រុស្ស៊ីនឹងពង្រឹកយុទ្ធសាស្ត្រ ឈរជើងនៅតំបន់មហាសមុទ្រទឹកកកអាកទិក
កាលពីថ្ងៃអាទិត្យ ទី៣១កក្កដា រុស្ស៊ីបានរៀបចំកម្មវិធីព្យុះហយាត្រាកងទ័ពជើងទឹក ដ៏ធំគគ្រឹកគគ្រេង នៅដែនសមុទ្រក្រុងសាំងប៉េតេសបួរ។ ជាកម្មវិធីដែលកងទ័ពជើងទឹករុស្ស៊ី បានបញ្ចេញបង្អួតនូវគ្រឿងសព្វា នាវាចម្បាំង និងនាវាមុជទឹកបាតសមុទ្រជាដើម។ នៅក្នុងឱកាសនោះ លោកប្រធានាធិបតីពូទីន បានចុះហត្ថលេខាលើផែនការយុទ្ធសាស្ត្ររបស់រុស្ស៊ី ដែលប្រកាសថារុស្ស៊ីនឹងពង្រឹងការឈរជើង នៅតំបន់មហាសមុទ្រទឹកកកអាកទិក មិនថាក្នុងវិស័យយោធា ស្រាវជ្រាវ និងវិស័យសេដ្ឋកិច្ច។
ចុះផ្សាយនៅថ្ងៃ៖
លោកប្រធានាធិបតីពូទីន បានចុះហត្ថលេខា ប្រកាសទ្រឹស្តីយុទ្ធសាស្ត្រនយោបាយថ្មី ដែលរុស្ស៊ីនឹងអនុវត្តនៅតំបន់មហាសមុទ្រទឹកកកអាកទិក។ ទ្រឹស្តីនេះបានចែងថា “តំបន់អាកទិក កំពុងតែក្លាយជាតំបន់ដែលមានការប្រជែងគ្នា ជាលក្ខណៈអន្តរជាតិ ទាំងលើកត្តាសេដ្ឋកិច្ច និងទាំងផ្នែកយោធា។ ដោយយោងទៅលើហេតុផលទាំងនេះ រុស្ស៊ីនឹងពង្រឹងគោលជំហរ ការឈរជើងរបស់ខ្លួន ក្នុងនាមជាមេដឹកនាំ នៅក្នុងវិស័យស្រាវជ្រាវរុករកធនធានរ៉ែនានា ព្រមទាំងធ្វើយ៉ាងណា ធានាការពារស្ថិរភាពយុទ្ធសាស្ត្រ នៅក្នុងតំបន់នេះ តាមរយៈការពង្រឹងវត្តមានយោធា កងទ័ពជើងទឹករបស់រុស្ស៊ី។”
ឯកសារយុទ្ធសាស្ត្រថ្មីនេះ បានលើកឡើងផងដែរថា រុស្ស៊ីក៏មានបំណងអភិវឌ្ឍន៍ឲ្យបានពេញទំហឹង នូវច្រកផ្លូវឆ្លងកាត់ពាណិជ្ជកម្មភាគខាងជើង ឬហៅថា ផ្លូវឆ្លងកាត់ឧត្តរ-បូព៌ា ដែលភ្ជាប់អឺរ៉ុបទៅនឹងអាស៊ី។ តាមរយៈយុទ្ធសាស្ត្រនេះ រុស្ស៊ីនឹង រៀបចំស្ថាបនា ការពារសន្តិសុខបណ្តោយផ្លូវប៉ូលខាងជើង ដែលស្ថិតនៅតាមបណ្តោយឆ្នេរខាងជើងរបស់រុស្ស៊ី ហើយធ្វើឲ្យច្រកផ្លូវនេះ អាចមានដំណើរការឆ្លងកាត់មួយឆ្នាំទល់មួយឆ្នាំ។
ឯកសារកម្រាស់៥៥ទំព័រ ដែលលោកពូទីនបានចុះហត្ថលេខា នៅក្នុងឱកាសទិវាកងទ័ពជើងទឹករុស្ស៊ីនេះ ក៏បានបរិហារផងដែរ អំពីចេតនាវាទទីអាងយ៉ាង របស់សហរដ្ឋអាមេរិក ដែលចង់គ្រប់គ្រងតែម្នាក់ឯងពាសពេញដែនទឹកពិភពលោក។ សម្រាប់រុស្ស៊ី ហេដ្ឋារចនាសម្ព័ន្ធយោធារបស់អូតង់ ដែលកាន់តែខិតកៀកចូលមកជិតរុស្ស៊ី វាគឺជាការគំរាមសំឡុតដ៏ធំណាស់ មកលើសន្តិសុខរុស្ស៊ី។
គួរបញ្ជាក់ថា នៅថ្ងៃអាទិត្យទី៣១កក្កដា លោកពូទីន បានអញ្ជើញជាអធិបតី នៅក្នុងកម្មវិធីដង្ហែរក្បួនកងទ័ពជើងទឹក ដ៏ធំមួយ នៅក្រុងសាំងប៉េតេសបួរ។ នាវាចម្បាំង និងនាវាមុជទឹកបាតសមុទ្រចំនួន៤០គ្រឿង ព្រមទាំងទាហានជើងទឹករុស្ស៊ីប្រមាណ៣៥០០នាក់ មានវត្តមានក្នុងកម្មវិធីនេះ។ លោកពូទីនបានប្រកាសផងដែរថា នៅរវាងប៉ុន្មានខែខាងមុខ នាវាចម្បាំងរុស្ស៊ីនឹងត្រូវបំពាក់ដោយក្បាលគ្រាប់មីស៊ីលទំនើបបំផុត ឈ្មោះ Zircon ដែលជាប្រភេទមីស៊ីលអ៊ីពែរសូនិក ល្បឿនលឿនជាងសំឡេង គ្មានអ្វីអាចមកស្ទាក់ចាប់បានទេ។
តាមរយៈកម្មវិធីបង្ហាញសព្វាវុធ និងឃោសនានយោបាយនេះ លោកពូទីនចង់ប្រាប់ទៅពិភពលោកថា រុស្ស៊ីគឺជាមហាអំណាចទ័ពជើងទឹកដ៏ធំ មិនអាចមើលស្រាលបានទេ។ យ៉ាងណាមិញ អាមេរិកតែងតែបានចោទជារឿយៗ ថារុស្ស៊ីមានចេតនាពង្រីកឥទ្ធិពល ដាក់ពង្រាយទ័ពនៅតំបន់មហាសមុទ្រទឹកកកអាកទិក ខណៈដែលផ្ទាំងដុំទឹកកកកាន់តែរលាយ ខ្លាំងឡើងៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ