បែលហ្ស៊ីក និង អ៊ីរ៉ង់ ចុះកិច្ចព្រមព្រៀងដោះដូរអ្នកទោស
នៅថ្ងៃអាទិត្យ ទី១៣វិច្ឆិកា ប្រធានាធិបតីអ៊ីរ៉ង់ បានសម្រេចផ្តល់សច្ចាប័នលើកិច្ចព្រមព្រៀងដោះដូរអ្នកទោស រវាង បែលហ្ស៊ីក និង អ៊ីរ៉ង់។ នេះបើតាមការបញ្ជាក់របស់ទីភ្នាក់ងារព័ត៌មានរដ្ឋអំណាចអ៊ីរ៉ង់។ កិច្ចព្រមព្រៀងនេះ បានធ្វើពង្រាងច្រើនខែមកហើយ និងដែលត្រូវជជែកពិភាក្សានៅសភាអ៊ីរ៉ង់ ផង។ ភាគីប្រទេសបែលហ្ស៊ីកវិញ កិច្ចព្រមព្រៀងនេះ ត្រូវរងការរិះគន់ជាខ្លាំង ពីសំណាក់ពលរដ្ឋខ្លះនិងអ្នកប្រឆាំងរដ្ឋាភិបាល។
ចុះផ្សាយនៅថ្ងៃ៖
ស្តាប់ - ០៣:០១
កិច្ចព្រមព្រៀងដោះដូរអ្នកទោសរវាងអ៊ីរ៉ង់និងបែលហ្ស៊ីកនេះ មុននឹងត្រូវប្រធានាធិបតីអ៊ីរ៉ង់ អេប្រាហ៊ីម រ៉ៃស៊ី ចុះហត្ថលេខាយល់ព្រម គឺត្រូវឆ្លងកាត់ដំណាក់កាលច្រើននៅតេហេរ៉ង់។ រដ្ឋសភាអ៊ីរ៉ង់អនុម័តតាំងតែពីខែសីហា ហើយ ក្រុមប្រឹក្សាឆ្មាំបដិវត្តន៍ជាតិ យល់ព្រមឯកភាពនៅតែតុលា ហើយនិងឆ្លងសេចក្តីសម្រេចរបស់ចៅក្រមតុលាការដំបូងមួយទៀត ដែលត្រូវពិនិត្យមើលធម្មនុញ្ញភាព។ តាមរយៈកិច្ចព្រមព្រៀងនេះ អ៊ីរ៉ង់ សង្ឃឹមថា នឹងបានពលរដ្ឋត្រឡប់ទៅប្រទេសដើមវិញ។ ជនជាតិអ៊ីរ៉ង់ រាប់រយនាក់ ត្រូវតុលាការបែលហ្ស៊ីក កាត់ទោសពីបទប្រព្រឹត្តអំពើភេរវកម្ម។ ជាក់ស្តែង អ្នកការទូតអ៊ីរ៉ង់ម្នាក់ ឈ្មោះ Assadollah Assadi ត្រូវកាត់ទោសឆ្នាំ២០២១ ឲ្យជាប់ក្រោយចម្រឹងដែក ២០ឆ្នាំ ពីបទមានចេតនាប្រព្រឹត្តឧក្រិដ្ឋកម្មភេរវកម្ម។
ចំណែកភាគី បែលហ្ស៊ីល វិញ ពលរដ្ឋមួយចំនួននិងបក្សប្រឆាំងបានរិះគន់ជាខ្លាំង។ ប៉ុន្តែ សមាជិករដ្ឋសភា មតិភាគច្រើន បានសម្រេចចំពោះកិច្ចព្រមព្រៀងដោះដូរអ្នកទោសនេះ ហើយ រដ្ឋាភិបាលបែលហ្ស៊ីល យល់ថា កិច្ចព្រមព្រៀងនេះ ជាជម្រើសតែមួយសម្រាប់សភាពការបន្ទាន់ និងដើម្បីគោលបំណងមនុស្សធម៌ផង។ នោះ គឺចង់រំដោះជនជាតិបែលហ្ស៊ីកដែលជាប់ឃុំនៅអ៊ីរ៉ង់។ នៅក្នុងនោះ ក៏មានម្នាក់ឈ្មោះ អូលីវីយ៉េ វ៉ាន់ដឺកាស្ទេល (Olivier Vandecasteele) ជាអ្នកធ្វើការខាងសប្បុរសធម៌ ដែលត្រូវរដ្ឋអំណាចអ៊ីរ៉ង់ចាប់ឃុំ ជាង ៩ ខែមកហើយ។ គ្រួសាររបស់ Olivier Vandecasteele បានសុំឲ្យអាជ្ញាធររកមធ្យោបាយជាបន្ទាន់ ព្រោះបញ្ហាសុខភាពរបស់អ្នកជាប់ឃុំ និងលក្ខខណ្ឌមិនល្អនៅក្នុងពន្ធនាគារអ៊ីរ៉ង់។
លក្ខខណ្ឌមិនប្រសើរក្នុងមន្ទីរអ៊ីរ៉ង់ ក៏ត្រូវរដ្ឋាភិបាលបារាំងរិះគន់ដែរ។ បារាំងដែលមានជនជាតិខ្លួនច្រើននាក់ កំពុងតែជាប់ឃុំនៅអ៊ីរ៉ង់។ រដ្ឋមន្ត្រីក្រសួងកិច្ចការបរទេស អ្នកស្រី Catherine Colonna បានបញ្ជាក់ប្រាប់កាសែត Le Parisien នៅចុងសប្តាហ៍ ថា ពលរដ្ឋបារាំងនិងអ៊ីរ៉ង់មានសញ្ជាតិបារាំង ចំនួន ៧ នាក់ កំពុងតែរងការឃុំឃាំងនៅពន្ធនាគារអ៊ីរ៉ង់។ ជាច្រើនខែមកហើយ កាណាល់ខ្សែបណ្តាញការទូត ត្រូវកាត់ដាច់ រវាងទីក្រុងប៉ារីសនិងតេហេរ៉ង់ ពីព្រោះតែ បារាំងនិងអ៊ីរ៉ង់ បានដកទូតរៀងខ្លួន ព្រោះតែទំនាស់ជុំវិញសំណុំរឿងនុយក្លេអ៊ែរអ៊ីរ៉ង់។
ថ្មីៗនេះ ប្រធានាធិបតីបារាំងបានអញ្ជើញស្ត្រីអ្នកនយោបាយប្រឆាំងអ៊ីរ៉ង់មកប៉ារីសក្នុងកិច្ចប្រជុំស្តីពីសន្តិភាព ហើយលោក ម៉ាក្រុង បានសរសើរវរភាពរបស់នារីអ៊ីរ៉ង់ ដែលនឹងឈរតវ៉ាបាតុកម្មច្រើនសប្តាហ៍មកនេះ។ ថ្នាក់ដឹកនាំអ៊ីរ៉ង់ ខឹងនឹងប្រធានាធិបតីបារាំង ហើយចាត់ទុកសម្តីលោកម៉ាក្រុងថាគួរឲ្យខ្មាស។
បើតាមសង្គមស៊ីវិល រដ្ឋអំណាចអ៊ីរ៉ង់ បានចាប់ឃុំពលរដ្ឋជាង១៥០០០នាក់ហើយ ព្រោះតែបាតុកម្ម ពីរខែមកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ