G7 ប្រកាសគម្រោងវិនិយោគហេដ្ឋារចនាសម្ព័ន្ធ ៦០០ពាន់លានដុល្លារ ដើម្បីប្រជែងជាមួយចិន
កាលពីថ្ងៃអាទិត្យ នៅក្នុងអំឡុងជំនួបកំពូល នៅក្នុងប្រទេសអាល្លឺម៉ង់ ក្រុមប្រទេសមហាអំណាចឧស្សាហកម្មទាំង ៧ ហៅថា « G7 » បានប្រកាស អំពីគម្រោងប្រមូលទុន ៦០០ពាន់លានដុល្លារ ដើម្បីវិនិយោគទៅលើហេដ្ឋារចនាសម្ព័ន្ធ នៅតាមបណ្តាប្រទេសកំពុងអភិវឌ្ឍ។ គម្រោងដែលគេមើលឃើញថា ជាការព្យាយាមប្រកួតប្រជែងជាមួយនឹងគម្រោង “ផ្លូវមួយខ្សែក្រវាត់មួយ” របស់ចិន។
ចុះផ្សាយនៅថ្ងៃ៖
ស្តាប់ - ០២:២០
គម្រោង ដែលក្រុមប្រទេស G7 ប្រកាសឲ្យដឹង កាលពីថ្ងៃអាទិត្យកន្លងទៅនេះ មានឈ្មោះថា « Partnership for Global Infrastructure and Investment” (PGII) ជាគម្រោងដែលផ្តួចផ្តើមគំនិតឡើង តាំងពីក្នុងអំឡុងជំនួបកំពូលនៅអង់គ្លេស កាលពីឆ្នាំទៅមិញ ក៏ប៉ុន្តែ ទើបតែនៅពេលនេះ ដែលប្រទេសមហាអំណាចឧស្សាហកម្មទាំង ៧ បូករួមជាមួយសហភាពអឺរ៉ុប បានឯកភាពគ្នា លើទំហំទុនវិនិយោគ គឺ ៦០០ពាន់លានដុល្លារ នៅក្នុងរយៈពេល ៥ឆ្នាំខាងមុខ។
នៅក្នុងទុនវិនិយោគទាំង ៦០០ពាន់លានដុល្លារនេះ ២០០ពាន់លានដុល្លារ (១ភាគ៣) បានមកពីសហរដ្ឋអាមេរិក ហើយ ៤០០ពាន់លានដុល្លារបានមកពីប្រទេសផ្សេងទៀតក្នុងក្រុម G7។
ទុននេះនឹងត្រូវវិនិយោគនៅតាមបណ្តាប្រទេសដែលមានចំណូលទាប និងមធ្យម ដោយផ្តោតលើគម្រោងហេដ្ឋារចនាសម្ព័ន្ធក្នុងវិស័យអាទិភាពមួយចំនួន រួមមានជាអាទិ៍ គម្រោង ដែលមានទិសដៅប្រយុទ្ធប្រឆាំងនឹងការប្រែប្រួលអាកាសធាតុ, កែលម្អប្រព័ន្ធសុខាភិបាល, សមភាពខាងយែនឌ័រ និងហេដ្ឋារចនាសម្ព័ន្ធឌីជីថល។
ថ្វីដ្បិតតែក្រុមប្រទេស G7 មិនបាននិយាយចំៗឈ្មោះចិន ក៏ប៉ុន្តែ គេអាចមើលឃើញបានថា គម្រោងវិនិយោគនេះ គឺមានគោលដៅប្រជែងជាមួយនឹងគម្រោង “ផ្លូវមួយខ្សែក្រវាត់មួយ” របស់ចិន ដោយលោកចូ បៃដិនបានលើកឡើងថា តាមរយៈគម្រោងវិនិយោគថ្មីនេះ ប្រទេសកំពុងអភិវឌ្ឍនឹងអាចមើលឃើញដោយខ្លួនឯង អំពីផលប្រយោជន៍ដែលទទួលបានពីការចាប់ដៃគូជាមួយនឹងប្រទេសប្រជាធិបតេយ្យ។
លោកស្រី អួរស៊ូឡា វ៉ុនឌែរ ឡេយែន ប្រធានគណៈកម្មការអឺរ៉ុបវិញ ក៏បានបញ្ជាក់បន្ថែមផងដែរថា គោលដៅនៃគម្រោងវិនិយោគនេះ គឺចង់បង្ហាញឲ្យប្រទេសកំពុងអភិវឌ្ឍឃើញថា ពួកគេមិនមែនមានជម្រើសតែមួយនោះទេ ក៏ប៉ុន្តែ អាចមានជម្រើសច្រើន នៅក្នុងការចាប់ដៃគូវិនិយោគទៅលើហេដ្ឋារចនាសម្ព័ន្ធក្នុងប្រទេសរបស់ពួកគេ។
គួរបញ្ជាក់ថា ខុសពីគម្រោងផ្លូវមួយខ្សែក្រវាត់មួយ ដែលទុនវិនិយោគមានប្រភពពីរដ្ឋ ឬស្ថាប័នហិរញ្ញវត្ថុរបស់រដ្ឋចិន គម្រោងវិនិយោគរបស់ក្រុមប្រទេស G7 នេះវិញ មានប្រភពហិរញ្ញវត្ថុពីក្រុមហ៊ុនឯកជន។ នេះមានន័យថា ទុនវិនិយោគអាចនឹងពិបាកទទួលបានជាគម្រោងរបស់ចិន ក៏ប៉ុន្តែ ក្នុងពេលជាមួយគ្នា បើយោងតាមមន្រ្តីរដ្ឋាភិបាលអាមេរិក ការផ្តល់ទុនវិនិយោគដោយមានការប្រយ័ត្នប្រយែង និងការពិនិត្យពិច័យច្បាស់លាស់បែបនេះ វាអាចជួយ កុំប្រទេសកំពុងអភិវឌ្ឍត្រូវធ្លាក់ទៅក្នុងអន្ទាក់បំណុល រហូតអាចនឹងត្រូវបង្ខំចិត្តប្រគល់ហេដ្ឋារចនាសម្ព័ន្ធទៅឲ្យម្ចាស់បំណុលគ្រប់គ្រង ដូចជានៅក្នុងគម្រោងរបស់ចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ