បារាំងរងការរិះគន់ ថាលើកតម្កើងរាជបុត្រស្នងរាជអារ៉ាប៊ីសាអូឌីត
ចុះផ្សាយនៅថ្ងៃ៖
ស្តាប់ - ០៦:១៤
ជាប់ឈ្មោះថាជាមេដឹកនាំផ្តាច់ការ មិនគួររាប់អាន ព្រោះមានពាក់ព័ន្ធនឹងឃាតកម្មសម្លាប់អ្នកកាសែត ចាម៉ាល់ កាស៊ូហ្ស៊ី កាលពីជិតបួនឆ្នាំមុន រាជបុត្រស្នងរាជអារ៉ាប៊ីសាអូឌីត ម៉ូហាមេដ បេន សាលម៉ាន ឬហៅកាត់ថា MBS បានមកបំពេញទស្សនកិច្ចនៅអឺរ៉ុប ជាលើកទីមួយ គិតចាប់តាំងពីឆ្នាំ២០១៨មក។ បន្ទាប់ពីប្រទេសក្រិក រាជទាយាទអារ៉ាប៊ីសាអូឌីត បានមកដល់ក្រុងប៉ារីស នៅថ្ងៃព្រហស្បតិ៍ទី ២៨កក្កដា និងត្រូវបានប្រធានាធិបតីបារាំង លោក អេម៉ាណុយអែល ម៉ាក្រុង រៀបចំអាហារពេលល្ងាចទទួល នៅវិមានអេលីហ្សេទៀត។ ប៉ុន្តែ ការស្វាគមន៍នេះ បានរងការរិះគន់ស្ទើរពីគ្រប់មជ្ឈដ្ឋាន ពិសេសពីក្រុមអ្នកការពារសិទ្ធិមនុស្ស។
សម្រាប់អង្គការក្រៅរដ្ឋាភិបាល អ្នកការពារសិទ្ធិមនុស្ស និងបក្សប្រឆាំងបារាំង ការទទួលស្វាគមន៍ព្រះអង្គម្ចាស់ ម៉ូហាមេដ បេន សាលម៉ាន រាជបុត្រស្នងរាជរបស់អារ៉ាប៊ីសាអូឌីត ដែលដោយជាក់ស្តែង ជាមេដឹកនាំរាជាណាចក្រ នៅពេលនេះ ជាការលើកតម្កើង ផ្តល់កត្តិយសដល់រាជបុត្ររូបនេះ ឱ្យត្រលប់មកឡើងឆាកអន្តរជាតិ យ៉ាងពេញមុខមានមាត់ឡើងវិញ។ ខុសពីអ្វីដែលមេដឹកនាំបស្ចិមលោកធ្លាប់បានអះអាង កាលពីប៉ុន្មានឆ្នាំមុន។
បើតាមចារកិច្ចអាមេរិក រាជបុត្រស្នងរាជអារ៉ាប៊ីសាអូឌីត ម៉ូហាមេដ បេនសាលម៉ាន ឬហៅខ្លីថា MBS ជាអ្នកនៅក្រោយឃាតកម្មសម្លាប់អ្នកកាសែតប្រឆាំងជាតិអារ៉ាប៊ីសាអូឌីត ចាម៉ាល់ កាស៊ូហ្ស៊ី នៅក្នុងស្ថានកុងស៊ុលប្រទេសនេះប្រចាំទីក្រុងអ៊ីស្តង់ប៊ូលរបស់តួកគី កាលពីឆ្នាំ២០១៨។ នៅពេលនោះ មេដឹកនាំប្រទេសលោកខាងលិច បានចាត់ទុករាជបុត្ររូបនេះ ថាជាមេដឹកនាំដែលមិនគួររាប់រក។ ស្រាប់តែឥលូវ គ្រប់គ្នាត្រលប់មកទទួលស្វាគមន៍រាជបុត្រអង្គនេះទៅវិញ ៖ កាលពីពីរសប្តាហ៍មុន ប្រធានាធិបតីអាមេរិកចូបៃដិន ទៅជួបរាជទាយាទMBS ដល់ផ្ទះក្នុងបំណងលួងលោមឱ្យក្រុងរីយ៉ាដបូមប្រេងបន្ថែមក្រែងអាចបញ្ចុះតម្លៃនៅលើទីផ្សារបានខ្លះ។ ហើយបន្ទាប់ពីបានទៅជួបដល់ផ្ទះដែរកាលពីខែធ្នូ២០២១ នៅថ្ងៃព្រហស្បតិ៍ទី ២៨កក្កដានេះ លោក ម៉ាក្រុង បើកទ្វារផ្ទះលាកម្រាលព្រំទទួលនៅវិមានប្រធានាធិបតីអេលីហ្សេតែម្តង។ មិនមែនជាការទទួលធំដុំដូចទទួលប្រធានាធិបតីអេមីរ៉ាតអារ៉ាប់រួម កាលពីសប្តាហ៍មុនមែន ប៉ុន្តែគ្រប់គ្រាន់នឹងបញ្ជាក់ថា រាជបុត្រនេះអាចធ្វើដំណើរទៅទីណាក៏មានអ្នកស្វាគមន៍។
បណ្តឹងនៅតុលាការក្រុងប៉ារីស
ក្រៅអំពីសម្រែករិះគន់ អង្គការក្រៅរដ្ឋាភិបាលបរទេសពីរ បានដាក់ពាក្យបណ្តឹងប្រឆាំងនឹងរាជបុត្រMBS ក្នុងសំណុំរឿងឃាតកម្មសម្លាប់អ្នកកាសែតកាស៊ូហ្ស៊ី នៅតុលាការក្រុងប៉ារីស នៅថ្ងៃ២៨កក្កដា២០២២ ពីបទផ្សំគំនិតធ្វើទារុណកម្មនិងបំបាត់ខ្លួនដោយបង្ខំ។ ប៉ុន្តែវិមានប្រធានាធិបតីបារាំង យល់ថាឥស្សរជនបរទេសមកបំពេញទស្សនកិច្ចផ្លូវការ នៅប៉ារីស មានអភ័យឯកសិទ្ធិព្រហ្មទណ្ឌ។
ហើយឆ្លើយតបទៅនឹងពាក្យរិះគន់ លោកស្រីនាយករដ្ឋមន្ត្រី អេលីហ្សាប៊ែត ប៊ន បានបកស្រាយពន្យល់ថា ទស្សនកិច្ចរបស់រាជបុត្រស្នងរាជអារ៉ាប៊ីសាអូឌីតMBS មិនប៉ះពាល់ដល់គោលការណ៍សិទ្ធិមនុស្សដែលបារាំងគោរពទេ។ នៅក្នុងពិធីទទួលទានអាហារការងារល្ងាចមិញ ប្រធានាធិបតីបារាំងបានឱកាសលើកយកបញ្ហាជាច្រើនមកពិភាក្សាជាមួយរាជបុត្រ មានជាអាទិ៍បញ្ហាសិទ្ធិមនុស្ស ថាមពល និងផលិតកម្មប្រេង។
ចំណុចខ្លាំងរបស់រាជបុត្រអារ៉ាប៊ីសាអូឌីត
សង្គ្រាមអ៊ុយក្រែន បានធ្វើឱ្យតម្លៃប្រេងឡើងថ្លៃខ្លាំង ដែលរុញច្រានឱ្យមានវិបត្តិអតិផរណាទៀត។ សម្រាប់ក្រសែភ្នែកបស្ចិមលោក រីយ៉ាដ ជាតួអង្គដ៏កម្រនិងដ៏សំខាន់មួយ នៅលើទីផ្សារ ដោយអាចបង្កើនផលិតកម្មប្រេងរបស់គេ ដើម្បីសម្រួលស្ថិរភាពតម្លៃប្រេងបាន។ ដូច្នេះ ម៉ូហាមេដ បេន សាលម៉ាន ដែលរាជទាយាទរបស់រាជាណាចក្រប្រេង ត្រូវតែក្លាយជាដៃគូសន្ទនា ដែលសក្តិសម ឬដែលសឹងថាមិនអាចខ្វះបានផង សម្រាប់មេដឹកនាំលោកខាងលិច។ អារ៉ាប៊ីសាអូឌីត ជាប្រទេសអ្នកផលិតប្រេងនិងអណ្តូងប្រេងដ៏មហាសាលជាងគេបំផុតមួយ។ នេះហើយជាចំណុចខ្លាំងដ៏ចម្បងរបស់MBS លើឆាកអន្តរជាតិ។
ក្រៅអំពីទម្ងន់របស់អារ៉ាប៊ីសាអូឌីត នៅក្នុងតំបន់ ដែលលោកម៉ាក្រុងយល់ថា បើផាត់ រាជបុត្រMBSទៅនឹងធ្វើឱ្យខាតប្រយោជន៍ នៅមានកត្តាជាច្រើនផ្សេងដែលជំរុញឱ្យលោក ម៉ាក្រុង ត្រូវផ្តល់កត្តិយសស្វាគមន៍រាជទាយាទ អារ៉ាប៊ីសាអូឌីតនាពេលនេះ។ ប្រឈមនឹងរុស្ស៊ីដែលបង្កសង្គ្រាមនៅអ៊ុយក្រែន បារាំងចាំបាច់ត្រូវងាកទៅរកក្រុមប្រទេសណាដែលបដិសេធមិនកាន់ជើងភាគីជម្លោះ ដូចយ៉ាងអាហ្វ្រិកនិងក្រុមប្រទេសប្រេងនៅឈូងសមុទ្ទពែក្យ ដើម្បីកុំឱ្យប្រទេសអស់នេះ ឃ្លាតកាន់តែឆ្ងាយពីខ្លួន។ ក្នុងសំណុំរឿងសន្តិសុខតំបន់ នុយក្លេអ៊ែរអ៊ីរ៉ង់ បារាំងចង់រកភាពស្រុះស្រួលឱ្យអ៊ីរ៉ង់វិលត្រលប់មកគោរពកិច្ចព្រមព្រៀងនុយក្លេអ៊ែរឆ្នាំ ២០១៥វិញ ដើម្បីបញ្ចៀសវិបត្តិនុយក្លេអ៊ែរដ៏គ្រោះថ្នាក់។ បើតាមអ្នកវិភាគ អារ៉ាប៊ីសាអូឌីត ក៏ព្រួយបារម្ភខ្លាំង នឹងបញ្ហានុយក្លេអ៊ែរអ៊ីរ៉ង់ដែរ ដូច្នេះអារ៉ាប៊ីសាអូឌីត ទំនងត្រូវការធានាការពារប្រយោជន៍ពីបារាំង។ ឯបារាំងក៏ត្រូវការកិច្ចសហប្រតិបត្តិការជាមួយអារ៉ាប៊ីសាអូឌីតដែលសម្បូរលុយ សម្រាប់មកទ្រទ្រង់ក្រុមហ៊ុនសហគ្រាសបារាំង ក្នុងបរិបទដែលពិភពលោកកំពុងប្រឈមនឹងវិបត្តិសេដ្ឋកិច្ចដើរថយក្រោយ។
ម្យ៉ាងទៀត កាលពីពីរសប្តាហ៍មុន លោកបៃដិន ប្រធានាធិបតីអាមេរិក បានធ្វើដំណើរទស្សនកិច្ចមួយជុំនៅតំបន់ដើមបូព៌ា មានអ៊ីស្រាអែល ប៉ាឡេស្ទីន និងអារ៉ាប៊ីសាអូឌីត តែលោកត្រលប់មកវិញដៃទទេ។ ដូច្នេះដល់ពេលដែលប្រធានាធិបតី បារាំងត្រូវបញ្ចេញស្នាដៃម្តង និងបង្ហាញថាលោកសកម្មក្នុងសំណុំរឿងអន្តរជាតិ។
ជំនួប ម៉ាក្រុង-MBS បានលទ្ធផលយ៉ាងណា ?
បើតាមសេចក្តីថ្លែងការណ៍របស់វិមានប្រធានាធិបតី ប្រមុខដឹកនាំទាំងពីរ បានបង្ហាញចេតនាបង្កើនកិច្ចសហប្រតិបត្តិការ ដើម្បីបន្ធូរបន្ថយផលរំខាននៃសង្គ្រាមអ៊ុយក្រែន មកលើតំបន់អឺរ៉ុប តំបន់ដើមបូព៌ា និងលើពិភពលោក។ ហើយនៅក្នុងសារថ្លែងអំណរគុណរបស់រាជទាយាទអារ៉ាប៊ីសាអូឌីតជូនលោកប្រធានាធិបតីម៉ាក្រុង ព្រះអង្គម្ចាស់MBS បានបញ្ជាក់ពីឆន្ទៈរួមនៃការពង្រឹងភាពជាដៃគូយុទ្ធសាស្ត្ររវាងបារាំងនិងអារ៉ាប៊ីសាអូឌីត ក្នុងគ្រប់វិស័យ ហើយបន្តកិច្ចសហប្រតិបត្តិការ និងការពិគ្រោះយោបល់គ្នាលើគ្រប់បញ្ហាដើម្បីប្រយោជន៍រួម ព្រមទាំងពង្រឹងសន្តិសុខនិងស្ថិរភាពតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ