លោកប្រមុខការទូតសហភាពអឺរ៉ុបថ្លែងថា អឺរ៉ុបត្រូវតែចៀសវាង កុំឲ្យសេដ្ឋកិច្ចខ្លួនទៅពឹងផ្អែកខ្លាំងនឹងចិន
អឺរ៉ុបមិនអាចផ្តេកផ្តួល ពឹងផ្អែកទៅលើចិនខ្លាំងពេកនោះទេ ដោយត្រូវងាកទៅរកដៃគូសេដ្ឋកិច្ចផ្សេងទៀតឲ្យបានច្រើន។ នេះគឺជាប្រសាសន៍លើកឡើង របស់លោក ហ្សូហ្សែហ្វ បូរែល ប្រមុខការទូតអឺរ៉ុប។ លោកបញ្ជាក់ថា បទពិសោធន៍បានបង្ហាញឲ្យឃើញរួចមកហើយ ជាមួយនឹងការគិតខុសរបស់អឺរ៉ុប ដែលពឹងផ្អែកខ្លាំងជ្រុលទៅលើឧស្ម័ននាំចូលពីរុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
ថ្លែងនៅក្នុងវេទិកាមួយនៅសាធារណរដ្ឋដូមីនីក លោក Josep Borrell ប្រមុខការទូតអឺរ៉ុប បានអះអាងថា អឺរ៉ុបកំពុងតែព្យាយាមស្វែងរកផ្លូវ ដើម្បីងាកចេញពីការពឹងផ្អែកខ្លាំងជ្រុលទៅលើចិន។ លោកអះអាងថា អឺរ៉ុបបានយល់ថា « ការពឹងផ្អែក » ដែលជាធាតុផ្សំមួយនៃការស្ថាបនាសន្តិភាពពិតមែន តែវាក៏អាចក្លាយជាអាវុធ ដែលអាចបង្វែរចុងមកធ្វើទុក្ខអឺរ៉ុបវិញដែរ។
លោកប្រមុខការទូតអឺរ៉ុបបានលើកជាឧទាហរណ៍ ដូចក្នុងករណីបទពិសោធន៍ ដែលអឺរ៉ុបពឹងផ្អែកជ្រុលពេក ទៅលើឧស្ម័នរបស់រុស្ស៊ី។ សង្គ្រាមនៅអ៊ុយក្រែន បានធ្វើឲ្យអឺរ៉ុបភ្លឺភ្នែក បន្ទាប់ពីរុស្ស៊ីបានកាត់បន្ថយការនាំចេញឧស្ម័ន បង្ខំឲ្យអឺរ៉ុបត្រូវតែរកអ្នកផ្គត់ផ្គង់ផ្សេងទៀតឲ្យបានភ្លាមៗ។ លោកបន្ថែមថា ការពឹងផ្អែកខ្លាំងជ្រុលរបស់អឺរ៉ុបនេះ ទំនងជាបានធ្វើឲ្យប្រធានាធិបតីរុស្ស៊ី គិតថាខ្លួនអាចធ្វើអ្វីក៏បាន អាចលើកទ័ពចូលឈ្លានពានអ៊ុយក្រែន ដោយអឺរ៉ុបនឹងឱបដៃឈរមើល មិនហ៊ានធ្វើអ្វី ព្រោះអឺរ៉ុបជាប់ក្នុងរនាំងឧស្ម័នរបស់រុស្ស៊ី។
លោក Josep Borrell បន្តថា អឺរ៉ុបត្រូវតែបញ្ចៀសបញ្ហានេះ ជាមួយចិនទៅថ្ងៃខាងមុខ ដោយធ្វើយ៉ាងណាឈប់ពឹងទាំងស្រុងលើចិន និងងាកទៅរកចាប់ដៃគូសេដ្ឋកិច្ចជាមួយអ្នកផ្សេង។ ២០២៣ គឺជាឆ្នាំយុទ្ធសាស្រ្តដ៏សំខាន់ ដើម្បីឲ្យអឺរ៉ុប អាចចុះហត្ថលេខាសហប្រតិបត្តិការសេដ្ឋកិច្ចពាណិជ្ជកម្ម ជាមួយបណ្តាប្រទេសផ្សេងទៀត ជាអាទិ៍ប្រទេសក្នុងតំបន់អាមេរិកឡាទីន ដែលពោរពេញដោយសក្តានុពល។ លោកបញ្ជាក់បន្ថែមថា បច្ចុប្បន្ននេះ ទំហំទឹកប្រាក់វិនិយោគរបស់អឺរ៉ុបនៅក្នុងតំបន់អាមេរិកឡាទីន គឺមានទំហំធំជាង ទឹកប្រាក់វិនិយោគរបស់រុស្ស៊ី ចិន ឥណ្ឌា និងជប៉ុនបូកបញ្ចូលគ្នាទៅទៀត។
សូមបញ្ជាក់ថា នៅពាក់កណ្តាលខែកក្កដាខាងមុខ អឺរ៉ុបនឹងរៀបចំជំនួបកំពូលពិសេសមួយ ជាមួយនឹងក្រុមប្រទេសអាេមរិកឡាទីននឹងតំបន់សមុទ្រការ៉ាអ៊ីប (CELAC)។ យោងតាមតួលេខ របស់គណកម្មការសេដ្ឋកិច្ចសម្រាប់តំបន់អាមេរិកឡាទីននិងការ៉ាអ៊ីប នៃអង្គការសហប្រជាជាតិ គឺឆ្នាំ២០២១ ទឹកប្រាក់វិនិយោគរបស់អឺរ៉ុប មានចំនួន៣៦% នៃចំនួន១៤២ពាន់លានដុល្លារ ដែលជាទឹកប្រាក់វិនិយោគបរទេសរួម នៅក្នុងតំបន់នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ