បារាំងធ្វើបាតុកម្មទូទាំងប្រទេសទាមទាមឡើងប្រាក់ខែ ប្រឆាំងនឹងទំនិញឡើងថ្លៃ
អឺរ៉ុបកំពុងឆ្លងកាត់វិបត្តិអតិផរណា យ៉ាងធ្ងន់ធ្ងរ ៩%នៅអេស្ប៉ាញ ១០%នៅអាល្លឺម៉ង់ ជាង៥%សម្រាប់ប្រទេសបារាំង ...។ ប្រឈមនឹងសន្ទុះអតិផរណា ទំនិញគ្រប់សារពើឡើងថ្លៃជាលំដាប់ ប្រទេសបារាំងបានប្រែក្លាយ ថ្ងៃព្រហស្បតិ៍ទី២៩កញ្ញានេះ ជាថ្ងៃប្រមូលផ្តុំគ្នាធ្វើបាតុកម្ម។ សហជីពចំនួនបី បានប្រកូកប្រកាសហៅបុគ្គលិកគ្រប់ផ្នែក ឱ្យចុះធ្វើបាតុកម្មដើម្បីទាមទារសុំដំឡើងប្រាក់ខែ។ បាតុកម្មបានបង្កឱ្យមានការរំខានស្ទើរគ្រប់វិស័យ ជាពិសេសវិស័យដឹកជញ្ជូនសាធារណៈ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
នេះជាបាតុកម្មទីមួយ ក្នុងអាណត្តិទីពីររបស់ប្រធានាធិបតីបារាំងអេម៉ាណុយអែល ម៉ាក្រុង ប៉ុន្តែទំនងមិនមែនជាលើកចុងក្រោយសម្រាប់ឆ្នាំ២០២២ទេ។ ក្នុងបរិបទដ៏តានតឹងបង្កឡើងដោយវិបត្តិអតិផរណាយ៉ាងធ្ងន់ធ្ងរ (ទំនិញឡើងថ្លៃឥតឈប់ ដល់៥,៩%នៅខែសីហា) និងការព្រួយបារម្ភខ្លាចក្រែងរដ្ឋាភិបាលធ្វើកំណែទម្រង់របបចូលនិវត្តន៍ដោយបង្ខំ សហជីពCGT FSU Solidaires ព្រមទាំងអង្គការយុវជន បានប្រមូលផ្តុំធ្វើបាតុកម្មប្រមាណ២០០កន្លែងនៅទូទាំងប្រទេសបារាំង។
នៅរដ្ឋធានីប៉ារីស បាតុករបានបង្ហែក្បួននៅពេលវេលា២រសៀល ពីរង្វង់មូលDenfert-Rochereau ភាគខាងត្បូងក្រុងសំដៅទីលានBastille ដែលជានិម្មិត្តរូបនៃចលនាបដិវត្តប្រជាជនបារាំង។ បាតុកម្មបានបង្កឱ្យមានការរំខានយ៉ាងខ្លាំងក្នុងផ្នែកសេវាកម្ម សាលារៀន និងបានធ្វើឱ្យវិស័យដឹកជញ្ជូនសាធារណៈ ឡានក្រុង រថភ្លើងក្រោមដី និងរថភ្លើងឆ្លងតំបន់ មានភាពរអាក់រអួលយ៉ាងខ្លាំង។
កម្មវត្ថុនៃបាតុកម្ម ដែលមានសរសេរលើបដា គឺទាមទារដំឡើងប្រាក់បៀរវត្សរ៍ ដំឡើងប្រាក់ខែអប្បបរិមាឱ្យដល់២ពាន់អឺរ៉ូ និងកំណត់អាយុចូលនិវត្តន៍ត្រឹម៦០ឆ្នាំ ព្រមទាំងធ្វើការ៣២ម៉ោងក្នុងសប្តាហ៍។
ក្រៅពីសហជីព គេសង្កេតឃើញ តំណាងជាប់ឆ្នោត គណបក្សនយោបាយអ្នកឆ្វេងនិយម ព្រមទាំងតំណាងអង្គការមួយចំនួនដូចជាអង្គការ Oxfam Attac មកចូលរួមធ្វើបាតុកម្មប្រឆាំងនឹងការឡើងថ្លៃទំនិញនេះដែរ។ ប៉ុន្តែសហជីពធំៗបីផ្សេងទៀត (CFDT FO Unsa) អវត្តមាន ដោយសំអាងថាបានមានសកម្មភាពទាមទារបែបផ្សេង និងត្រៀមកម្លាំងធ្វើបាតុកម្មធំនៅថ្ងៃខាងមុខ ពេលរដ្ឋាភិបាលធ្វើកំណែទម្រង់ច្បាប់ចូលនិវត្តន៍។
លោកស្រីនាយករដ្ឋមន្ត្រី អេលីហ្សេប៊ែត ប៊ន បានប្រកាសនៅថ្ងៃព្រហស្បតិ៍នេះ ថារដ្ឋាភិបាល នឹងចាប់ផ្តើមពិគ្រោះចរចាជាមួយក្រុមសហជីព កម្មករ និយោជក សភា ជុំវិញការធ្វើកំណែទម្រង់ច្បាប់ចូលនិវត្តន៍ ដើម្បីឈានទៅអនុម័តគម្រោងច្បាប់ឱ្យបានមុនរដូវរងារនិងចូលជាធរមាននៅរដូវក្តៅឆ្នាំ២០២៣។ តាមគម្រោង រដ្ឋាភិបាលចង់បង្ខិតពេលចូលនិវត្តន៍បន្តិចៗម្តង ពោលគឺមួយឆ្នាំឡើងបួនខែ ដើម្បីធ្វើយ៉ាងណាឱ្យចាប់ពីឆ្នាំ២០៣១ទៅ ពលរដ្ឋត្រូវចូលនិវត្តន៍នៅអាយុ៦៥ឆ្នាំ។ ម្យ៉ាងទៀត រដ្ឋាភិបាលបារាំងបានអះអាងថាបានព្រមព្រៀងដំឡើងប្រាក់ខែដល់អ្នករដ្ឋការ និងគ្រូបង្រៀន ព្រមទាំងបានចាត់វិធានការប្រឆាំងអតិផរណា ដែលទូលំទូលាយជាងគេនៅអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ