ទីភ្នាក់ងារAIEA៖ បច្ចេកវិទ្យាចម្រើនសារធាតុអ៊ុយរ៉ាញ៉ូមរបស់អ៊ីរ៉ង់កាន់តែបោះជំហានលឿនទៅមុខ
អ៊ីរ៉ង់បានបោះមួយជំហានបន្ថែមទៀត នៅក្នុងបច្ចេកវិទ្យាចម្រើនសារធាតុអ៊ុយរ៉ាញ៉ូម។ នេះជាកំណត់សំគាល់នៅក្នុងរបាយការណ៍របស់ទីភ្នាក់ងារថាមពលបរិមាណូអន្តរជាតិ ហៅកាត់ជាភាសាបារាំង ថា AIEA ដែលទីភ្នាក់ងារព័ត៌មានអង់គ្លេសReutersបានយកមកចុះផ្សាយ កាលពីថ្ងៃសៅរ៍។ នៅថ្ងៃអាទិត្យ ម្សិលមិញ អ៊ីរ៉ង់ តាមរយៈអ្នកនាំពាក្យរបស់ទីភ្នាក់ងារថាមពលអ៊ីរ៉ង់បាននិយាយចោទប្រកាន់ប្រព័ន្ធផ្សព្វផ្សាយបរទេសថា បានសរសេរបំប៉ោងដើម្បីគោលដៅអ្វីមួយ។ នៅក្រោយ ការចុះផ្សាយរបាយការណ៍របស់ទីភ្នាក់ងារ AIEA នាយករដ្ឋមន្រ្តីអ៊ីស្រាអែលបានអះអាងថា នៅក្នុងជំនួបជាមួយលោកប្រធានាធិបតីអាមេរិក ចូ បៃដិន នៅថ្ងៃអង្គារស្អែក លោកនឹងទាមទារឲ្យមានការដាក់ទណ្ឌកម្មអន្តរជាតិឡើងវិញ ទៅលើអ៊ីរ៉ង់ ក្នុងបទរំលោភកិច្ចព្រមព្រៀងនុយក្លេអ៊ែរឆ្នាំ ២០១៥។
ចុះផ្សាយនៅថ្ងៃ៖
ស្តាប់ - ០២:២៦
របាយការណ៍របស់ទីភ្នាក់ងារថាមពលបរិមាណូអន្តរជាតិ AIEA បានបង្ហាញថា អ៊ីរ៉ង់បានសម្រុក បង្កើនការចម្រើនធាតុអ៊ុយរ៉ាញ៉ូម នៅមជ្ឈមណ្ឌលក្រោមដីភ្នំ នៅFordo ជាទីដែល អ៊ីរ៉ង់បានរំលោភកិច្ចព្រមព្រៀង ម្តងហើយ កាលពីឆ្នាំ ២០២១ ដោយបានប្រកាសចាប់ផ្តើមឡើងវិញ សកម្មភាពចម្រើនធាតុអ៊ុយរ៉ាញ៉ូម កម្រិត ២០%។
នៅថ្ងៃសៅរ៍ ទីភ្នាក់ងារថាមពលនុយក្លេអ៊ែរអន្តរជាតិបានកត់សំគាល់ឃើញថា នៅមជ្ឈមណ្ឌលក្រោមដី Fordo អ៊ីរ៉ង់ទើបចាប់ផ្តើមប្រើបច្ចេកវិទ្យាទំនើបថ្មីចុងក្រោយមួយទៀត ដើម្បីចម្រើនធាតុអ៊ុយរ៉ាញ៉ូម។ បច្ចេកវិទ្យាថ្មី ដែលមានការតភ្ជាប់បណ្តាក់គ្នា នូវម៉ាស៊ីនសម្រាប់ចម្រើនធាតុអ៊ុយរ៉ាញ៉ូមនឹងជួយឲ្យអ៊ីរ៉ង់អាចបង្កើន ការបន្សុទ្ធធាតុអ៊ុយរ៉ាញ៉ូម ក្នុងកម្រិតខ្ពស់ ដោយប្រសិទ្ធិភាព និងងាយស្រួល។
តាមរបាយការណ៍ ខាងលើ អ៊ីរ៉ង់បានជូនដំណឹងនេះទៅទីភ្នាក់ងារ AIEA នៅថ្ងៃទី ៧ កក្កដាប៉ុន្តែ AIEA ទើបស្រាវជ្រាវស្វែងយល់ នៅថ្ងៃទី ៩កក្កដាកន្លងទៅ។
អ្នកនាំពាក្យរបស់ទីភ្នាក់ងារថាមពលនុយក្លេអ៊ែរ លោកBehrouz Kamalvandi បានអះអាង នៅថ្ងៃអាទិត្យថា អ៊ីរ៉ង់ទើបបានប្រើជាលើកទី១ បច្ចេកវិទ្យាថ្មីនេះ កាលពីថ្ងៃសៅរ៍ ដើម្បី ចម្រើនធាតុអ៊ុយរ៉ាញ៉ូម ក្នុងកម្រិត ២០%។ វាជាបច្ចេកវិទ្យា សម្រាប់ចម្រើនធាតុអ៊ុយរ៉ាញ៉ូម ក្នុងដំណាក់កាលចុងក្រោយ ដែលមានន័យថា អ៊ីរ៉ង់មិនបានប្រើបច្ចេកវិទ្យាទំនើបថ្មីចុងក្រោយ ដើម្បី ចម្រើនធាតុអ៊ុយរ៉ាញ៉ូម ឲ្យលើសពីកម្រិត២០%។
អ៊ុយរ៉ាញ៉ូមបន្សុទ្ធដល់កម្រិត ២០% នេះ គឺនៅឆ្ងាយនៅឡើយ ពីកម្រិត ៩០%។ ប៉ុន្តែ នៅឆ្នាំ ២០២១ អ៊ីរ៉ង់ធ្លាប់បានលួចចម្រើនធាតុអ៊ុយរ៉ាញ៉ូម ដល់កម្រិត ៦០% ពោលគឺមិនឆ្ងាយប៉ុន្មាន ពីកម្រិត៩០% ដែលគេអាចប្រើសម្រាប់ផលិតគ្រាប់បែកនុយក្លេអ៊ែរ។
ក្រៅពីបង្កើនបរិមាណស្តុកធាតុអ៊ុយរ៉ាញ៉ូម ដែលបន្សុទ្ធក្នុងកម្រិតខ្ពស់ដែលផ្ទុយនឹងកិច្ចព្រមព្រៀង អ៊ីរ៉ង់នៅបានកាត់ផ្តាច់ខ្សែកាម៉េរ៉ារបស់ ទីភ្នាក់ងារAIEA នៅតាមមជ្ឈមណ្ឌលនុយក្លេអ៊ែររបស់ខ្លួន ដើម្បី សងសឹកនឹងសេចក្តីសម្រេចថ្កោលទោស របស់AIEA កាលពីខែមិថុនា។ ទីភ្នាក់ងាររបស់អង្គការសហប្រជាជាតិមួយនេះបានព្រមានហើយថា បើសិនអ៊ីរ៉ង់នៅតែកាត់ផ្តាច់ការថតតាមដានសកម្មភាពនៅរោងចក្រនុយក្លេអ៊ែររបស់អ៊ីរ៉ង់ នោះ ទីភ្នាក់ងារនឹងគ្មានលទ្ធភាពផ្តល់ទិន្នន័យជាក់ច្បាស់ទាក់ទងនឹងសកម្មភាពនុយក្លេអ៊ែររបស់អ៊ីរ៉ង់។
ដោយបង្កើនសកម្មភាពចម្រើនសារធាតុអ៊ុយរ៉ាញ៉ូម ក្នុងកម្រិតខ្ពស់ និងមិនព្រមសហការជាមួយ ទីភ្នាក់ងារAIEA ដែលជាការរំលោភកិច្ចព្រមព្រៀង អន្តរជាតិឆ្នាំ ២០១៥ អ៊ីរ៉ង់ចង់ដាក់សម្ពាធ ទាមទារឲ្យអាមេរិកដកទណ្ឌកម្មសេដ្ឋកិច្ច។ នៅមុនដំណើរទស្សនកិច្ចទៅកាន់តំបន់ដើមបូព៌ា នៅសប្តាហ៍នេះ លោកប្រធានាធិបតីអាមេរិក ចូ បៃដិនបាននិយាយហើយថា រដ្ឋបាលរបស់លោកនឹងដាក់សម្ពាធការទូត និងសេដ្ឋកិច្ច រហូតដល់អ៊ីរ៉ង់យល់ព្រមត្រលប់មកគោរពកិច្ចព្រមព្រៀងឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ