ទីភ្នាក់ងារចារកិច្ចហូឡង់ បានរារាំងមិនឲ្យចារកិច្ចរុស្ស៊ី បន្លំចូលធ្វើការនៅតុលាការព្រហ្មទណ្ឌអន្តរជាតិ
ទីភ្នាក់ងារស៊ើបការណ៍សំងាត់ប្រទេសហូឡង់ បានប្រកាសថា ខ្លួនបានរារាំងទាន់ពេលវេលា កាលពីខែមេសាកន្លងទៅ មិនឲ្យមន្ត្រីចារកិច្ចរុស្ស៊ីម្នាក់ បន្លំចូលមកធ្វើការ នៅក្នុងតុលាការព្រហ្មទណ្ឌអន្តរជាតិ ទីក្រុងឡាអេ។ តុលាការព្រហ្មទណ្ឌអន្តរជាតិ ដែលកំពុងតែបើកការស៊ើបអង្កេត ស្តីពីឧក្រិដ្ឋកម្មសង្គ្រាមធ្វើឡើងដោយកងទ័ពរុស្ស៊ី នៅអ៊ុយក្រែន។
ចុះផ្សាយនៅថ្ងៃ៖
ស្តាប់ - ០១:៥៦
ជនឈ្មោះ Sergey Vladimirovitch Cherkasov អាយុ៣៦ បានបន្លំប្រើប្រាស់ឯកសារអត្តសញ្ញាណក្លែងក្លាយ ជាជនជាតិប្រេស៊ីល ដើម្បីធ្វើដំណើរពីប្រេស៊ីល មកកាន់ប្រទេសហូឡង់។ ជននេះ បានដាក់ពាក្យសុំចូលធ្វើកម្មសិក្សា នៅក្នុងតុលាការព្រហ្មទណ្ឌអន្តរជាតិទីក្រុងឡាអេ។
នៅខែមេសា ទីភ្នាក់ងារស៊ើបការណ៍សំងាត់ហូឡង់ បានតាមដានដឹងទាន់ពេលវេលា ថាជននេះជាមនុស្សធ្វើការឲ្យទីភ្នាក់ងារចារកិច្ចរុស្ស៊ី ហើយបានជូនដំណឹងទៅកាន់ការិយាល័យអន្តោប្រវេសន៍ ដើម្បីរារាំង ហាមឃាត់មិនឲ្យជននេះ ធ្វើដំណើរមកហូឡង់។ ទីភ្នាក់ងារស៊ើបការណ៍សំងាត់ហូឡង់ ក៏បានជូនដំណឹងនេះ ទៅកាន់តុលាការព្រហ្មទណ្ឌអន្តរជាតិទីក្រុងឡាអេផងដែរ។
គួរបញ្ជាក់ថា ការិយាល័យអគ្គរដ្ឋអាជ្ញា នៃតុលាការព្រហ្មទណ្ឌអន្តរជាតិក្រុងឡេអេ បានចាប់ផ្តើមបើកការស៊ើបអង្កេត ស្តីពីឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ ដែលគេសង្ស័យថាកងទ័ពរុស្ស៊ីបានធ្វើនៅអ៊ុយក្រែន ក្រោយការវាយលុកចូលឈ្លានពាន នៅថ្ងៃទី២៤កុម្ភៈ។ ថ្វីត្បិត រុស្ស៊ី និងអ៊ុយក្រែន មិនមែនជាសមាជិកតុលាការព្រហ្មទណ្ឌអន្តរជាតិមែន តែអ៊ុយក្រែន បានប្រកាសទទួលស្គាល់យុត្តាធិការរបស់តុលាការនេះ ។
កាលពីខែឧសភាកន្លងទៅ លោក Karim Khan អគ្គរដ្ឋអាជ្ញានៃតុលាការព្រហ្មទណ្ឌអន្តរជាតិ បានលើកឡើងថា រុស្ស៊ី ត្រូវតែសហការ នៅក្នុងការស៊ើបអង្កេតនេះ ក្នុងនាមរុស្ស៊ីដែលត្រូវភាគីជាប់សង្ស័យ ថាបានប្រព្រឹត្តិឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិនៅអ៊ុយក្រែន។
យ៉ាងណាក៏ដោយ ភាគីរុស្ស៊ីបានអះអាងថា ការចោទប្រកាន់ទាំងអម្បាលម៉ាន ពីសំណាក់អ៊ុយក្រែន គឺជាចោទមួរបង្កាច់។ ផ្ទុយទៅវិញ គឺលោកប្រធានាធិបតីពូទីនទេ ដែលបានធ្វើរឿងត្រឹមត្រូវសមហេតុផល បើកប្រតិបត្តិការកងទ័ពពិសេសនៅអ៊ុយក្រែន ដើម្បីបិទបញ្ចប់អំពើប្រល័យពូជសាសន៍ ដែលអ៊ុយក្រែនធ្វើទៅលើប្រជាជននិយាយភាសារុស្ស៊ី នៅតំបន់ដុនបាស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ