អ៊ុយក្រែន ចាត់ទុកថាបេឡារុស ត្រូវរុស្ស៊ីយកធ្វើជា « ចំណាប់ខ្មាំងនុយក្លេអ៊ែរ »
កាលពីថ្ងៃសៅរ៍ទី២៥មីនា លោកពូទីន ប្រធានាធិបតីរុស្ស៊ី បានប្រកាសថា នឹងដាកពង្រាយអាវុធនុយក្លេអ៊ែរយុទ្ធសាស្ត្រ នៅលើទឹកដីបេឡារុស ដែលជាសម្ព័ន្ធមិត្តរបស់រុស្ស៊ី។ ប្រតិកម្មចំពោះដំណឹងនេះ រដ្ឋាភិបាលអ៊ុយក្រែន បានចាត់ទុកថាប្រទេសបេឡារុស កំពុងតែក្លាយជាចំណាប់ខ្មាំងនុយក្លេអ៊ែរ របស់រុស្ស៊ីហើយ។
ចុះផ្សាយនៅថ្ងៃ៖
ស្តាប់ - ០២:០៨
ចាប់ពីថ្ងៃទី១កក្កដាទៅ កងទ័ពរុស្ស៊ីនឹងចាប់ផ្តើមបណ្តុះបណ្តាលទាហានជំនាញ ដើម្បីប្រើប្រាស់យន្តហោះចម្បាំងចំនួន១០គ្រឿង ដែលនឹងត្រូវបំពាក់ដោយអាវុធនុយក្លេអ៊ែរយុទ្ធសាស្ត្រ។ លោកពូទីន អះអាងទៀតថា កងទ័ពរុស្ស៊ីនឹងកសាងទីតាំងថ្មីមួយកន្លែង ដើម្បីស្តុកអាវុធប្រភេទនេះ នៅក្នុងប្រទេសបេឡារុស ដោយលោកប្រធានាធិបតីបេឡារុស បានអនុញ្ញាតរួចរាល់ហើយ។
លោកពូទីនអះអាងថា តាមរយៈការសម្រេចនេះ គឺរុស្ស៊ីមិនបានរំលោភបំពានទៅលើការសន្យារបស់ខ្លួនជាលក្ខណៈអន្តរជាតិ ទាក់ទិននឹងការមិនរីកសាយភាពអាវុធនុយក្លេអ៊ែរនោះឡើយ។ លោកបន្ថែមថា ជាងនេះទៀត ការពិតទៅ អាមេរិកបានដាក់ពង្រាយអាវុធនុយក្លេអ៊ែរយុទ្ធសាស្ត្រ នៅតាមដែនដីសម្ព័ន្ធមិត្តគេ រាប់សិបឆ្នាំមកហើយ។
លោក Oleksiï Danilov ទីប្រឹក្សាសន្តិជាតិអ៊ុយក្រែន បានបរិហារថា ក្រេមឡាំង កំពុងតែយកបេឡារុស ជាចំណាប់ខ្មាំងនុយក្លេអ៊ែររបស់ខ្លួន។ ការសម្រេចរបស់លោកពូទីននេះ គឺជាជំហានថ្មីមួយទៀត ធ្វើឲ្យស្ថិរភាពនយោបាយផ្ទៃក្នុងបេឡារុស កាន់តែប្រឈមគ្រោះថ្នាក់។ មតិសាធារណៈបេឡារុស នឹងកាន់តែខឹង ស្អប់រុស្ស៊ី ព្រមទាំងលោកពូទីនកាន់តែខ្លាំង។
គួរបញ្ជាក់ដែរថា ការប្រកាសរបស់លោកពូទីន ដាក់ពង្រាយអាវុធនុយក្លេអ៊ែរយុទ្ធសាស្ត្រនៅបេឡរុសនេះ គឺត្រូវបានធ្វើឡើង បន្ទាប់ពីរដ្ឋាភិបាលអង់គ្លេស បានអះអាងថា គេអាចនឹងសម្រេចបញ្ជូនគ្រាប់កាំភ្លើងត្បាល់ផ្ទុកសារធាតុអ៊ុយរ៉ានីញ៉ូមខ្សោយ ទៅឲ្យអ៊ុយក្រែន។ ប្រតិកម្មចំពោះដំណឹងនេះ លោកពូទីនបានលើកឡើងថា រុស្ស៊ីមិនចង់អួតទេ តែគ្រាប់កាំភ្លើងត្បាល់ប្រភេទនេះ រុស្ស៊ីមានរាប់សែនគ្រាប់ឯណោះ ដែលពេលនេះរុស្ស៊ីមិនទាន់បញ្ចេញយកមកប្រើទេ។
គួរកត់សំគាល់ដែរថា ដំណឹងថ្មីៗនេះ បានធ្វើឲ្យគេមានការព្រួយបារម្ភកាន់តែខ្លាំង ថាសង្គ្រាមនេះអាចឈានទៅដល់ការប្រើអាវុធនុយក្លេអ៊ែរ ទោះខ្សោយឬខ្លាំង។ ការបោះជំហានថ្មីរបស់លោកពូទីននៅពេលនេះ ហាក់ដូចជាផ្ទុយនឹងកាសន្យា ដែលលោកបានប្រកាសរួមគ្នាជាមួយលោកស៊ី ជីនពីង នៅទីក្រុងម៉ូស្គូ កាលពីដើមសប្តាហ៍នេះ ដែលថា សង្គ្រាមនុយក្លេអ៊ែរនឹងមិនអាចផ្ទុះឡើងបានទេ ព្រោះវានឹងគ្មានអ្នកឈ្នះទោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ