នាយិកាមូលនិធិរូបិយវត្ថុអន្តរជាតិ ថា២០២៣ជាឆ្នាំដ៏លំបាកសម្រាប់សេដ្ឋកិច្ចពិភពលោក
២០២២បានបិទបញ្ចប់ទៅ ជាមួយស្ថានភាពសេដ្ឋកិច្ចពិភពលោកអាប់អួរ និងវិបត្តិសេដ្ឋកិច្ចដើរថយក្រោយ កាន់តែធ្ងន់ធ្ងរ មិនដូចការព្រាងទុក។ ទាំងនេះ គឺបណ្តាលមកពីសង្គ្រាមឈ្លានពានរបស់រុស្ស៊ីលើអ៊ុយក្រែន។ ឆ្នាំ២០២២កន្លងទៅ ក៏សម្គាល់ដោយស្ថានភាពសេដ្ឋកិច្ចយ៉ាប់យឺន ដោយទំនិញឡើងថ្លៃ នៅទូទាំងពិភពលោក ហើយអត្រាការប្រាក់ក៏ឡើងខ្ពស់ទៀត ...ចុះនៅឆ្នាំ២០២៣ សេដ្ឋកិច្ចពិភពលោកនឹងមានស្ថានភាពប្រសើរឡើងឬ ?
ចុះផ្សាយនៅថ្ងៃ៖
ស្តាប់ - ០១:៥៩
មិនទេ ! មួយភាគបីនៃប្រទេសនៅលើភពផែនដី នឹងស្គាល់វិបត្តិសេដ្ឋកិច្ចដើរថយក្រោយ។ ហើយគេពិបាកនឹងវាយតម្លៃអំពីទំហំនៃផលលំបាកសេដ្ឋកិច្ចពិភពលោកនាពេលខាងមុខណាស់។ នេះបើតាមប្រសាសន៍របស់លោកស្រី Kristalina Georgieva អគ្គនាយិកា មូលនិធិរូបិយវត្ថុអន្តរជាតិ។
“សម្រាប់ពិភពលោកមួយភាគធំ ឆ្នាំនេះជាឆ្នាំដ៏លំបាក លំបាកជាងឆ្នាំមុនដែលទើបកន្លងផុតទៅនេះទៀត។ ហេតុអ្វី ? ពីព្រោះមហាអំណាចសេដ្ឋកិច្ចពិភពលោកទាំងបីចម្បងគេ គឺសហរដ្ឋអាមេរិក សហភាពអឺរ៉ុប និងចិន កំពុងមានស្ថានភាពសេដ្ឋកិច្ចដើរបន្ថយល្បឿនទាំងបីព្រមគ្នា។
សហរដ្ឋអាមេរិក ធន់គ្រាន់បើជាងគេ ដោយអាចបញ្ចៀសវិបត្តិសេដ្ឋកិច្ចដើរថយក្រោយបាន។ គេសង្កេតឃើញទីផ្សារការងារនៅតែបន្តខ្លាំងរឹងមាំដដែល។ ប៉ុន្តែទន្ទឹមនឹងការទប់ទីផ្សារការងារឱ្យមានសុខភាពល្អរឹងមាំនេះ អាមេរិកក៏ត្រូវហ៊ានលះបង់ខ្លះដែរ។ ធនាគារកណ្តាលអាមេរិកត្រូវបន្តប្រកាន់នយោបាយរូបិយបណ្ណតឹងតែងរយៈពេលយូរខ្លាំង ដើម្បីអាចបញ្ចុះវិបត្តិអតិផរណាបាន។
សហភាពអឺរ៉ុប រងផលប៉ះពាល់យ៉ាងធ្ងន់ធ្ងរខ្លាំងពីសង្គ្រាមនៅអ៊ុយក្រែន។ សមាជិកសហភាពអឺរ៉ុបចំនួនពាក់កណ្តាលនឹងត្រូវធ្លាក់ក្នុងវិបត្តិសេដ្ឋកិច្ចដើរថយក្រោយ នៅឆ្នាំ២០២៣នេះ។
ចំណែកចិនវិញ ឆ្នាំនេះ ជាឆ្នាំដ៏លំបាក ហើយលំបាកជាងឆ្នាំមុនទៀត។
ដោយសារហេតុផលនេះទើបគេអាចបកស្រាយបានថា សេដ្ឋកិច្ចកំរិតពិភពលោក ត្រូវតែមានដំណើរអវិជ្ជមាន។
បើក្រលេកទៅមើលទីផ្សាររបស់ប្រទេសកំពុងលូតលាស់និងសេដ្ឋកិច្ចរបស់ក្រុមប្រទេសកំពុងប្រទេសកំពុងអភិវឌ្ឍន៍ សន្ទទស្សន៍រឹតតែអាក្រក់ខ្លាំងទៀត ព្រោះបន្ថែមពីលើផលវិបាកសេដ្ឋកិច្ចផ្សេងៗ ក្រុមប្រទេសទាំងអស់នោះត្រូវប្រឈមនឹងការឡើងថ្លៃនៃអត្រាការប្រាក់ និងតម្លៃលុយដុល្លារខ្ពស់។ នេះជាមហន្តរាយ សម្រាប់សេដ្ឋកិច្ចរបស់ប្រទេស ដែលមានបំណុលខ្ពស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ