គណៈកម្មការអូឡាំពិកបង្កើនជំនួយមួយជាបីដល់កីឡាករអ៊ុយក្រែន
គណៈកម្មការអូឡាំពិក នឹងបង្កើនជំនួយហិរញ្ញវត្ថុ មួយជាបី ដល់កីឡាអូឡាំពិកអ៊ុយក្រែន ដើម្បីឱ្យកំរិតសមត្ថភាពរបស់កីឡាករប្រទេសនេះ នៅខ្ពស់ត្រដែត នាឱកាសប្រកួតកីឡាអូឡាំពិកក្រុងប៉ារីសឆ្នាំ២០២៤ និងកីឡាអូឡាំពិករដូវរងារឆ្នាំ២០២៦។ នេះបើតាមសេចក្តីប្រកាសរបស់ប្រធានគណៈកម្មការអូឡាំពិក CIO លោក Thomas Bach។
ចុះផ្សាយនៅថ្ងៃ៖
ក្នុងពេលកំពុងបំពេញទស្សនកិច្ចនៅក្រុងកៀវ លោក តូម៉ាស បាច្ស បានថ្លែងនៅចំពោះមុខប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡេស្គីថា គណៈកម្មការអូឡាំពិក គាំទ្រកីឡាករអ៊ុយក្រែន និងចង់ឃើញទង់ជាតិអ៊ុយក្រែន បក់ត្រដែត ក្នុងកម្មវិធីប្រកួតកីឡាអូឡាំពិកក្រុងប៉ារីស ឆ្នាំ២០២៤ និងកីឡាអូឡាំពិករដូវរងារឆ្នាំ២០២៤។ ហេតុដូច្នេះហើយបានជាគណៈកម្មការសម្រេចបង្កើនជំនួយហិរញ្ញវត្ថុសម្រាប់អ៊ុយក្រែនផ្ទាល់ ពី ២,៥លានដុល្លារគាលពី ពេលមុនរុស្ស៊ីចូលឈ្លានពាន ឱ្យឡើងដល់ ៧,៥លានដុល្លារអាមេរិក។ ជំនួយនេះជាវិភាគទានរបស់គណៈកម្មការអូឡាំពិកផ្ទាល់តែម្តង។ នេះបើតាមប្រសាសន៍របស់លោក តូម៉ាស បាច្ស ដែលបានគូសបញ្ជាក់បន្ថែមទៀតថា សន្និសីទនៃអ្នកផ្តល់ជំនួយកីឡាអូឡាំពិក ដែលចូលរួមដោយដៃគូ និងអ្នកជួយឧបត្ថម្ភគណៈកម្មការអូឡាំពិក នឹងប្រព្រឹត្តទៅនៅក្នុងឆ្នាំនេះ ដើម្បីជួយស្តារនិងស្ថាបនារចនាសម្ព័ន្ធកីឡារបស់អ៊ុយក្រែនឡើងវិញ។
ឆ្លៀតក្នុងឱកាសនោះ ប្រធានគណៈកម្មការអូឡាំពិក បានអះអាងទៀតថា មិនទាន់ដល់ពេលដែលគណៈកម្មការអូឡាំពិកត្រូវប្តូរផ្លាស់ជំហរ លើកអនុសាសន៍ដែលចង់ឱ្យសហព័ន្ធកីឡាអន្តរជាតិទាំងអស់ផាត់ កីឡាកររុស្ស៊ី និងបេឡារុស្ស៊ី ចេញពីគ្រប់ការប្រកួតកីឡាអន្តរជាតិទេ។
ជាមួយនឹងសារអបអរការគាំទ្ររបស់គណៈកម្មការអូឡាំពិក លោកប្រធានាធិបតីអ៊ុយក្រែនបាន ប្រកាសថា ការឈ្លានពានអ៊ុយក្រែនពីសំណាក់រុស្ស៊ី ជាការប៉ះទង្គិចយ៉ាងសាហាវខ្លាំងណាស់សម្រាប់ក្រុមកីឡាករអ៊ុយក្រែន ដែលបង្ខំចិត្តត្រូវកាន់អាវុធចូលសមរភូមិ ដើម្បីការពារប្រទេស។ កីឡាករ និងគ្រូបង្ហាត់កីឡា៨៩នាក់បានស្លាប់ ក្នុងសង្គ្រាមការពារទឹកដី និង១៣នាក់បានត្រូវបានរុស្ស៊ីចាប់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ