រដ្ឋអំណាចបែលហ្ស៊ិករឹបអូសបានគ្រឿងញៀនជិត ១១០តោនក្នុងឆ្នាំ ២០២២ នៅកំពង់ផែអង់វែរ
នៅថ្ងៃអង្គារ ទី១០ មករា រដ្ឋអំណាចនៃប្រទេសបែលហ្ស៊ិក និងហូឡង់បានប្រកាសឲ្យដឹងពីការរឹបអូសបានគ្រឿងញៀនកូកាអ៊ីនកាលពីឆ្នាំ ២០២២ កន្លងទៅ។ កំពង់ផែរូតទែរដាមក្នុងប្រទេសហូឡង់ និងកំពង់ផែអង់វែរក្នុងប្រទេសបែលហ្ស៊ិកត្រូវបានគេស្គាល់ជាទីកន្លែងរត់ពន្ធ និងឆ្លងកាត់គ្រឿងញៀនពីទ្វីបអាមេរិកឡាទីន ពិសេសពីប្រទេសប៉ាណាម៉ា កូឡុំប៊ី និងប្រទេសអេក្វាទ័រចូលទ្វីបអឺរ៉ុប។ តែខណៈដែលការរឹបអូសនៅកំពង់ផែរូតទែរដាមក្នុងប្រទេសហូឡង់ឆ្នាំ ២០២២ បានស្គាល់ការធ្លាក់ចុះ ការរឹបអូសនៅកំពង់ផែអង់វែរក្នុងប្រទេសបែលហ្ស៊ិកក្នុងប្រទេសបែលហ្ស៊ិកឆ្នាំ ២០២២ បានស្គាល់កំណើនខ្លាំង ពោលមានជិត ១១០តោន។ បើធៀបនឹងឆ្នាំ ២០២១ គឺកើនថែមចំនួន ២០តោន។ គេបានមើលឃើញថា ពីមួយឆ្នាំទៅមួយឆ្នាំ បែលហ្ស៊ិក ពិសេសកំពង់ផែអង់វែរហាក់ក្លាយជាទីកន្លែងជួញដូរ និងជាទីតាំងឆ្លងកាត់គ្រឿងញៀនដ៏ធំរបស់អឺរ៉ុប។ តើនេះមកពីមូលហេតុអ្វី?។ យើងស្តាប់លោកហ្វាប្រីស រីហ្សូលី អ្នកជំនាញម៉ាហ្វីយ៉ា និងឧក្រិដ្ឋកម្មកម្រិតធ្ងន់។
ចុះផ្សាយនៅថ្ងៃ៖
ស្តាប់ - ០១:៤៧
« ប្រទេសបែលហ្ស៊ិកតែងជាតំបន់ឆ្លងកាត់គ្រឿងញៀន និងជាកន្លែងលាងលុយកខ្វក់។ តែអ្វីដែលខុសគ្នានោះនៅត្រង់ថា កាលពី ១៥ឆ្នាំមុន ឬច្រើនជាងនេះ រដ្ឋអំណាចបែលហ្ស៊ិកបានសម្រចចិត្តពង្រីកកំពង់ផែអង់វែរឲ្យកាន់តែធំឡើងថែមទៀតដោយសាងសង់បន្ថែមនូវចំណតកប៉ាល់ចំនួនពីរកន្លែងថ្មីដើម្បីទទួលកុងតឺន័រទំនិញបរទេស។
នេះជានិមិត្តរូបនៃសកលភាវូបនីយកម្មនៃការដោះដូរ។ តែការពង្រីកកំពង់ផែអង់វែរនេះក៏ជាឱកាសល្អមួយសម្រាប់ក្រុមជួញដូរគ្រឿងញៀនដែរ ខណៈដែលកំពង់ផែក្នុងប្រទេសអឺរ៉ុបផ្សេងទៀត ដូចយ៉ាងកំពង់ផែរូតទែរដាមនៅហូឡង់ ឬកំពង់ផែអំបួរនៅអាល្លឺម៉ង់មានភាពចង្អៀត និងមានការត្រួតពិនិត្យតឹងតែងខ្លាំង។
ដល់អ៊ីចឹងទៅ ក្រុមជួញដូរគ្រឿងញៀនបានផ្តោតសកម្មភាពខ្លាំងនៅកំពង់ផែអង់វែរដោយដឹកគ្រឿងញៀនតាមកុងតឺន័រឆ្លងកាត់កំពង់ផែអង់វែរ។ លើសពីនេះ និងក្រោមហេតុផលផ្សេងៗ ការត្រួតពិនិត្យនៅកំពង់ផែអង់វែរមានភាពធូរស្រាល មិនសូវតឹងតែងដើម្បីពន្លឿនការធ្វើចរាចរណ៍ទំនិញ។ ដូច្នេះតាំងពី ១៥ឆ្នាំ ឬ ២០ឆ្នាំ ការនាំគ្រឿងញៀន ឬទំនិញផ្សេងទៀតចូលតាមកំពង់ផែអង់វែរមានភាពងាយស្រួលដោយគ្មានការត្រួតពិនិត្យ ឆែកឆេរអ្វីទាំងអស់។
គឺទើបតែ ៥ឆ្នាំកន្លងទៅនេះទេដែលក្រុមគយបានពង្រឹងការត្រួតពិនិត្យ ឆែកឆេរ។ អ៊ីចឹងហើយបានជាគេឃើញជាប្រចាំពីកំណើននៃការរឹបអូសពីមួយឆ្នាំទៅមួយឆ្នាំ ពិសេសកូកាអ៊ីននៅកំពង់ផែអង់វែរ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ