កូដកម្ម២០ថ្ងៃធ្វើឲ្យក្រុមហ៊ុនអយស្ម័យយានបារាំង បាត់បង់ចំណូល ៤០០លានអឺរ៉ូ
កូដកម្មប្រឆាំងកំណែទម្រង់ច្បាប់ចូលនិវត្តន៍ ដែលបានឈានចូលដល់ថ្ងៃទី ២១ នៅថ្ងៃ ពុធទី ២៥ ធ្នូ បានធ្វើឲ្យក្រុមហ៊ុន អយស្ម័យយាន បារាំង SNCF បាត់បង់ប្រាក់ចំណូល ប្រមាណ ៤០០លានអឺរ៉ូ។ តាមប្រធានក្រុមហ៊ុនSNCF ដែលបានផ្តល់បទសម្ភាសន៍ដល់កាសែត Le Monde កាលពីថ្ងៃអង្គារម្សិលមិញ ទំហំខាតបង់នឹងអាចមានច្រើនជាងនេះ ព្រោះថា ក្រុមសហជីពរបស់អ្នកបើកបររថភ្លើង ប្រកាសបន្ត ធ្វើកូដកម្ម តទៅទៀត ដរាបណា រដ្ឋាភិបាលមិនព្រម ឈប់ធ្វើកំណែទម្រង់ ច្បាប់ ដែលសំដៅលុបចោល របបចូលនិវត្តន៍ពិសេសរបស់បុគ្គលិកក្រុមហ៊ុនដឹកជញ្ជូន។
ចុះផ្សាយនៅថ្ងៃ៖
កូដករ បាតុករ ប្រឆាំងកំណែទម្រង់ ច្បាប់ចូលនិវត្តន៍ បារាំងមិនយល់ព្រម ផ្អាកសកម្មភាព តវ៉ារបស់ខ្លួន នៅក្នុងរដូវបុណ្យទាន បុណ្យណូអែល ទៅតាមការស្នើសុំរបស់រដ្ឋាភិបាល។ កូដកម្មរបស់បុគ្គលិកក្រុមហ៊ុនដឹកជញ្ជូនបារាំង ដែលបានប៉ះពាល់ខ្លាំង ដល់ ការធ្វើដំណើរ របស់ប្រជាជនបារាំង នៅទូទាំងប្រទេស បានធ្វើឲ្យក្រុមហ៊ុនខាតបង់ផងដែរ ប្រាក់ចំណូលដ៏ក្រាសក្រែល។
តាមការវាយតម្លៃរបស់លោក Jean Pierre Farandou ប្រធានក្រុមហ៊ុនអយស្ម័យយានបារាំង SNCF កូដកម្ម មិនធ្វើការ របស់បុគ្គលិករបស់ក្រុមហ៊ុន នៅក្នុងរយៈពេល២០ថ្ងៃមកនេះ បានធ្វើឲ្យក្រុមហ៊ុន បាត់បង់ប្រាក់ចំណូល ៤០០លានអឺរ៉ូ ដែលក្រុមហ៊ុនគួររកបាន នៅក្នុងរដូវបុណ្យទានចុងឆ្នាំ។ សម្រាប់ប្រធានក្រុមហ៊ុនSNCF ការខាតបង់របស់ក្រុមហ៊ុនសម្រាប់ឆ្នាំ ២០១៩ នឹងមានច្រើនបន្ថែមទៀត ដោយសារក្រុមសហជីព ប្រកាសបន្តធ្វើកូដកម្ម គ្មានកាលកំណត់។
នៅឆ្នាំ ២០១៨ ក្រុមហ៊ុនSNCF បានខាតបង់ប្រាក់ចំណូល ជាង ៩០០លានអឺរ៉ូ ដោយសារ បាតុកម្ម និងកូដកម្ម រយៈពេល ៣ខែរបស់បុគ្គលិកក្រុមហ៊ុន ដើម្បីប្រឆាំងនឹងកំណែទម្រង់ក្នុងមុខងារសាធារណៈរបស់រដ្ឋាភិបាលលោកម៉ាក្រុង។
ចាប់តាំងពីថ្ងៃទី ៥ធ្នូ បុគ្គលិកក្រុមហ៊ុនដឹកជញ្ជូនបារាំងធ្វើកូដកម្ម មិនចូលធ្វើការ ដើម្បីប្រឆាំងនឹងសេចក្តីព្រាងកំណែទម្រង់ច្បាប់ ចូលនិវត្តន៍ ដែលមានគម្រោង លុបចោល របបពិសេស ដែលភាគច្រើនជាផលប្រយោជន៍ របស់អ្នកធ្វើការនៅក្រុមហ៊ុនដឹកជញ្ជូន។ នៅថ្ងៃអង្គារដែលជាថ្ងៃទី ២០នៃកូដកម្ម បាតុកម្ម និងជាថ្ងៃបុណ្យណូអែល ដ៏សំខាន់របស់បារាំង រថភ្លើងដ៏លឿន TGV ប្រមាណ៤០ភាគរយប៉ុណ្ណោះ ដែលរត់ សម្រាប់ដឹកអ្នកដំណើរ។
តាមប្រធានក្រុមហ៊ុនអយស្ម័យយានបារាំង នៅពេលចលនាប្រឆាំងមានរយៈពេលកាន់តែវែង និងកម្លាំងខ្លាំង គេពិបាកនឹងទប់ឲ្យឈប់ភ្លាមៗណាស់។ ប្រធានក្រុមហ៊ុនSNCF ចង់សំដៅដល់សហជីពក្រុមអ្នកបើកបររថភ្លើង សំខាន់ៗ ដូចជា CGT CFDT ជាដើម ដែលបានបដិសេធមិនឈប់ធ្វើកូដកម្ម សូម្បីក្នុងរដូវបុណ្យណូអែល។ ជាលទ្ធផល បាតុកម្ម កូដម្មរបស់បុគ្គលិកក្រុមហ៊ុន ដឹកជញ្ជូនបារាំង បានប៉ះពាល់យ៉ាងខ្លាំងដល់ការធ្វើដំណើរជាទូទៅរបស់ប្រជាជនបារាំង នៅឱកាសបុណ្យណូអែល។
វិបត្តិជម្លោះសង្គមបារាំង នឹងឆ្លងចូលទៅឆ្នាំថ្មីបន្តទៀត ព្រោះថា ក្រុមសហជីពប្រកាសធ្វើបាតុកម្ម កូដកម្ម គ្មានពេលកំណត់ ដោយសារតែគ្មានចម្លើយវិជ្ជមានពីខាងរដ្ឋាភិបាល។ ពីពេលនេះ រហូតដល់ថ្ងៃទី ៧ មករា ដែលជាថ្ងៃ ជួបចរចាសាជាថ្មី រវាងរដ្ឋាភិបាល និងក្រុមសហជីព នឹងគ្មានអ្វីផ្លាស់ប្តូរ។ ប្រទេសបារាំង ជាពិសេសទីក្រុងប៉ារីស នឹងនៅបន្តជាប់គាំងខ្លាំង ដោយសារ កូដកម្មដែលធ្វើឲ្យមានវិបត្តិគ្មានមធ្យោបាយធ្វើដំណើរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ