម្រូវឲ្យប្រទេសអមិត្តបង់ថ្លៃជាលុយរូប្លិ៍សម្រាប់ការទិញឧស្ម័នរុស្ស៊ី
លោកប្រធានាធិបតីរុស្ស៊ី វ្លាឌីមៀរ ពូទីន បានចុះហត្ថលេខា កាលពីថ្ងៃព្រហស្បតិ៍ទី៣១មីនា លើក្រឹត្យមួយ ដែលចាប់តម្រូវឲ្យក្រុមប្រទេសអមិត្តទូទាត់ជាលុយរូប្លិ៍ សម្រាប់ការទិញឧស្ម័នពីរុស្ស៊ី។ តាមក្រឹត្យប្រធានាធិបតីដែលចាប់ចូលជាធរមាន ពីថ្ងៃសុក្រទី ១មេសានេះតទៅ រាល់អ្នកដែលចង់ទិញឧស្ម័នរុស្ស៊ីត្រូវតែមានលុយរូប្លិ ទើបអាចទិញបាន។ វិធានការតម្រូវឲ្យប្រើលុយរូប្លិសម្រាប់ទិញឧស្ម័នរុស្ស៊ីនឹងប៉ះពាល់ដល់សហភាពអឺរ៉ុបដែលពឹងផ្អែកខ្លាំងជាងគេលើការទិញនាំចូលឧស្ម័នរុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥០
ថ្លែងតាមកញ្ចក់ទូរទស្សន៍ជាតិរុស្ស៊ី នៅក្រោយការចុះហត្ថលេខាលើក្រឹត្យប្រធានាធិបតី លោកវ្លាឌីមៀរ ពូទីនបានប្រកាសថា គិតចាប់តាំងពីថ្ងៃសុក្រទី១មេសានេះ ក្រុមប្រទេសដេលមិនមែនជាមិត្តរបស់រុស្ស៊ី ត្រូវតែបង់ថ្លៃជាលុយរូប្លិ៍ សម្រាប់ការទិញឧស្ម័នរុស្ស៊ី។
តាមលក្ខខណ្ឌដែលមានចែងនៅក្នុងក្រឹត្យប្រធានាធិបតី រុស្ស៊ី អ្នកទិញមកពីបណ្តាប្រទេសដែលជាអមិត្តរបស់រុស្ស៊ី ត្រូវបង្កើតគណនី នៅធនាគាររុស្ស៊ី ដូចជាGazprom ជាដើម ដែលជាសាខាមួយរបស់ក្រុមហ៊ុនលក់ឧស្ម័នរុស្ស៊ី Gazprom។ អ្នកទិញឧស្ម័នរុស្ស៊ី ត្រូវបញ្ជូនលុយជារូបិយបណ្ណបរទេស ដែលអាចជាដុល្លារ ឬលុយអឺរ៉ូទៅក្នុងធនាគារGazprom ដែលជាអ្នកទទួលបន្ទុក ប្តូរលុយបរទេស ឲ្យទៅជាលុយរូប្លិ៍ រូបិយបណ្ណរុស្ស៊ី ដើម្បីឲ្យអ្នកទិញអាចយកទៅប្រើ បង់ថ្លៃឧស្ម័ន ដែលទិញក្រុមហ៊ុនរុស្ស៊ី។
លោកប្រធានាធិបតីពូទីនបានបញ្ជាក់កាលពីថ្ងៃព្រហស្បតិ៍ថា រុស្ស៊ីនឹងមិនដើរតួជាសុប្បរសជន។ “គ្មានអ្នកណាម្នាក់ដែលលក់ ដោយឥតគិតលុយនោះទេ។ បើសិនអ្នកទិញ មិនព្រមប្រើលុយរូប្លិ៍ទេ នោះរុស្ស៊ីនឹងមិនបង្ហូរ លក់ឧស្ម័ន។ ដូច្នេះ កិច្ចសន្យាដែលមានកន្លងមក នឹងត្រូវចាត់ទុកជាមោឃៈ។”
តាមលោកពូទីន ការតម្រូវឲ្យបង់ជាលុយរូប្លិ៍សម្រាប់ការទិញឧស្ម័នរុស្ស៊ី នឹងមិនទៅប៉ះពាល់ដល់បរិមាណ តម្លៃ ឧស្ម័នដែលមាននៅក្នុងកិច្ចសន្យានោះឡើយ ប៉ុន្តែ ផ្ទុយទៅវិញ វានឹងជួយពង្រឹងអធិបតេយ្យភាពរបស់រុស្ស៊ីនៅចំពោះមុខការដាក់ទណ្ឌកម្មសេដ្ឋកិច្ច ដែលប្រទេសលោកខាងលិចបានដាក់លើរុស្ស៊ី ដោយសារប្រតិបត្តិការយោធានៅអ៊ុយក្រែន។
វិធានការចាប់តម្រូវឲ្យទូទាត់ជាលុយរូប្លិ៍ សម្រាប់ការទិញឧស្ម័នរុស្ស៊ីនឹងទៅធ្វើឲ្យតម្លៃលុយរូប្លិ៍ កើនឡើងវិញ បន្ទាប់ពីធ្លាក់ចុះខ្លាំង ដោយសារទណ្ឌកម្មសេដ្ឋកិច្ចរបស់ប្រទេសលោកខាងលិច នៅចុងខែកុម្ភៈ។
នៅដើមខែមីនា រុស្ស៊ីធ្លាប់បានបញ្ចេញបញ្ជីឈ្មោះក្រុមប្រទេសអមិត្ត ដែលបានដាក់ទណ្ឌកម្មលើរុស្ស៊ី ដែលមានដូចជាអាមេរិក ប្រទេសសមាជិកសហភាពអឺរ៉ុប អង់គ្លេស ជប៉ុន កាណាដា តៃវ៉ាន់ ស្វ៊ីស កូរ៉េខាងត្បូង ន័រវែស និងអូទ្រីស។ ក្រុមប្រទេស ទិញឧស្ម័នពីរុស្ស៊ីធ្លាប់បានបង្ហាញជំហរប្រឆាំងនឹងការប្រើលុយរូប្លិសម្រាប់ទិញឧស្ម័ន។
នៅក្នុងសន្និសីទរួមជាមួយប្រធានាធិបតីបារាំង កាលពីថ្ងៃព្រហស្បតិ៍ នាយករដ្ឋមន្រ្តីរបស់ប្រទេសអាល្លឺម៉ង់ ដែលជាអ្នកទិញឧស្ម័នច្រើនជាងគេពីរុស្ស៊ី បានបញ្ជាក់ថា អាល្លឺម៉ង់នឹងមិនទទួលយកលក្ខខណ្ឌថ្មីរបស់រុស្ស៊ី និងថា ក្រុមហ៊ុនអាល្លឺម៉ង់ នៅតែបន្តបង់ជាលុយអឺរ៉ូ ឬដុល្លារសម្រាប់ទិញឧស្ម័នរុស្ស៊ី ដូចដែលមានចែងនៅក្នុងកិច្ចសន្យា។
ដោយបារម្ភខ្លាចថា រុស្ស៊ីនឹងអាចកាត់ផ្តាច់គ្រប់ពេលវេលា ការលក់បង្ហូរឧស្ម័ន មកអឺរ៉ុប ទាំងអាល្លឺម៉ង់ និងប្រទេសអឺរ៉ុបផ្សេងទៀត បានប្រកាសជាបន្តបន្ទាប់ ផែនការបន្ទាន់ដើម្បីត្រៀមដោះស្រាយបញ្ហាខ្វះខាតថាមពលនៅក្នុងប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ