រុស្ស៊ីបាញ់មីស៊ីល៤គ្រាប់លើទីក្រុងកៀវ ហើយសន្យាប្រគល់មីស៊ីលនុយក្លេអ៊ែរឲ្យទៅបេឡារុស
ខណៈដែលកិច្ចប្រជុំ G7 កំពុងតែត្រៀមបើកទ្វារនៅប្រទេសអាល្លឺម៉ង់ ដើម្បីនិយាយពីបញ្ហាសង្គ្រាមនៅអ៊ុយក្រែន ស្រាប់តែនៅវេលាទាបភ្លឺ ព្រឹកថ្ងៃអាទិត្យនេះ រុស្ស៊ីបានបាញ់ប្លោង គ្រាប់មីស៊ីល ចំនួន៤គ្រាប់ មកចំកណ្តាលទីក្រុងកៀវ។ រដ្ឋាភិបាលអ៊ុយក្រែន បានចាត់ទុកថា នេះគឺជាទង្វើគំរាមសំឡុតមកលើអ៊ុយក្រែន ពីសំណាក់រុស្ស៊ី ខណៈដែលជំនួបកំពូលអូតង់ កានតែខិតជិតមកដល់។ ជាងនេះទៀត លោកពូទីន ទើបតែបានប្រកាសថា រុស្ស៊ីនឹងផ្តល់ប្រព័ន្ធមីស៊ីលអាចបំពាក់ក្បាលគ្រាប់នុយក្លេអ៊ែរ ទៅឲ្យបេឡារុស។
ចុះផ្សាយនៅថ្ងៃ៖
ស្តាប់ - ០២:០៨
យោងតាមអ្នកយកព័ត៌មានបារាំង AFP ដែលស្ថិតនៅផ្ទាល់ក្នុងទីក្រុងកៀវ ផ្សែងខ្មៅបានអណ្តែតឡើង ក្រោយមានសំឡេងផ្ទុះបានបន្លឺឡើងចំនួន៤ដង នៅកណ្តាលទីក្រុងកៀវ នាវេលាព្រឹកថ្ងៃអាទិត្យទី២៦មិថុនា ម៉ោងប្រមាណ៦ និង៣០នាទី។
យោងតាមលោក Vitaly Klitschko អភិបាលទីក្រុងកៀវ បានសរសេរ លើTelegram ថា គិតត្រឹមពេលនេះមានមនុស្សរបួស២នាក់ ហើយក្រុមសង្គ្រោះកំពុងតែប្រឹងប្រែងជួយស្រង់មនុស្ស ចេញពីគំនរបាក់បែក។ គ្រាប់មីស៊ីលរបស់រុស្ស៊ី បានកំទេចអាគារ៩ជាន់មួយកន្លែង និងបានបង្កជាអគ្គីភ័យឆាបឆេះ។ មីស៊ីលរុស្ស៊ីមួយគ្រាប់ ត្រូវបានប្រព័ន្ធខែលមីស៊ីលអ៊ុយក្រែន ស្ទាក់កំទេចបាន ហើយផ្ទុះធ្លាក់បំណែកទៅលើភូមិមួយជាយទីក្រុងកៀវ។ ដោយឡែក បើផ្អែកតាមលោក Oleksiï Gontcharenko សមាជិកសភាអ៊ុយក្រែនម្នាក់ បានឲ្យដឹងថា យ៉ាងហោចណាស់ រុស្ស៊ីបានបាញ់មីស៊ីលចំនួន១៤គ្រាប់ សំដៅទៅទីក្រុងកៀវ និងតំបន់ជុំវិញ។
គួរបញ្ជាក់ថា ក្រុមប្រទេសសេដ្ឋកិច្ចនាំមុខ G7 នឹងបើកជំនួបកំពូលនៅប្រទេសអាល្លឺម៉ង់ នៅថ្ងៃទី២៦មិថុនានេះ ដោយមានវត្តមានចូលរួមរបស់លោក ប្រធានាធិបតីអ៊ុយក្រែន វ្លូឌីមៀរ ហ្សេឡេនស្គីផងដែរ។ លោកអភិបាលទីក្រុងកៀវ បានលើកឡើងថា ការបាញ់មីស៊ីលមកលើទីក្រុងកៀវនាពេលនេះ គឺជាចេតនាគំរាមសំឡុត ពីសំណាក់រុស្ស៊ី ខណៈដែលអ៊ុយក្រែននឹងចូលរួមកិច្ចប្រជុំអូតង់ នៅថ្ងៃទី២៨មិថុនាខាងមុខនេះ។
គួរកត់សំគាល់ថា នៅសមរភូមិភាគខាងកើតអ៊ុយក្រែន កងទ័ពរុស្ស៊ីកំពុងតែមានប្រៀបខ្លាំង រុលចូលដណ្តើមបានដែនដីកាន់តែធំ។ ផ្អែកតាមក្រសួងការពារជាតិរុស្ស៊ី លោក Sergueï Choïgou រដ្ឋមន្ត្រីការពារជាតិរុស្ស៊ីបានធ្វើដំណើរទៅភាគខាងកើតអ៊ុយក្រែន ដើម្បីត្រួតពិនិត្យកម្លាំង។ ដោយឡែក កាលពីថ្ងៃសៅរ៍ម្សិលមិញ ក្នុងជំនួបមួយនៅទីក្រុងសាំងប៉េតេសបួរ លោកពូទីន បានប្រាប់ទៅលោកលូកាឆិនកូ ប្រធានាធិបតីបេឡារុស ថារុស្ស៊ីនឹងប្រគល់ប្រព័ន្ធបាញ់មីស៊ីល ដែលអាចបំពាក់ក្បាលគ្រាប់នុយក្លេអ៊ែរ ទៅឲ្យបេឡារុស។ ការប្រកាស ដែលភាគីអ៊ុយក្រែន ចាត់ទុកថា រុស្ស៊ីកំពុងតែចង់អូសទាញបេឡារុសឲ្យចូលរួមនៅក្នុងសង្គ្រាមនេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ