អឺរ៉ុបមានជំហរមិនដូចគ្នាក្នុងរឿងទទួលពលរដ្ឋរុស្ស៊ីដែលរត់គេចពីការកេណ្ឌទ័ពរបស់លោកពូទីន
ប្រឈមមុខនឹងលំហូរ ប្រជាជនរុស្ស៊ីដែលចាកចោលប្រទេសដើម្បីគេចចេញពីយុទ្ធនាការកេណ្ឌទ័ពរបស់លោកប្រធានាធិបតីរុស្ស៊ី ពូទីន ប្រទេសសមាជិកអឺរ៉ុបមានជំហរមិនដូចគ្នា។ នៅមួយថ្ងៃក្រោយ លោកពូទីន ប្រកាសកេណ្ឌទ័ពបម្រុង ចំនួន ៣សែននាក់សម្រាប់ទៅប្រយុទ្ធនៅក្នុងប្រទេសអ៊ុយក្រែន រដ្ឋមន្រ្តីក្រសួងមហាផ្ទៃអាល្លឺម៉ង់បានប្រកាសបើកចំហទទួលជនជាតិរុស្ស៊ីដែលមានសេចក្តីក្លាហាន ហ៊ានប្រឆាំងនឹងបទបញ្ជាកេណ្ឌទ័ពរបស់ប្រធានាធិបតីរុស្ស៊ី។ សាធារណរដ្ឋឆែកឯណោះវិញ ប្រកាសបិទទ្វារមិនទទួលជនជាតិរុស្ស៊ីដែលកំសាក រត់ចោលស្រុក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
មួយថ្ងៃក្រោយការប្រកាសរបស់ប្រធានាធិបតីរុស្ស៊ី លោកពូទីន ដែលថា នឹងកេណ្ឌទ័ពមួយភាគសម្រាប់បំពេញកាតព្វកិច្ច ធ្វើប្រតិបត្តិការយោធាពិសេសនៅអ៊ុយក្រែន ពលរដ្ឋរុស្ស៊ី កាន់តែច្រើន ដែលរត់គេចចេញពីយុទ្ធនាការកេណ្ឌទ័ពរបស់លោកពូទីន បានធ្វើដំណើរចាកចោលប្រទេស ជាបន្តបន្ទាប់ សំដៅប្រទេសជិតខាង ដែលនៅក្នុងនោះមានផងដែរប្រទេសសមាជិកអឺរ៉ុប។
ពលរដ្ឋរុស្ស៊ីកាន់តែច្រើន បានធ្វើដំណើរទៅអាមេនី និងហ្សកហ្ស៊ី ព្រោះជាប្រទេសដែលមិនទាមទារ ទិដ្ឋាការស្នាក់នៅ។ ក្រៅពីនោះ គេឃើញពលរដ្ឋរុស្ស៊ី សម្រុកធ្វើដំណើរចូលប្រទេសសមាជិករបស់សហភាពអឺរ៉ុប ដែលមានព្រំដែនជាប់រុស្ស៊ី។
នៅថ្ងៃសុក្រ អាជ្ញាធរព្រំដែនប្រទេសហ្វាំងឡង់បានកត់សំគាល់ឃើញ ពលរដ្ឋរុស្ស៊ី ធ្វើដំណើរចូលទឹកដីហ្វាំងឡង់ កើនឡើងចំនួនពីរដង នៅក្រោយការប្រកាសកេណ្ឌទ័ពរបស់លោកពូទីន ពីជាង ៣០០០នាក់ ទៅ ៦៤០០នាក់ ក្នុងមួយថ្ងៃ។
កាត់បន្ថយ ១០ដងចំនួនអ្នកទេសចររុស្ស៊ី នៅហ្វាំងឡង់ ចាប់ពីដើមខែកញ្ញា នាយករដ្ឋមន្រ្តីហ្វាំងឡង់ បានបញ្ជាក់កាលពីថ្ងៃព្រហស្បតិ៍ថា ការផ្តល់ទិដ្ឋាការឲ្យជនជាតិរុស្ស៊ី សម្រាប់ទេសចរណ៍ និងការឆ្លងកាត់ហ្វាំងឡង់ ត្រូវផ្អាកបណ្តោះអាសន្ន។ តាមនាយករដ្ឋមន្រ្តីហ្វាំងឡង់ រដ្ឋាភិបាលនឹងពិនិត្យសើរើឡើងវិញ ការប្រឈមគ្រោះថ្នាក់ ដោយអ្នកទេសចររុស្ស៊ី នៅក្រោយនយោបាយកេណ្ឌទ័ពនៅរុស្ស៊ី។
នៅចំពោះមុខការធ្វើចំណាកស្រុក របស់ពលរដ្ឋរុស្ស៊ី ដែលចង់គេចពីការកេណ្ឌទ័ព នៅរុស្ស៊ី ប្រទេសសមាជិកអឺរ៉ុប មានជំហរមិនដូចគ្នា។ គណៈកម្មការអឺរ៉ុបចង់សំដែងសាមគ្គីភាព ទទួលពលរដ្ឋរុស្ស៊ី ក្នុងដែលក្លាហាន ហ៊ាន សំដែងការប្រឆាំងនឹងរបបលោកពូទីន។
នៅថ្ងៃព្រហស្បតិ៍ រដ្ឋមន្រ្តីក្រសួងមហាផ្ទៃអាល្លឺម៉ង់ប្រកាសថា អាល្លឺម៉ង់ត្រៀមខ្លួនទទួលយកជនជាតិរុស្ស៊ី ដែលរត់គេចចេញពីការកេណ្ឌទ័ព ដើម្បីធ្វើសង្រ្គាមនៅ អ៊ុយក្រែន។ សម្រាប់រដ្ឋមន្រ្តីអាល្លឺម៉ង់ បុគ្គលដែលមានសេចក្តីក្លាហាន ហ៊ានប្រឆាំងលោកពូទីន កំពុងស្ថិតក្នុងគ្រោះថ្នាក់។ ដូច្នេះ ពួកគេអាចសុំសិទ្ធិជ្រកកោននយោបាយនៅអាល្លឺម៉ង់។ ចាប់តាំងពីលោកពូទីនចាប់ផ្តើមសង្រ្គាមឈ្លានពានអ៊ុយក្រែន អាល្លឺម៉ង់ជាប្រទេសអឺរ៉ុបនាំមុខគេ ដោយផ្តល់ការជ្រកកោននយោបាយដល់ជនជាតិរុស្ស៊ី ៤៣៨នាក់ ដែលប្រឈមនឹងការចាប់ខ្លួន ដោយសារជំហររិះគន់ ប្រឆាំងសង្រ្គាមរុស្ស៊ី ឈ្លានពានអ៊ុយក្រែន។
ផ្ទុយពីអាល្លឺម៉ង់ ប្រទេសនៅព្រំដែនអឺរ៉ុបដូចជាសាធារណរដ្ឋឆែក ឡេតូនី ប្រទេសបាល់កង់ និងប៉ូឡូញ ជាដើមបានបង្ហាញជំហរអរិភាព។ នៅថ្ងៃព្រហស្បតិ៍ រដ្ឋមន្រ្តីការបរទេសឡេតូនី បដិសេធមិន សាមគ្គី ស្វាគមពលរដ្ឋរុស្ស៊ី នៅក្រោមហេតុផលសន្តិសុខផ្ទាល់ខ្លួន។ ម្យ៉ាង ឡេតូនីចាត់ទុកជនជាតិរុស្ស៊ី ដែលរត់គេចចេញពីការកេណ្ឌទ័ពលើកនេះ ថា គ្មានមនសិការពិតប្រាកដ ព្រោះ ពួកគេធ្លាប់សំងំស្ងៀម មិនចេញប្រឆាំងនឹងសង្រ្គាមឈ្លានពានរបស់លោកពូទីន នៅអ៊ុយក្រែន។
សាធារណរដ្ឋឆែកវិញ បដិសេធមិនផ្តល់ទិដ្ឋាការមនុស្សធម៌ដល់ពលរដ្ឋរុស្ស៊ី ដែលរត់ចេញពីប្រទេស ដើម្បីគេចពីកាតព្វកិច្ចយោធា នៅរុស្ស៊ី។ រដ្ឋមន្រ្តីការបរទេសរបស់សាធារណរដ្ឋឆែក លោក Jan Lipavsky និយាយថា លោកយល់ពីទឹកចិត្តរបស់ប្រជាជនរុស្ស៊ី ដែលមិនចង់ពាក់ព័ន្ធនឹងការសម្រេចចិត្តកាន់តែ គ្មានសង្ឃឹមរបស់លោកពូទីន។ “ប៉ុន្តែ រាល់អ្នកដែលរត់ចេញពីប្រទេស ដោយសារតែពួកគេមិនចង់អនុវត្តកាតព្វកិច្ច ដែលរដ្ឋចាប់តម្រូវ មិនសក្តិសមនឹងទទួលបានទិដ្ឋាការមនុស្សធម៌" នេះជាប្រសាសន៍របស់រដ្ឋមន្រ្តីការបរទេសឆែក។
ទៅតាមសេចក្តីព្រាងច្បាប់ដែលនឹងត្រូវសភាឌូម៉ា បោះឆ្នោតអនុម័ត បុគ្គលដែលបដិសេធមិនចូលបម្រើទ័ព ឬបាក់ទ័ព រត់ចោលជួរត្រូវប្រឈមនឹងការជាប់ទោសដាក់ពន្ធនាគារយ៉ាងតិច ១០ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ