អង្គការយូណេស្កូ បិទបញ្ចប់កិច្ចប្រជុំស្តីពីការប្រយុទ្ធប្រឆាំងនឹងកាកសំណល់ប្លាស្ទិក
តំណាងប្រទេសចំនួន១៧៥ប្រទេស បានមកជួយប្រជុំគ្នា ពេញមួយសប្តាហ៍ នៅទីស្នាក់ការអង្គការយូណេស្កូ ក្នុងទីក្រុងប៉ារីស ដើម្បីជជែកពិភាក្សាគ្នា អំពីផែនការប្រយុទ្ធប្រឆាំងនឹងកាកសំណល់ប្លាស្ទិក។ ឆ្លងកាត់កម្មវិធីប្រជុំដ៏ធំ ដែលបានបិទបញ្ចប់កាលពីថ្ងៃសុក្រម្សិលមិញនេះ សមាជិកទាំងអស់បានសន្មត់គ្នាថា នឹងដាក់ស្នើនូវអត្ថបទព្រាងទីមួយ នៃសន្ធិសញ្ញាស្តីពីការប្រយុទ្ធប្រឆាំងនឹងកាកសំណល់ប្លាស្ទិក នៅរវាងចុងឆ្នាំ២០២៤។
ចុះផ្សាយនៅថ្ងៃ៖
ស្តាប់ - ០២:៣២
តំណាងអង្គការក្រៅរដ្ឋាភិបាល រួមជាមួយតំណាងប្រទេសចំនួន១៧៥ប្រទេស បានមកជួបជុំគ្នា ក្រោមការផ្តួចផ្តើមគំនិតរបស់អង្គការយូណេស្កូ ដើម្បីជជែកអំពីគម្រោងតាក់តែងសន្ធិសញ្ញាអន្តរជាតិ ប្រយុទ្ធប្រឆាំងនឹងកាកសំណល់ប្លាស្ទិក។ ជាអនាគតសន្ធិសញ្ញាដំបូងគេបង្អស់ ហើយដែលមានកម្លាំងចាប់បង្ខំផ្លូវច្បាប់ ឲ្យប្រទេសហត្ថលេខីត្រូវតែគោរព។
ការជជែកគ្នាពេញមួយសប្តាហ៍ បានចាប់ផ្តើមដោយការលើកឡើងអំពីបញ្ហានីតិវិធីច្បាប់ មុននឹងអ្នកចូលរួមទាំងអស់ បែងចែកគ្នាជា២ក្រុម ដើម្បីសិក្សាពិចារណា ថាតើគួរដាក់ចុះនូវវិធានការអ្វីខ្លះ ដើម្បីឈានទៅលប់បំបាត់នូវកាកសំណល់ប្លាស្ទិកតាមប្រទេសនីមួយៗ ឬក៏កំណត់អំពីកម្មវត្ថុពិភពលោក ដើម្បីដោះស្រាយបញ្ហានេះ។ ប្រទេសទាំងអស់នឹងចាប់ផ្តើមបង្ហាញអត្ថបទព្រាង នៅក្រោយពេលបានស្តាប់អំណះអំណាងរបស់ភាគីនីមួយ នៅក្នុងពេលប្រជុំចរចាលើកក្រោយ ដែលគ្រោងធ្វើនៅប្រទេសកេនយ៉ា នាខែវិច្ឆិកាខាងមុខ។
ប្រទេសដែលបានចូលរួមទាំងអស់ បានមូលមតិគ្នា ថានឹងរួមគ្នាតាក់តែងអត្ថបទមួយ ឈ្មោះ គម្រោងសូន្យ ដែលនៅថ្ងៃអនាគត អត្ថបទនេះ នឹងក្លាយជាសន្ធិសញ្ញាអន្តរជាតិមានកម្លាំងគតិយុទ្ធ ឈានទៅប្រយុទ្ធប្រឆាំងនឹងកាកសំណល់ប្លាស្ទិក។ សមាជិកទាំងអស់ក៏បានសន្យាគ្នាដែរ ថានឹងជជែកអំពីវិសាលភាពអនុវត្តនៃអត្ថបទនេះ ក៏ដូចជាគោលការណ៍ធំៗ រវាងដំណាក់កាលចរចាគ្នា។
គួរកត់សំគាល់ថា កិច្ចប្រជុំមួយសប្តាហ៍នៅអង្គការយូណេស្កូ ស្តីពីកាកសំណល់ប្លាស្ទិកនេះ បានចាប់ផ្តើមយ៉ាងយឺតយ៉ាវបំផុត ដោយ៣ថ្ងៃដំបូងគ្មានចេញជាលទ្ធផលអ្វីទាំងអស់។ ប្រទេសខ្លះដូចជា អារ៉ាប៊ីសាអូឌីទ ចិន និងរុស្ស៊ីបានទាមទារឲ្យសេចក្តីសម្រេចរបស់អង្គប្រជុំ ត្រូវតែអនុម័តដោយសម្លេងស្រុះស្រួលគ្នាជាឯកច្ឆ័ន្ទ ដែលមានន័យទេ បើមានប្រទេសតែ១ជំទាស់ គឺមិនអាចអនុម័តបាន។
តំណាងអង្គការ Greepeace បានលើកឡើងថាក្នុងពេលប្រជុំ ប្រទេសផលិតប្រេង ព្រមទាំងឧស្សាហកម្មថាមពលហ្វូស៊ីល បានប្រឹងប្រែងខ្លាំងសំបើមណាស់ ដើម្បីឲ្យអត្ថបទព្រាងនេះមានខ្លឹមសារខ្សោយបំផុត។ លោកស្រី Joëlle Hérin តំណាង Greepeace ស្វីសបានលើកឡើងថា ការងារនៅវែងឆ្ងាយខ្លាំងណាស់។ សន្ធិសញ្ញាអន្តរជាតិស្តីពីប្លាស្ទិក គឺត្រូវតែអាចអនុញ្ញាតឲ្យកាត់បន្ថយឲ្យបានច្រើនបំផុត នូវការផលិតផលិតផលនានាធ្វើពីប្លាស្ទិក។ លោកស្រីសង្កត់បន្ថែមថា ការកាត់បន្ថយការផលិតប្លាស្ទិក គឺជារឿងដ៏សំខាន់មិនអាចខ្វះបាន ដើម្បីឈានទៅទប់ការកើនឡើងកំដៅផែនដី មិនឲ្យឡើងលើសពី១,៥°c៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ