បារាំង-អារ៉ាប៊ីសាអូឌីត៖ជំនួបរវាងលោកម៉ាក្រុង និងរាជទាយាទបេន សាលម៉ានរងការរិះគន់ពីក្រុមអង្គការសិទ្ធិមនុស្ស
នៅក្នុងប្រទេសបារាំង ប្រធានាធិបតីលោកម៉ាក្រុងបានទទួលជួបរាជទាយាទអារ៉ាប៊ីសាអូឌីតបេន សាលម៉ាននៅវិមានអេលីហ្សេនាថ្ងៃសុក្រ ទី១៦ មិថុនា។ ជំនួបនេះបានធ្វើឡើងតាមរយៈការទទួលទានអាហារថ្ងៃត្រង់ទល់មុខគ្នា និងបានជជែកគ្នាលើសំណុំរឿងអន្តរជាតិធំៗ រួមទាំងសំណុំរឿងនៅតំបន់មជ្ឈិមបូព៌ា។ នេះជាលើកទី២ ដែលរាជទាយាទអារ៉ាប៊ីសាអូឌីតអង្គនេះបានបំពេញទស្សនកិច្ចក្នុងប្រទេសបារាំង។ តែក៏ដូចជានៅក្នុងទស្សនកិច្ចលើកទី១ កាលពីខែកក្កដា ឆ្នាំ ២០២២ ទស្សនកិច្ចលើកទី២ នេះក៏បានទទួលរងការរិះគន់ពីក្រុមអង្គការសិទ្ធិមនុស្សដែរ។
ចុះផ្សាយនៅថ្ងៃ៖
ស្តាប់ - ០២:៣០
លោកម៉ាក្រុង និងព្រះអង្គម្ចាស់បេន សាលម៉ានមិនបានធ្វើអត្ថាធិប្បាយអ្វីទាំងអស់។ តែវិមានអេលីហ្សេបានប្រាប់ឲ្យដឹងនៅមុនទទួលទានអាហារថ្ងៃត្រង់មួយទល់មួយថា ជំនួបម៉ាក្រុង បេន សាលម៉ានមានកម្មវត្ថុផ្តល់ទស្សនវិស័យទ្វេភាគី និងសិក្សាពីសំណុំរឿងធំៗសព្វថ្ងៃ មិនថានៅតំបន់មជ្ឈិមបូព៌ា ឬសង្រ្គាមអ៊ុយក្រែនទេ។ នៅក្នុងសង្រ្គាមរុស្ស៊ីឈ្លានពានអ៊ុយក្រែននេះ ប្រមុខរដ្ឋបារាំងកំពុងព្យាយាមជំនះបណ្តាប្រទេសដែលកំពុងមានសេដ្ឋកិច្ចរីកលូតលាស់ឲ្យថ្កោលទោសរុស្ស៊ី។ តាមវិមានអេលីហ្សេ លោកម៉ាក្រុងប្រាប់ព្រះអង្គម្ចាស់បេន សាលម៉ានថា បញ្ហាអ៊ុយក្រែនជារឿងសំខាន់នៅក្នុងលោក និងចង់ដឹងថា តើអារ៉ាប៊ីសាអូឌីតអាចប្រើឥទ្ធិពលរបស់ខ្លួនយ៉ាងម៉េចទៅលើសង្រ្គាមអ៊ុយក្រែន។
ក្រៅពីរឿងសង្រ្គាមអ៊ុយក្រែន នៅមានរឿងសំខាន់ៗមួយចំនួននៅក្នុងតំបន់ដូចយ៉ាងវិបត្តិនៅលីបង់ ឬនៅស៊ីរី។ អារ៉ាប៊ីសាអូឌីតក៏ដូចជាអ៊ីរ៉ង់រក្សា និងមានឥទ្ធិពលខ្លាំងលើលីបង់។ ត្រង់ចំណុចនេះ បារាំងចង់ឲ្យអារ៉ាប៊ីសាអូឌីតនិយាយជាមួយអ៊ីរ៉ង់ និងប្រទេសផ្សេងដើម្បីបង្កើតឲ្យមានលក្ខខណ្ឌអំណោយផលមួយដើម្បីរៀបចំបោះឆ្នោតជ្រើសរើសប្រធានាធិបតីលីបង់។ ទន្ទឹមគ្នានេះ អារ៉ាប៊ីសាអូឌីតរួមទាំងប្រទេសផ្សេងក្នុងតំបន់ឈូងសមុទ្រពែក្សអាចជួយគាំទ្រផ្នែកហិរញ្ញវត្ថុដល់លីបង់ដែលកំពុងជួបវិបត្តិសេដ្ឋកិច្ចធ្ងន់ធ្ងរមិនធ្លាប់មាន។ ប្រធានរឿងក្តៅមួយទៀតដែលលោកម៉ាក្រុងចង់បានការយល់ឃើញពីព្រះអង្គម្ចាស់បេន សាលម៉ាន គឺប្រពលភាពនៃការគំរាមកំហែងរបស់អ៊ីរ៉ង់ និងចង់ដឹងពីរបៀបដែលព្រះអង្គម្ចាស់បេន សាលម៉ានត្រូវឆ្លើយតបវិញ។
យ៉ាងណាក៏ដោយ ការដែលលោកម៉ាក្រុងទទួលព្រះអង្គម្ចាស់បេន សាលម៉ានលើកទី២ នេះក៏បានរងការរិះគន់ពីក្រុមអង្គការសិទ្ធិមនុស្សដូចការទទួលលើកទី១ ដែរ។ នេះក៏ដោយសារថា ព្រះអង្គម្ចាស់បេន សាលម៉ានត្រូវបានក្រសួងស៊ើបការណ៍អាមេរិកទម្លាក់ការទទួលខុសត្រូវលើឃាតកម្មសម្លាប់អ្នកកាសែតអារ៉ាប៊ីសាអូឌីតលោក Jamal Khashoggi នៅស្ថានកុងស៊ុលអារ៉ាប៊ីសាអូឌីតក្នុងទីក្រុងអ៊ីស្តង់ប៊ុល ប្រទេសតួកគីកាលពីឆ្នាំ ២០១៨។ បន្ទាប់មកថ្មីៗនេះ គឺការកាត់ទោសប្រហារជិវិតយុវជនអារ៉ាប៊ីសាអូឌីតចំនួន ៧នាក់ក្រោមលេសបទឧក្រិដ្ឋកម្មដែលយុវជនទាំង ៧នាក់បានប្រព្រឹត្តនៅពេលដែលពួកគេជាក្មេងជំទង់មិនទាន់ពេញវ័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ