លោកប្រធានាធិបតីឥណ្ឌូណេស៊ី អញ្ជើញលោកពូទីន និងលោកហ្សេឡេនស្គី ជួបគ្នានៅជំនួបកំពូលG20
ឥណ្ឌូណេស៊ីដែលជាប្រធានវិលជុំ នៃក្រុមប្រទេសសេដ្ឋកិច្ចនាំមុខ G20 នឹងត្រូវរៀបចំជំនួបកំពូល នៅកោះបាលី នៅរវាងខែវិច្ឆិកាខាងមុខ។ លោក ចូកូ វីដូដូ ប្រធានាធិបតីឥណ្ឌូណេស៊ី បានបញ្ជាក់កាលពីថ្ងៃសុក្រម្សិលមិញថា លោកបានអញ្ញើញលោក វ្លូឌីមៀរ ហ្សេឡេនស្គី ឲ្យចូលរួមជំនួបកំពូលG20 ដែរ ដើម្បីបានជួបគ្នាជាមួយលោកប្រធានាធិបតីពូទីន។
ចុះផ្សាយនៅថ្ងៃ៖
ស្តាប់ - ០១:៥៥
យោងតាមការអះអាងរបស់លោក ចូកូ វីដូដូ ប្រធានាធិបតីឥណ្ឌូណេស៊ី គឺលោក វ្លាឌីមៀរ ពូទីន ប្រធានាធិបតីរុស្ស៊ី នឹងមានវត្តមាននៅក្នុងជំនួបកំពូល G20 នៅកោះបាលី នាខែវិច្ឆិកាចុងឆ្នាំនេះ។ លោក ចូកូ វីដូដូ បានអះអាងទៀតថា លោកបានអញ្ជើញលោក វ្លូឌីមៀរ ហ្សេឡេនស្គី ឲ្យចូលរួមក្នុងជំនួបកំពូលនេះដែរ បើទោះបីអ៊ុយក្រែន មិនមែនជាប្រទេសសមាជិករបស់ G20 ក៏ដោយ។
នៅក្នុងសារលើ Twitter លោកវ្លូឌីមៀរ ហ្សេឡេនស្គី បានលើកឡើងថា លោកប្រធានាធិបតីឥណ្ឌូណេស៊ី ពិតជាបានអញ្ជើញរូបលោកមែន តាមរយៈការនិយាយទូរស័ព្ទជាមួយគ្នា កាលពីថ្ងៃពុធ។ ហើយនៅថ្ងៃព្រហស្បតិ៍ លោកប្រធានាធិបតីឥណ្ឌូណេស៊ី ក៏បានទូរស័ព្ទទៅនិយាយជាមួយលោកពូទីនដែរ ដោយលោកពូទីន បានអរគុណចំពោះការប្រឹងប្រែងរបស់ឥណ្ឌូណេស៊ី។
គួរបញ្ជាក់ថា ក្រោយថ្ងៃទី ២៤កុម្ភៈ នៅពេលដែលរុស្ស៊ីបានបើកប្រតិបត្តិការធ្វើសង្គ្រាមនៅអ៊ុយក្រែន ក្រុមប្រទេសលោកខាងលិច បានព្យាយាមរកគ្រប់មធ្យោបាយ ដើម្បីដាក់រុស្ស៊ីឲ្យនៅឯកោលើឆាកអន្តរជាតិ។ តាមប្រភពស្និទ្ធនឹងរដ្ឋាភិបាលឥណ្ឌូណេស៊ី គឺសហរដ្ឋអាមេរិកបានចេញមុខ ដាក់សំពាធឲ្យឥណ្ឌូណេស៊ី ត្រូវតែហាមឃាត់ កុំឲ្យរុស្ស៊ីមានមុខនៅក្នុងកិច្ចប្រជុំនានារបស់ G20។ កិច្ចប្រជុំថ្នាក់រដ្ឋមន្ត្រីហិរញ្ញវត្ថុ G20 កាលពីដើមខែមេសានេះ បានបង្ហាញអំពីការបែកបាក់ជាខ្លាំង ដោយក្រុមប្រទេសលោកខាងលិច បានធ្វើពហិកា មិនចូលប្រជុំ នៅពេលមានវត្តមានរបស់តំណាងរដ្ឋាភិបាលរុស្ស៊ី។
តែយ៉ាងណា លោកចូកូ វីដូដូ បានមានៈ មិនចាត់វិធានការហាមឃាត់វត្តមានរុស្ស៊ីទេ ដោយលើកឡើងអំពីហេតុផល « អព្យាក្រិត្យភាព » របស់ឥណ្ឌូណេស៊ី។ ទន្ទឹមគ្នានេះ លោកប្រធានាធិបតីឥណ្ឌូណេស៊ី បានព្យាយាមអញ្ជើញអ៊ុយក្រែន ឲ្យមានវត្តមានដែរ ដើម្បីឲ្យមានតុល្យភាព។ ក្រៅពីឥណ្ឌូណេស៊ី តួកគី ក៏កំពុងប្រឹងប្រែងណាស់ដែរ ដើម្បីបើកផ្លូវឲ្យមានការចរចា នឹងជំនួបរវាងលោកពូទីន និងលោកហ្សេឡេនស្គី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ