ម៉ាលីលុបចោលកិច្ចព្រមព្រៀងសហប្រតិបត្តិការកងទ័ពជាមួយបារាំងនិងអឺរ៉ុប
ទំនាក់ទំនងម៉ាលី និងសម្ព័ន្ធមិត្ត ក្នុងការប្រយុទ្ធប្រឆាំងនឹងពួកជីហាត បានធ្លាក់ចុះកាន់តែដុនដាបមួយកំរិតបន្ថែមទៀត។ ក្នុងខណៈដែលកងទ័ពបារាំង (Barkhane បាខាន) និងកងទ័ពអឺរ៉ុប (Takuba តាគូបា) កំពុងចាប់ផ្តើមដកខ្លួនចេញពីម៉ាលី នៅល្ងាចថ្ងៃចន្ទទី ២ឧសភាម្សិលមិញ របបសឹកម៉ាលី បានប្រកាស លុបចោលកិច្ចព្រមព្រៀងសហប្រតិបត្តិការយោធាជាមួយបារាំងនិងអឺរ៉ុប តែម្តង។ ក្រសួងការបរទេសម៉ាលីបានជូនដំណឹងដល់ភាគីបារាំងរួចហើយ។
ចុះផ្សាយនៅថ្ងៃ៖
ស្តាប់ - ០១:៥៩
នៅក្នុងសេចក្តីថ្លែងការណ៍ដែលអានដោយអ្នកនាំពាក្យរដ្ឋាភិបាល តាមកញ្ចក់ទូរទស្សន៍ជាតិ រដ្ឋាភិបាលម៉ាលី បានបរិហារកិច្ចសហប្រតិបត្តិការកងទ័ព ដែលបារាំងនិងម៉ាលីបានចុះហត្ថលេខាកាលពី ឆ្នាំ២០១៤ ព្រមទាំងកិច្ចព្រមព្រៀងយោធាដែលជាលក្ខន្តិកៈកំណត់អំពីវត្តមានកងទ័ពបារាំង Barkhane និងអឺរ៉ុបTakuba នៅលើទឹកដីម៉ាលី។ ក្រុងបាម៉ាកូ បានថែមទាំងប្រកាស ចាត់ទុកជាមោឃៈ ទៀតនូវ កិច្ចព្រមព្រៀងរវាងម៉ាលីជាមួយបណ្តាអឺរ៉ុប នាំមុខដោយបារាំង ក្នុងក្របខ័ណ្ឌនៃប្រតិបត្តិការប្រយុទ្ធប្រឆាំងភេវកម្មនៅសាហ៊ែល ឬហៅកាត់ថាប្រតិបត្តិការ តាកូបា។
មូលហេតុនៃការផ្តាច់កិច្ចព្រមព្រៀង គឺបណ្តាលមកពី បារាំងដែលមានបញ្ជូនទាហានទៅ ម៉ាលីតាំងពីឆ្នាំ២០១៣មក បានរំលោភយ៉ាងងងើលអធិបតេយ្យភាពជាតិម៉ាលី។ នេះបើតាមការសេចក្តីថ្លែងការណ៍ដដែលដែលរំលើកថា បារាំងបានធ្វើសកម្មភាពជាឯកតោភាគី នៅពេលប្រតិបត្តិការយោធារួម បារាំង-ម៉ាលី ត្រូវព្យួរនៅខែមិថុនាឆ្នាំ២០២១ និងថែមទាំងបានសម្រេចចិត្តដកកងទ័ពបាកាន និងតាគូបាចេញ ដោយគ្មានពិគ្រោះយោបល់ជាមួយភាគីម៉ាលីទេ។ ជាងនេះទៅទៀត បារាំងរំលោភដែនអាកាសជាច្រើនដងណាស់ បើទោះបីជាអាជ្ញាធរម៉ាលីបានបង្កើតតំបន់ហោះហើរហាមឃាត់យ៉ាងណាក៏ដោយ។
ការជូនដំណឹងលុបចោលកិច្ចសហប្រតិបត្តិការយោធាបារាំង-ម៉ាលី នឹងចូលជាធរមាន ជាផ្លូវការនៅ៦ខែទៀតខាងមុខ។ ផ្ទុយទៅវិញ ម៉ាលីសូមរំលាយចោលភ្លាមនូវលក្ខន្តិកៈយោធាខែមីនា២០១៣ (Status of Force Agreements)ដែលផ្តល់កំណើតដំបូងឱ្យកងកម្លាំង Serval បន្ទាប់មក Barkhane និងតាំងពីឆ្នាំ២០២០មក ក្លាយជាកងកម្លាំងពិសេសអឺរ៉ុប Takuba ។ ការរំលាយកិច្ចព្រមព្រៀងភ្លាមមួយរំពេចនេះ អាចប៉ះពាល់ដល់ដំណើរការដកកងទ័ពបារាំងនិងអឺរ៉ុបដែលតាមធម្មតាត្រូវការពេលវេលាពី៤ទៅ៦ខែ។ ពុំទាន់មានប្រតិកម្មជាផ្លូវការមកពីខាងបារាំងទេ។
សេចក្តីសម្រេចរបស់ម៉ាលីដើរចេញពីបារាំងនិងដៃគូអឺរ៉ុប ប្រព្រឹត្តទៅក្រោយការបិទបន្ទាយយោធាបារាំងដ៏ធំនៅភាគខាងជើងម៉ាលី។ កាលពីសប្តាហ៍មុន យោធាបារាំង បានទម្លាយឱ្យឃើញតាមរយៈរូបភាពថតដោយដ្រូន គំនរឆ្អឹងនិងសាកសពក្នុងបន្ទាយ និងបានចោទថាជាស្នាដៃរបស់ក្រុមប្រដាប់អាវុធរុស្ស៊ី Wagner ។ រដ្ឋាភិបាលបាម៉ាកូបានបញ្ចេញប្រតិកម្មទាំងកំហឹងនៅថ្ងៃទី២៧មេសា ចោទយោធាបារាំងវិញថាលួចធ្វើចារកិច្ច ឬវិទ្ធង្សនា ឬរំលោភដែនអាកាសម៉ាលី។ តែបារាំងបានច្រានចោលពាក្យចោទរបស់ម៉ាលីទាំងស្រុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ