នាយករដ្ឋមន្រ្តីហុងគ្រីនិយាយការពារខ្លួន បន្ទាប់ពីបានរិះគន់សង្គមចម្រុះជាតិសាសន៍
នាយករដ្ឋមន្រ្តីហុងគ្រី លោកវិចទ័រ អរបាន បានទាក់ទាញ ការរិះគន់ បន្ទាប់ពីលោកថ្លែងសារប្រឆាំងនឹងការលាយជាតិសាសន៍ ដែលមិនមែនជាអឺរ៉ុប។ នៅក្នុងទស្សនកិច្ចទៅប្រទេសអូទ្រីស កាលពីថ្ងៃព្រហស្បតិ៍ម្សិលមិញ ប្រមុខរដ្ឋាភិបាលហុងគ្រីបាននិយាយការពារខ្លួន ដោយថា នៅហុងគ្រី ពាក្យខាងលើស្តែងពីការយល់ឃើញ ទៅលើផ្នែកវប្បធម៌ និងអរិយធម៌។ យ៉ាងណាក៏ដោយ ការនិយាយរិះគន់សង្គមចម្រុះជាតិសាសន៍របស់នាយករដ្ឋមន្រ្តីហុងគ្រី បានបង្កឲ្យមានប្រតិកម្មថ្កោលទោសពីក្រសួងការបរទេសអាមេរិក។
ចុះផ្សាយនៅថ្ងៃ៖
ស្តាប់ - ០២:១២
ទោះរំលងផុតទៅអស់សប្តាហ៍ សុន្ទរកថារើសអើងពូជសាសន៍របស់នាយករដ្ឋមន្រ្តីហុងគ្រី លោកវិចទ័រ អរបាន នៅតែបន្តទាក់ទាញប្រតិកម្មរិះគន់។ នៅក្នុងសន្និសីទកាសែតកាលពីថ្ងៃព្រហស្បតិ៍ អ្នកនាំពាក្យរបស់ក្រសួងការបរទេសអាមេរិកបានថ្កោលទោស វោហាសាស្រ្តរបស់ប្រមុខរដ្ឋាភិបាលហុងគ្រី នៅ ៧៥ឆ្នាំក្រោយការសម្លាប់ប្រល័យពូជសាសន៍ជនជាតិជ្វីហ្វថា ជារឿងដែលគេមិនអាចអត់ឱនទោសឲ្យបាន។
នៅថ្ងៃសៅរ៍សប្តាហ៍មុន លោកនាយករដ្ឋមន្រ្តីហុងគ្រី ជាតិនិយមជ្រុល ដែលចេញមុខប្រឆាំងជនអន្តោប្រវេសន៍ខ្លាំងជាងគេនៅអឺរ៉ុប បានឡើងនិយាយប្រឆាំងសង្គមចម្រុះជាតិសាសន៍ និងជាតិសាសន៍ ដែលមិនមែនជាអឺរ៉ុប។ “យើងមិនចង់បានសាសន៍ដែលលាយចូលគ្នាជាមួយសាសន៍ដែលមិនមែនអឺរ៉ុបនោះទេ”។ ប្រសាសន៍របស់លោកនាយករដ្ឋមន្រ្តីហុងគ្រីបានទាក់ទាញ ប្រតិកម្មថ្កោលទោស ខឹងសម្បារ ជាពិសេសពីសហគមន៍ជនជាតិជ្វីហ្វ ដែលធ្លាប់រងគ្រោះដោយសារការប្រល័យពូជសាសន៍ របស់ពួកទាហានណាហ្ស៊ី ហ៊ីត្លែរ។
នៅថ្ងៃអង្គារ Zsuzsa Hegedu ទីប្រឹក្សាផ្ទាល់ម្នាក់ របស់លោកនាយករដ្ឋមន្រ្តីវិចទ័រ អរបាន ដែលមានឪពុកម្តាយរួចរស់ជីវិតពីការសម្លាប់រង្គាលរបស់ពួកណាហ្ស៊ី បានដាក់ពាក្យលាលែងពីមុខតំណែង។ លោកស្រីចាត់ទុកសំដីរបស់នាយករដ្ឋមន្រ្តី ហុងគ្រីដែលជាមេដឹកនាំរបស់លោកស្រីថា ជាសំដីគួរឲ្យខ្មាស់អៀន និងមានលក្ខណៈដូចគ្នាបេះបិទនឹងអត្ថបទរើសអើងពូជសាសន៍របស់អតីតប្រធានឃោសនារបស់ពួកណាហ្ស៊ី អាល្លឺម៉ង់។
នៅថ្ងៃព្រហស្បតិ៍ អ្នកនាំពាក្យរបស់ក្រសួងការបរទេសអាមេរិកបានស្រង់សំដីរបស់លោកស្រី Deborah Lipstadt ប្រេសិតអាមេរិកសម្រាប់បញ្ហាប្រឆាំងរើសអើងជនជាតិជ្វីហ្វ ដែលថា លោកស្រីភ័យខ្លាចជាខ្លាំង ព្រោះថា សុន្ទរកថារបស់នាយករដ្ឋមន្រ្តីស្តែងឲ្យគេឃើញយ៉ាងច្បាស់ពីមនោគមវិជ្ជារើសអើងពូជសាសន៍របស់ពួកណាហ្ស៊ី។
ទោះរងរលករិះគន់ នាយករដ្ឋមន្រ្តីហុងគ្រី បានចេញមុខការពារខ្លួន នៅក្នុងទស្សនកិច្ចរបស់លោកទៅកាន់ប្រទេសអូទ្រីស ប្រទេសអឺរ៉ុបមួយទៀត ដែលកំពុងប្រឈមនឹងលំហូរជនអន្តោប្រវេសន៍ខុសច្បាប់ មកពីអាហ្វ្រិក និងតំបន់ដើមបូព៌ា។ នៅក្នុងសន្និសីទកាសែតជាមួយនាយករដ្ឋមន្រ្តីអូទ្រីស កាលពីថ្ងៃព្រហស្បតិ៍ ប្រមុខរដ្ឋាភិបាលហុងគ្រីស្នើសុំឲ្យសមភាគីអូទ្រីសយល់ថា សំដីរបស់លោកគឺជាយល់ឃើញផ្នែកវប្បធម៌ និងថា ហុងគ្រីប្រឆាំងដាច់ខាតនឹងការរើសអើងពូជសាសន៍ និងការស្អប់ប្រឆាំងជនជាតិជ្វីហ្វ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ