ការសិក្សា ៖ វិបត្តិទំនិញឡើងថ្លៃជាបញ្ហាធំបំផុតរបស់ពិភពលោក សម្រាប់ពីរឆ្នាំខាងមុខ
ទំនិញឡើងថ្លៃ ដែលជាផលវិបាកបញ្ហាអតិផរណា បង្កឡើងដោយសង្គ្រាមនៅអ៊ុយក្រែន និងដោយបញ្ហាសេដ្ឋកិច្ចក្រោយកូវីដ គឺជាហានិភ័យចម្បងទីមួយ របស់ពិភពលោក សម្រាប់រយៈពេលពីពេលនេះទៅពីរឆ្នាំខាងមុខ។ នេះបើតាមការរបាយការណ៍របស់អ្នកជំនាញនិងអ្នកសម្រេចចិត្តនៃក្រុមវេទិកាសេដ្ឋកិច្ចពិភពលោកស្តីពី “ហានិភ័យពិភពលោកឆ្នាំ២០២៣” ចេញផ្សាយនៅថ្ងៃពុធទី១១មករា២០២៣។
ចុះផ្សាយនៅថ្ងៃ៖
ស្តាប់ - ០១:៥៨
ជំងឺរាតត្បាតសកល និងសង្គ្រាមនៅអឺរ៉ុប បានបំផុសឱ្យ វិបត្តិថាមពល អតិផរណា ស្បៀងអាហារ និងសន្តិសុខ លេចត្រដែតក្លាយបញ្ហាជួរមុខ ជាមួយផលវិបាកដ៏ធ្ងន់ធ្ងរគឺការឡើងថ្លៃនៃទំនិញ និងហានិភ័យសង្គម ឬសង្គ្រាមភូមិសាស្ត្រសេដ្ឋកិច្ច។
វិបត្តិទំនិញឡើងថ្លៃ នឹងច្រានមនុស្សរាប់លាននាក់ឱ្យធ្លាក់ក្នុងភាពក្រីក្រ អមដោយវិបត្តិសង្គមដ៏ធំមហិមារជាងគ្រោះមហន្តរាយធម្មជាតិ និងអាកាសធាតុដ៏កំណាចៗទៅទៀត។ មហន្តរាយធម្មជាតិនិងអាកាសធាតុ ត្រូវបានគេចាត់ទុកជាហានិភ័យធំរយៈពេលវែង។ នេះបើតាមរបាយការណ៍របស់វេទិកាសេដ្ឋកិច្ចពិភពលោកអង្កេតដោយអ្នកជំនាញជាង១២០០នាក់។ របាយការណ៍លម្អិតទៀតថា ជម្លោះនិងភាពតានតឹងភូមិសាស្ត្រសេដ្ឋកិច្ច បានបង្កើតឱ្យមានហានិភ័យមួយខ្សែប្រទាក់គ្នាយ៉ាងស្មុគស្មាញ ដែលគាបបណ្តាញផ្គត់ផ្គង់ថាមពលនិងស្បៀងអាហារ ដែលទំនងត្រូវអូសបន្លាយពេលរយៈពេលពីរឆ្នាំ និងដែលធ្វើឱ្យជីវិតកាន់តែលំបាក ហើយបំណុលក៏កាន់តែខ្ពស់ទៀត ព្រោះតែថាមពលនិងអត្រាការប្រាក់ឡើងថ្លៃ។
ចេញផ្សាយនៅ៥ថ្ងៃមុនការបើកជំនួបប្រជុំប្រចាំឆ្នាំ របាយការណ៍របស់វេទិកាសេដ្ឋកិច្ចពិភពលោក បានបញ្ជាក់ថា វិបត្តិនេះជាការបំផ្លាញកិច្ចខិតខំប្រឹងប្រែងប្រយុទ្ធប្រឆាំងនឹងការគំរាមកំហែងផ្សេងទៀត ពិសេសការប្រែប្រួលអាកាសធាតុ និងការបាត់បង់ជីវៈចម្រុះ។ របាយការណ៍បានអំពាវនាវឱ្យពិភពលោកបញ្ចេញសកម្មភាពសហការគ្នាជាបន្ទាន់ ព្រោះបើគេមិនអាចចាប់ផ្តើមសហការគ្នាសម្របនឹងការប្រែប្រួលអាកាសធាតុទេ នោះ១០ឆ្នាំខាងមុខផែនដីនឹងឡើងក្តៅខ្លាំង ហើយបរិស្ថាននឹងដួលរលំ។
តែស្របពេលគ្នាជាមួយគ្នា ការប្រកួតប្រជែងភូមិសាស្ត្រនយោបាយរវាងប្រទេសនីមួយៗ កំពុងតែនាំឱ្យភាពអាសន្នសង្គមកាន់តែខ្លាំងមិនធ្លាប់ប្រទះ ព្រមទាំងផលវិបាកមួយទៀត គឺការត្រលប់មកកាន់អាវុធនិងបង្កើនយោធា ដោយប្រើបច្ចេកវិទ្យាថ្មីៗ។ នេះបើតាមរបាយការណ៍ដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ