របាយការណ៍៖ គ្មានកន្លែងណាមួយនៅលើផែនដី ដែលគ្មានការបំពុលប្លាស្ទិក
ខណៈដែលការបំពុលបា្លស្ទិកកំពុងគំរាមកំហែងជីវិតមនុស្ស សត្វនៅលើផែនដី ការផលិតប្លាស្ទិក នៅក្នុងពិភពលោក ទំនងកើនឡើងទ្វេដង ពីពេលនេះដល់ឆ្នាំ ២០៥០។ នេះបើតាមរបាយការណ៍ របស់ក្រុមប្រឹក្សាសេដ្ឋកិច្ច សង្គម និងបរិស្ថាន ដែលមានទីតាំងនៅប្រទេសបារាំង។ នៅក្នុងរបាយការណ៍ ចេញផ្សាយកាលពីថ្ងៃអង្គារ ទី ១១មេសា ក្រុមប្រឹក្សាខាងលើបានស្នើអនុសាសន៍ ផ្លូវច្បាប់ មួយចំនួនសម្រាប់សេចក្តីព្រាងសន្ធិសញ្ញាអន្តរជាតិ ស្តីពីការកាត់បន្ថយបា្លស្ទិក ដែលអង្គការសហប្រជាជាតិគ្រោងនឹងបោះឆ្នោតអនុម័តយ៉ាងយូរបំផុត នៅ ឆ្នាំ ២០២៤។
ចុះផ្សាយនៅថ្ងៃ៖ កែប្រែថ្ងៃទី៖
ជាអ្នកជំរុញឲ្យមានការបង្កើតសន្ធិសញ្ញាអន្តរជាតិស្តីពីការប្រយុទ្ធប្រឆាំងការបំពុលបា្លស្ទិក ក្រុមប្រឹក្សាសេដ្ឋកិច្ច សង្គម និងបរិស្ថានបានចេញរបាយការណ៍ថ្មីដើម្បីទាញសញ្ញាអាសន្នពីគ្រោះថ្នាក់នៃសំរាមប្លាស្ទិក ទៅលើសុខភាពមនុស្ស ធម្មជាតិ ជីវិតសត្វលើផែន និងការប្រែប្រួលអាកាសធាតុ។
តាមអ្នកសរសេររបាយការណ៍របស់ក្រុមប្រឹក្សាសេដ្ឋកិច្ច សង្គម និងបរិស្ថាន ការបំពុលបា្លស្ទិក មាននៅគ្រប់កន្លែង នៅលើផែនដី មិនថា ក្នុងទឹក ក្រោមដី ឬនៅក្នុងអាកាស។ តាំងពីតំបន់ដាច់ស្រយាលគ្មានមនុស្សរស់នៅដូចជានៅ ប៉ូលទឹកកកខាងជើង រហូតដល់បាតមហាសមុទ្រ គ្មានកន្លែងណាមួយដែលជៀសរួចផុតពីការបំពុលបា្លស្ទិក។
លេចរូបរាងដំបូងនៅសតវត្សរ៍ទី១៩ និងត្រូវគេផលិតក្នុងទ្រង់ទ្រាយធំ នៅក្រោយសង្រ្គាមលោកលើកទី២ ប្លាស្ទិកត្រូវគេពេញនិយមប្រើ នៅក្នុងជីវិតប្រចាំថ្ងៃ។ គេវាយតម្លៃថា ថា ការផលិតប្លាស្ទិកនឹងអាចកើនឡើងទ្វេដងពីពេលនេះ រហូតដល់ឆ្នាំ ២០៥០។ តាមអង្គការសហប្រតិបត្តិការOCDE នៅឆ្នាំ ២០១៩ ពិភពលោកផលិតបា្លស្ទិកប្រមាណ ៤៦០លានតោន ដែលនៅក្នុងនោះ មានតែ ៩%ដែលត្រូវគេយកទៅកែច្នៃ សម្រាប់ការប្រើប្រាស់ឡើងវិញ ចំណែក៨១%បានក្លាយជាសំរាមប្លាស្ទិក។ របាយការណ៍របស់អង្គការសហប្រជាជាតិធ្លាប់បង្ហាញថា សំរាមប្លាស្ទិកក្នុងពិភពលោក បានកើនឡើង ដល់ ៨ ពាន់លានតោន។
ជារៀងរាល់ឆ្នាំ សំរាមប្លាស្ទិកជាង ៨ លានតោន បានហូរចូលទៅក្នុងទឹកសមុទ្រ ដោយបំផ្លាញប្រព័ន្ធអេកូឡូស៊ីធម្មជាតិ បង្កគ្រោះថ្នាក់ដល់ជីវិតមនុស្សសត្វនៅលើផែនដី។
សម្រាប់មនុស្ស មីក្រូបា្លស្ទិក និងណាណូប្លាស្ទិកអាចជ្រាបចូលក្នុងខ្លួនមនុស្សតាមរយៈ ការបរិភោគចំណីអាហារដែលមានមីក្រូបា្លស្ទិក ការដកដង្ហើម និងការជា្របតាមស្បែក។ របាយការណ៍របស់អង្គការការពារសត្វព្រៃ WWF នៅឆ្នាំ ២០១៩ បង្ហាញថា បុគ្គលម្នាក់ៗអាចស្រូបយកមីក្រូបា្លស្ទិក ប្រមាណ ២០០០ ក្នុងមួយសប្តាហ៍ ស្មើនឹង៥ក្រាម ដែលមានទំងន់ប៉ុន កាតធនាគារមួយ។
ដូច្នេះ ដើម្បី ជីវិតសុខភាពមនុស្ស និងសុវត្ថិភាពសម្រាប់ប្រព័ន្ធជីវចម្រុះ នៅលើផែនដី ក្រុមប្រឹក្សាសេដ្ឋកិច្ច សង្គម និងបរិស្ថានបានដាក់សំណើមួយចំនួន ដើម្បីកាត់បន្ថយវត្តមានប្លាស្ទិក ដូចជា ការហាមមិនឲ្យមានការផលិតវត្ថុប្លាស្ទិក សម្រាប់ប្រើតែមួយដង រួចបោះចោល។ សំណើរបស់ក្រុមប្រឹក្សា ដែលមានលក្ខណៈចាប់តម្រូវតាមផ្លូវច្បាប់ នឹងត្រូវគេយកទៅដាក់បញ្ចូល ជាមួយសំណើផ្សេងទៀត សម្រាប់អនាគត សន្ធិសញ្ញាអន្តរជាតិ ដើម្បីប្រយុទ្ធប្រឆាំងនឹងការបំពុលប្លាស្ទិក ដែលប្រទេសសមាជិកទាំង ១៧៥របស់អង្គការសហប្រជាជាតិ ត្រូវពិភាក្សា និងបោះឆ្នោតអនុម័ត យ៉ាងយូរបំផុត នៅឆ្នាំ២០២៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ