សីតុណ្ហភាពផ្ទៃមហាសមុទ្ទខែឧសភាឡើងក្តៅខ្លាំងបំផុត មិនធ្លាប់មានក្នុងកំណត់ត្រាមុនៗ
កាលពីខែមេសា កម្តៅផ្ទៃសមុទ្ទ បានបំបែកឯតទគ្គកម្មនៃសីតុណ្ហភាពប្រចាំឆ្នាំទៅហើយ។ ចូលដល់ខែឧសភា សីតុណ្ហភាពទឹកមហាសមុទ្ទ មិនបានប្រសើរទេ។ សីតុណ្ហភាពជាមធ្យមប្រចាំខែឧសភា២០២៣ ឡើងខ្ពស់ជាងមធ្យមភាគនៃឧសភាមុនៗទាំងអស់ ពោលគឺជាខែដែលផ្ទៃមហាសមុទ្ទក្តៅជាងគេបំផុត មិនធ្លាប់មានកត់ត្រាឡើយ។ នេះបើតាមសេចក្តីថ្លែងការណ៍របស់ស្ថាប័នសង្កេតភពផែនដីអឺរ៉ុបCopernicus ចេញផ្សាយនៅថ្ងៃពុធទី ៧មិថុនា២០២៣។
ចុះផ្សាយនៅថ្ងៃ៖
ស្តាប់ - ០២:១១
សីតុណ្ហភាពមធ្យមនៃផ្ទៃទឹកសមុទ្ទទាំងអស់ លើកលែងតែសមុទ្ទទឹកកកនៅតំបន់ប៉ូល ប្រចាំខែឧសភា២០២៣ គឺ ១៩,៧អង្សា។ មានន័យថា កម្តៅទឹកសមុទ្ទបានឡើងលើស មធ្យមភាគ នៃសីតុណ្ហភាពពីឆ្នាំ១៩៩១-២០២០ ចំនួន០,២៦អង្សា។
ស្ថាប័នអឺរ៉ុប Copernicus អាចចេញសេចក្តីសន្និដ្ឋាននេះបានដោយផ្អែកលើការវិភាគរបស់កុំព្យូទ័រដែលមានផ្ទុកទិន្នន័យវាស់កម្តៅរាប់ពាន់លាន បានមកពីប្រព័ន្ធផ្កាយរណប មកពីនាវា យន្តហោះ ឬស្ថានីយ៍ឧតុនិយមនៅទូទាំងពិភពលោក។ ទិន្នន័យរបស់Copernicus ខ្លះមានអាយុកាលតាំងពីឆ្នាំ១៩៥០ តែភាគច្រើនចាប់ពីឆ្នាំ១៩៧៩មក។
មហាសមុទ្ទជាអេប៉ុងស្រូបកម្តៅបញ្ចេញដោយមនុស្សចំនួនប្រមាណ៩០% តែការឡើងសីតុណ្ហភាពផ្ទៃទឹកមហាសមុទ្ទ ជាមូលហេតុនាំឱ្យមានគ្រោះមហន្តរាយគ្មានប្រៀប ជាបន្តបន្ទាប់គ្នា ដូចជាការរលាយផ្ទាំងទឹកកក ការឡើងកម្ពស់ទឹកសមុទ្ទ មានរលកកម្តៅនៅមហាសមុទ្ទ និងមានអាស៊ីដកម្មទឹកសមុទ្ទ (ទឹកសមុទ្ទឡើងជូរ) ដែលនឹងធ្វើឱ្យសមត្ថភាពស្រូបឧស្ម័នកាបូនិក របស់ផ្ទៃមហាសមុទ្ទធ្លាក់ចុះ។ បច្ចុប្បន្ននេះ មហាសមុទ្ទស្រូប២៥%នៃឧស្ម័នពុលកាបូនិកក្នុងបរិយាកាស។
ក្នុងខណៈដែលឧសភា ២០២៣ ក៏ជាខែមានសីតុណ្ហភាពក្តៅខ្លាំងជាងគេបំផុតទីពីរ សម្រាប់ភពផែនដីទាំងមូល មានសញ្ញានៃការលេចបាតុភូតធម្មជាតិអែលនីញ៉ូ ក្នុងតំបន់អេក្វាទ័រប៉ាស៊ីហ្វិកទៀត។ បាតុភូតអែលនីញ៉ូ តែងនាំឱ្យមានគ្រោះរាំងស្ងួតធ្ងន់ធ្ងរនៅផ្នែកខ្លះនៃផែនដី និងភ្លៀងច្រើនជ្រុលនៅមួយប៉ែកទៀត ព្រមទាំងការឡើងកម្តៅសីតុណ្ហភាពខ្លាំង។ បាតុភូតអែលនីញ៉ូចុងក្រោយគេបានកើតនៅឆ្នាំ២០១៨-១៩។ កាលពីដើមខែឧសភា អង្គការឧតុនិយមពិភពលោកព្យាករថាបាតុភូតអែលនីញ៉ូនឹងអាចលេចឡើង ក្នុងកំរិតប្រូបាប៊ីលីតេ៦០% នៅមុនខែកក្កដា និងឡើងដល់៩០% នៅចន្លោះពីពេលនេះដល់ចុងខែកញ្ញា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ