យូនេស្កូបើកសន្និសីទពិភពលោកប្រឆាំងព័ត៌មានក្លែងក្លាយនិងសារស្អប់ខ្ពើមតាមអ៊ីនធ័រនែត
សន្និសីទពិភពលោករបស់អង្គការយូនេស្កូ បាននិងកំពុងប្រព្រឹត្តទៅនៅទីក្រុងប៉ារីស នាថ្ងៃពុធទី២១កុម្ភៈនិងព្រហស្បតិ៍នេះ ក្រោមប្រធានបទ “ដើម្បីអ៊ីនធ័រនែតជាទីគួរឱ្យទុកចិត្ត”។ តំណាងរដ្ឋាភិបាល អង្គការស្ថាប័នផ្លូវការ ក្រុមហ៊ុនសហគ្រាសឌីជីថល សកលវិទ្យាល័យ និងសង្គមស៊ីវិលមកពីគ្រប់ជ្រុងនៃផែនដី ប្រមាណ១៥០០នាក់ដែលមកចូលរួមក្នុងសន្និសីទដោយផ្ទាល់នៅប៉ារីស ឬតាមប្រព័ន្ធវីដេអូ ត្រូវជជែករកមធ្យោបាយប្រយុទ្ធប្រឆាំងនឹងការផ្សព្វផ្សាយព័ត៌មានមិនពិត និងការបង្ហោះសារបែបស្អប់ខ្ពើមគ្នាតាមប្រព័ន្ធអ៊ីនធ័រនែត។ យូនេស្កូនឹងចេញគោលការណ៍ណែនាំរួមនិងអន្តរជាតិ នៅពាក់កណ្តាលឆ្នាំ២០២៣។
ចុះផ្សាយនៅថ្ងៃ៖
ស្តាប់ - ០២:១០
រៀបចំឡើងតាមការអំពាវនាវរបស់លោកអគ្គលេខាធិការអង្គការសហប្រជាជាតិ អង់តូនីញ៉ូ ហ្គូទែរស៍ ដើម្បីប្រយុទ្ធប្រឆាំងនឹងការផ្សព្វផ្សាយព័ត៌មានក្លែងក្លាយ និងការបដិសេធមិន ទទួលការពិតបំភ្លឺតាមបែបវិទ្យាសាស្ត្រ យូនេស្កូគូសបញ្ជាក់ថា នេះជាសន្និសីទពិភពលោកលើកដំបូងបង្អស់ដែលឧទ្ទិសដល់ការគំរាមកំហែងព័ត៌មានទាំងមូល និងសេរីភាពនៃការបញ្ចេញយោបល់តាមប្រព័ន្ធសង្គម។
សម្រាប់លោកស្រីនាយិកាអង្គការដើម្បីការអប់រំ វិទ្យាសាស្ត្រ និងវប្បធម៌របស់អង្គការសហប្រជាជាតិ (អង្គការយូណេស្កូ) ប្រព័ន្ធអ៊ីនធ័រនែត បានប្តូរផ្លាស់របៀបប្រឈមនឹងពិភពលោក និងមនុស្សផ្សេងទៀត។ ភាពជឿនលឿននៃបច្ចេកវិទ្យាអាចជាបដិវត្តដែលមើលរំលងសិទ្ធិមនុស្ស សេរីភាពនៃការបញ្ចេញមតិ និងប្រជាធិបតេយ្យ ដូច្នេះដើម្បីរក្សាតម្លៃព័ត៌មាន ជាទ្រព្យរួម យើងត្រូវពិចារណានិងបញ្ចេញសកម្មភាពរួម។ នេះជាប្រសាសន៍របស់លោកស្រីនាយិកាអង្គការយូណេស្កូពេលថ្លែងបើកសន្និសីទ ដោយសង្កត់ធ្ងន់ថា បណ្តាញសង្គម មានចំណែកទទួលខុសត្រូវមួយផ្នែកខាងផ្សព្វផ្សាយព័ត៌មានមិនពិត ក្លែងកា្លយ និងសារបញ្ឆេះភាពស្អប់ខ្ពើមគ្នា ព្រមទាំងមនោគមវិជ្ជាប្រឆាំង។
សម្រាប់យូណេស្កូ មានប្រទេសច្រើនហើយបានអនុម័ត ខ្លះគ្រោងនឹងអនុម័តច្បាប់ជាតិ ប្រឆាំងនឹងការផ្សព្វផ្សាយព័ត៌មានមិនពិត ឬក្លែងក្លាយ តែច្បាប់នោះខ្លះប៉ះពាល់ខ្លាំងដល់សិទ្ធិសេរីភាពនៃការបញ្ចេញមតិ និងយោបល់របស់ប្រជាពលរដ្ឋ។ ដូច្នេះ ពិភពលោកត្រូវរួសរាន់អនុម័តដំណោះស្រាយកំរិតពិភពលោកដ៏ស៊ីចង្វាក់មួយ ដោយឈរលើបទដ្ឋានអន្តរជាតិក្នុងវិស័យសិទ្ធិមនុស្ស។ យូណេស្កូ សង្ឃឹមថានឹងអាចសម្រេចផ្សព្វផ្សាយគោលការណ៍រួម នៅពាក់កណ្តាលឆ្នាំ សម្រាប់ឱ្យរដ្ឋាភិបាល អង្គការស្ថាប័ន សង្គមស៊ីវិលនានា យកទៅអនុវត្ត។
ក្នុងចំណោមវាគ្មិនចម្បងៗនៃសន្និសីទ គេសង្កេតឃើញមានរូបលោកស្រី ម៉ារីយ៉ា រ៉េសា ជ័យលាភីណូបែលសន្តិភាពជាតិហ្វីលីពីនដែលបានរៀបរាប់យ៉ាងលម្អិតអំពីយុទ្ធនាការប្រឆាំងនឹងលោកស្រីដែលទទួលសារបែបស្អប់ខ្ពើម ប្រមាណ៩៨សារក្នុងមួយម៉ោង។ សុន្ទរកថារបស់ប្រធានាធិបតីប្រេស៊ីលលូឡា រំលឹកអំពីអំពើហិង្សាញុះញង់ដោយក្រុមជ្រុលនិយម ក៏មានអានក្នុងកម្មវិធីបើកសន្និសីទពិភពលោកនេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ