បារាំងដកទ័ពចេញពីបួគីណាហ្វាសូ ហើយហៅឯកអគ្គរដ្ឋទូតត្រលប់ចូលស្រុក
បន្ទាប់ពីម៉ាលី បួគីណាហ្វាសូគឺជាប្រទេសទីពីរនៅតំបន់អាហ្វ្រិកសាហ៊ែល ដែលលែងត្រូវការកងទ័ពបារាំង។ ជាមួយនឹងការសម្រេចបញ្ចប់វត្តមានកងទ័ពបារាំងនៅបួគីណាហ្វាសូ នៅមួយខែទៀត តាមការចង់បានរបស់ម្ចាស់ផ្ទះ បារាំងបានប្រកាស នៅថ្ងៃព្រហស្បតិ៍នេះ កោះហៅ ឯកអគ្គរដ្ឋទូតរបស់ខ្លួនឱ្យត្រលប់ចូលស្រុកវិញ ដើម្បីពិគ្រោះយោបល់។
ចុះផ្សាយនៅថ្ងៃ៖
ស្តាប់ - ០២:០០
នៅក្នុងសេចក្តីថ្លែងការណ៍ ក្រសួងការបរទេសបានពន្យល់ថាត្រូវការជួបពិភាក្សាជាមួយឯកអគ្គរដ្ឋទូតបារាំងប្រចាំបួគីណាហ្វាសូ ដើម្បីពិចារណាអំពីទស្សនៈវិស័យនៃកិច្ចសហប្រតិបត្តិការរវាងប្រទេសទាំងពីរនាពេលអនាគត។ ការហៅទូតត្រលប់ចូលស្រុកវិញដើម្បីពិគ្រោះ ជាភាសាទូតដែលចង់បញ្ជាក់អំពីការមិនពេញចិត្ត ឬពេលមានវិបត្តិការទូតនឹងគ្នា។ ហើយការហៅទូតបារាំងប្រចាំបួគីណាហ្វាសូ ប្រព្រឹត្តទៅចំពេលដែលរបបសឹកបួគីណាហ្វាសូ ស្នើសុំឱ្យប្តូរទូតផង និងតែមួយថ្ងៃក្រោយការប្រកាសកងទ័ពបារាំងចេញពីប្រទេសនេះទៀត។
កាលពីខែធ្នូ បួគីណាហ្វាសូបានផ្ញើលិខិតមួយសុំឱ្យប៉ារីសដូរឯកអគ្គរដ្ឋទូត ដែលបាននិយាយអំពីស្ថានភាពសន្តិសុខប្រទេសបួគីណាហ្វាសូជាសាធារណៈ។ តែពុំឃើញបារាំងប្តូរផ្លាស់អ្វីទេ។ ទំនាក់ទំនងហាក់បានប្រសើរឡើង នៅពេលរដ្ឋលេខាធិការបារាំងទៅបំពេញទស្សនកិច្ចនៅបួគីណាហ្វាសូថ្ងៃទី១០ មករា ប្រកាសពង្រីកជាដៃគូក្នុងការប្រយុទ្ធប្រឆាំងនឹងជីហាតនិយម។ ប៉ុន្តែនៅថ្ងៃអង្គារម្សិលម្ង៉ៃ រដ្ឋាភិបាលបួគីណាហ្វាសូស្រាប់តែក្រលាស់ចិត្តផ្ញើលិខិតផ្លូវការ បរិហារកិច្ចព្រមព្រៀងឆ្នាំ២០១៨ ស្តីពីលក្ខន្តិកៈរក្សាវត្តមានទាហានបារាំងក្នុងប្រទេសនេះ ដោយទុកពេលឱ្យបារាំងមួយខែសម្រាប់ដកទ័ពចេញពីទឹកដីបួគីណាហ្វាសូ។ បារាំងគ្មានពាក្យអ្វីក្រៅអំពីគោរពតាមសំណើទេ។
ប្រឈមនឹងទំនាក់ទំនងអាប់អួរ និងអារម្មណ៍ប្រឆាំងបារាំងកាន់ខ្លាំងនៅក្នុងប្រទេស អ្នកទទួលខុសត្រូវបារាំងបានព្រលយតាំងពីជាច្រើនខែមកថាកងកម្លាំងពិសេសបារាំងចាំតែម្ចាស់ផ្ទះសម្រេចចិត្តប៉ុណ្ណោះ។ កងទ័ពបារាំងទាំង៤០០នាក់ត្រូវចាកចេញពីបួគីណាហ្វាសូនៅចុងខែកុម្ភៈ ចំណែកការដកសព្វាវុធនឹងបញ្ចប់នៅចុងខែមេសា។
លែងត្រូវការវត្តមានទ័ពបារាំង តែចង់រក្សាទំនាក់ទំនងការទូត នាយករដ្ឋមន្ត្រីបួគីណាហ្វាសូ បានធ្វើដំណើរទៅមូស្គូ ដោយស្ងាត់ៗ រួចប្រកាសថារុស្ស៊ីគឺជាជម្រើសសមហេតុផល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ