មនុស្សស្និទ្ធលោកពូទីនចេញមុខរិះគន់ចំណាត់ការជ្រុលហួសកម្រិត នៅក្នុងយុទ្ធនាការកេណ្ឌទ័ព
នៅក្នុងសេចក្តីថ្លែងការណ៍ដ៏កម្រមួយផ្ញើទៅកាន់មន្រ្តីមូលដ្ឋាន ថ្នាក់ដឹកនាំសភារុស្ស៊ី ដែលស្និទ្ធ គាំទ្រជំហរធ្វើសង្រ្គាមរបស់លោកពូទីននៅអ៊ុយក្រែន បានរិះគន់ និងណែនាំប្រាប់ឲ្យគេកែកំហុសឆ្គង នៅក្នុងរឿងកេណ្ឌកងទ័ពដើម្បីធ្វើសង្រ្គាម នៅអ៊ុយក្រែន។ នៅថ្ងៃអាទិត្យ ប្រធានសភាជាន់ខ្ពស់របស់រុស្ស៊ី បាននិយាយថា គេបានទទួលពាក្យបណ្តឹងកាន់តែច្រើនពីការអនុវត្តជ្រុលហួសកម្រិត នៅក្នុងយុទ្ធនាការកេណ្ឌទ័ព។ កាលពីថ្ងៃសៅរ៍ ប្រធានាធិបតីរុស្ស៊ី បានចុះហត្ថលេខាលើបញ្ជីឈ្មោះមុខរបរមួយចំនួន ដែលទទួលបានករណីលើកលែង ដូចជា អ្នកធ្វើការនៅធនាគារ អ្នកកាសែតរបស់ប្រព័ន្ធផ្សព្វផ្សាយរដ្ឋ និងអ្នកធ្វើការក្នុងផ្នែកព័ត៌មានវិទ្យា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៩
ជារឿងដ៏កម្រ ដែលមនុស្សជុំវិញលោកពូទីនបានចេញមុខសំដែងក្តីបារម្ភជាសាធារណៈ ពីការអនុវត្តជ្រុលហួសហេតុ នៅក្នុងយុទ្ធនាការកេណ្ឌទ័ព សម្រាប់ធ្វើសង្រ្គាមនៅអ៊ុយក្រែន។ បន្ទាប់ពីលោកពូទីនចុះហត្ថលេខាលើក្រឹត្យកេណ្ឌទ័ពបម្រុងមួយភាគ ដើម្បីទៅជួយធ្វើសង្រ្គាមនៅអ៊ុយក្រែន រដ្ឋមន្រ្តីការពារជាតិរុស្ស៊ី ដែលប្រកាសបើកយុទ្ធនាការកេណ្ឌទ័ព ៣សែននាក់ បានបញ្ជាក់ថា មានតែទាហានបម្រុង អ្នកដែលធ្លាប់មានបទពិសោធន៍ ក្នុងសមរភូមិប្រយុទ្ធ និងអ្នកមានសមត្ថភាពយោធាពិសេស ទើបមានឈ្មោះ ក្នុងបញ្ជីកេណ្ឌទ័ពរបស់លោកពូទីន។
ប៉ុន្តែ នៅថ្ងៃអាទិត្យ ប្រធានក្រុមប្រឹក្សាសហព័ន្ធរុស្ស៊ី ដែលជាសភាជាន់ខ្ពស់របស់រុស្ស៊ី គឺលោកស្រី Valentina Matvienko ដែលជាមនុស្សស្និទ្ធនឹងលោកពូទីន បានសរសេរនៅក្នុងសារតេឡេក្រាមថា លោកស្រីបានទទួលពាក្យបណ្តឹងកាន់តែច្រើនដែលថា បុរសដែលមិនឆ្លើយតបនឹងលក្ខខណ្ឌកេណ្ឌទ័ព ពោល គឺមិនមែនជាទាហានបម្រុង ឬមានបទពិសោធន៍ធ្វើសង្រ្គាមពីមុនមក ក៏បានទទួលលិខិតកោះហៅឲ្យទៅចុះឈ្មោះ នៅមណ្ឌលរើសកងទ័ពដែរ។
នៅក្នុងលិខិតផ្ញើទៅកាន់រដ្ឋមន្រ្តីការពារជាតិរុស្ស៊ី ប្រធានក្រុមប្រឹក្សាសិទ្ធិមនុស្សរុស្ស៊ី បានទាមទារឲ្យក្រសួងស្វែងរកដំណោះស្រាយបន្ទាន់ ដើម្បី ជៀសវាងការបាត់បង់ទំនុកចិត្តរបស់ប្រជាជន។ ប្រធានក្រុមប្រឹក្សាសិទ្ធិមនុស្សរុស្ស៊ី លោក Valeriy Fadeev បានលើកករណីមិនប្រក្រតីមួយចំនួន ដូចជា ទាហានចាស់ចូលនិវត្ត ឆ្មប គិលានុបដ្ឋាយិកា ឪពុកដែលមានកូនច្រើនក្នុងបន្ទុក គ្រូបង្រៀន ឬអ្នកជម្ងឺ ដែលគ្មានសមត្ថភាព ជំនាញ និងបទពិសោធប្រយុទ្ធទាល់តែសោះ បែរជាបានទទួលលិខិតកោះហៅឲ្យទៅចុះឈ្មោះធ្វើសង្រ្គាមនៅអ៊ុយក្រែន។
ការប្រកាសរបស់លោកពូទីន ដើម្បី កេណ្ឌទ័ពបម្រុង កាលពីថ្ងៃ ពុធបានបង្កឲ្យមានបាតុកម្មតវ៉ា និងចំណាកស្រុករបស់ពលរដ្ឋរុស្ស៊ី ដែលចង់គេចចេញពីការចាប់កេណ្ឌទ័ពដើម្បីធ្វើសង្រ្គាមនៅអ៊ុយក្រែន។ នៅក្នុងសារផ្ញើទៅកាន់ថ្នាក់ដឹកនាំតំបន់ដែលទទួលបន្ទុកការរើសបញ្ចូលកងទ័ព ប្រធានព្រឹទ្ធសភារុស្ស៊ីបានទាមទារឲ្យអាជ្ញាធរមូលដ្ឋានទទួលខុសត្រូវទាំងស្រុង និងកែកំហុសឆ្គងឡើងវិញ ព្រោះថា ការអនុវត្តខ្លាំងជ្រុលហួសហេតុ ហួសកម្រិតដែលបានកំណត់ ជារឿងធម្មតាដែលធ្វើឲ្យកើតមានប្រតិបត្តិការរស់រវើកនៅក្នុងសង្គម។
តាមអង្គការការពារសិទ្ធិមនុស្ស ការប្រកាសកេណ្ឌទ័ពរបស់លោកពូទីន បានបណ្តាលឲ្យមានបាតុកម្មប្រឆាំងសឹងនៅគ្រប់ទីក្រុងរបស់រុស្ស៊ី។ គិតមកដល់ថ្ងៃអាទិត្យ បាតុករជាង ២០០០នាក់ ត្រូវបានចាប់ឃុំខ្លួន ដែលនៅក្នុងនោះភាគច្រើន បានទទួលភ្លាមៗ លិខិត កោះហៅឲ្យចូលបម្រើទ័ព។ នៅពេលនិស្សិត និងសិស្សវិជ្ជាជីវៈ ត្រូវបានលើកលែង រួចខ្លួនពីយុទ្ធនាការកេណ្ឌទ័ព ម៉ូស្គូបាននិយាយការពារខ្លួនថា វាជារឿងស្របច្បាប់ ដែលបាតុករ ចាប់ខ្លួន ក្នុងអំឡុងបាតុកម្ម ត្រូវជាប់ឈ្មោះក្នុងបញ្ជីរើសទ័ពលើកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ