សំណុំរឿងពុករលួយ ៖ ប្រធានសភាអឺរ៉ុបប្រកាសធ្វើកំណែទម្រង់ស៊ីជម្រៅ
រឿងអាស្រូវពុករលួយនៅសភាអឺរ៉ុប កំពុងអង្រួនស្ថាប័នអឺរ៉ុបទាំងមូល និងបានក្លាយជាប្រធានបទសំខាន់មួយដែរ នៃជំនួបកំពូលអឺរ៉ុបចុងក្រោយប្រចាំឆ្នាំ ដែលកំពុងប្រព្រឹត្តទៅនៅថ្ងៃព្រហស្បតិ៍និងសុក្រទី ១៥-១៦ធ្នូ២០២២។ ក្នុងកម្មវិធីបើកជំនួបកំពូល ប្រធានសភាអឺរ៉ុប លោកស្រី រ៉ូប៊ែរតា មេតហ្សូឡា Roberta Metsola បានប្រកាសធ្វើកំណែទម្រង់ ស៊ីជម្រៅ នៅឆ្នាំ២០២៣ ប្រឆាំងនឹងអំពើពុករលួយដែលធ្វើឱ្យអាប់អោនលទ្ធិប្រជាធិបតេយ្យ។
ចុះផ្សាយនៅថ្ងៃ៖
ស្តាប់ - ០១:៥៨
គ្មានកំណត់ជាផ្លូវការក្នុងរបៀបវារៈនៃជំនួបកំពូលសហភាពអឺរ៉ុបលើកនេះទេ ប៉ុន្តែរឿងអាស្រូវពុករលួយនិងផលវិបាកសម្រាប់អឺរ៉ុប បានលេចធ្លោឡើងក្លាយជាប្រធានបទដ៏សំខាន់មួយទន្ទឹមនឹងសំណុំរឿងថាមពលឧស្ម័នឡើងថ្លៃ និងវិបត្តិអ៊ុយក្រែនដែរ។ ប្រមុខដឹកនាំប្រទេសជាសមាជិកសហភាពអឺរ៉ុបទាំង២៧ ចាំបាច់ត្រូវពិភាក្សាដោះស្រាយដោយចៀសមិនរួច។
ក្នុងសន្និសីទកាសែតបើកជំនួបកំពូល ប្រធានសភាអឺរ៉ុប លោកស្រី រ៉ូប៊ែរតា មេតហ្សូឡា បានប្រកាសសន្យាធ្វើកំណែទម្រង់ស៊ីជម្រៅ ចាប់ពីដើមឆ្នាំ២០២៣ទៅតែម្តង ដោយគ្រោងនឹងពង្រឹងជាពិសេស ការការពារអ្នកផ្តល់ព័ត៌មាន និងហាមឃាត់លែងឱ្យមានក្រុមមិត្តភាពក្រៅផ្លូវការជាមួយប្រទេសទីបី។ មានចំណុចខ្វះខាតជាច្រើនដែលត្រូវលុបបំបាត់ មានជាអាទិ៍សកម្មភាពរបស់អតីតសមាជិកសភាអឺរ៉ុប សកម្មភាពចុះបញ្ជីប្រកបដោយតម្លាភាព និងសកម្មភាពរបស់បុគ្គលដែលអនុញ្ញាតឱ្យចូលក្នុងសភាអឺរ៉ុប។ នេះបើតាមការលម្អិតរបស់លោកស្រីប្រធានសភាអឺរ៉ុប ដោយបានបញ្ជាក់ថា នឹងគ្មានទេករណីនិទណ្ឌភាព ហើយក៏គ្មានអ្វីអាចលាក់នៅក្រោមតុបានដែរ។
នៅព្រឹកថ្ងៃព្រហស្បតិ៍នេះ ក្នុងសម័យប្រជុំពេញអង្គ សមាជិកសភាអឺរ៉ុបបានអនុម័ត ស្ទើរជាឯកច្ឆ័ន្ទរួចហើយ សំណើផ្អាកទំនាក់ទំនងជាបណ្តោះអាសន្នជាមួយនឹងតំណាងអ្នកការពារផលប្រយោជន៍ប្រទេសកាតា និងបានសម្រេចព្យួរគ្រប់កិច្ចការសភាដែលមានពាក់ព័ន្ធនឹងរាជាណាចក្រមួយនេះ ក្នុងអំឡុងពេលធ្វើអង្កេត។
ជាក់ស្តែង បើតាមលោកស្រីប្រធានសភា អង្គការក្រៅរដ្ឋាភិបាល No Peace Without Justice ដែលសង្ស័យថាមានជាប់ប្រលាក់ប្រលូសនឹងរឿងអាស្រូវពុករលួយនៅសភាអឺរ៉ុបដែរ ត្រូវព្យួរទំនាក់ទំនងជាមួយអឺរ៉ុបហើយ។
សូមរំលឹកថារឿងអាស្រូវពុករលួយ កើតឡើងក្នុងរង្វង់សភាអឺរ៉ុបទេ ប៉ុន្តែបញ្ហាកំពុងចោទឡើងនៅទូទាំងស្ថាប័នអឺរ៉ុប ដោយមានសមាជិកសភាខ្លះ បានគូសបញ្ជាក់អំពីភាពចាំបាច់នៃការអនុវត្តតម្លាភាពនៅក្នុងរង្វង់ក្រុមប្រឹក្សានិងគណៈកម្មការអឺរ៉ុបដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ