លោកម៉ាក្រុងទៅអារ៉ាប៊ីសាអូឌីតដើម្បីពិភាក្សាពីស្ថិរភាពក្នុងតំបន់
នៅថ្ងៃសៅរ៍ ទី៤ ធ្នូ លោកប្រធានាធិបតីបារាំងម៉ាក្រុងបានទៅដល់អារ៉ាប៊ីសាអូឌីត ដើម្បីពិភាក្សាជាមួយព្រះរាជបុត្របេនសាលម៉ានអំពីស្ថិរភាពក្នុងតំបន់ ជាពិសេសបញ្ហាទាក់ទងនឹងប្រទេសលីបង់ដែលកំពុងរងគ្រោះពីវិបត្តិជាច្រើន។ ជាការគួរឲ្យកត់សម្គាល់ ទស្សនកិច្ចការទូតនេះធ្វើឡើង ក្រោយលោកប្រមុខរដ្ឋបារាំងគូសបញ្ជាក់ថាលោកមិនបានព្រងើយកន្តើយឡើយចំពោះកំណត់ត្រាសិទ្ធិមនុស្សរបស់ទីក្រុងរីយ៉ាដ។
ចុះផ្សាយនៅថ្ងៃ៖
ស្តាប់ - ០២:០៧
លោកប្រមុខរដ្ឋបារាំងម៉ាក្រុងបានទៅទីក្រុងជេតដា (Jeddah) របស់អារ៉ាប៊ីសាអូឌីត បន្ទាប់ពីបញ្ចប់ទស្សនកិច្ចនៅអារ៉ាប់រួម និងកាតាដែលជាផ្នែកមួយនៃដំណើរទស្សនកិច្ចរយៈពេលខ្លីរបស់លោកនៅតំបន់ឈូងសមុទ្រពែក្ស។
ព្រះរាជបុត្រស្នងរាជ្យអារ៉ាប៊ីសាអូឌីតម៉ូហាមេដ បេនសាលម៉ាន បានចាប់ដៃទទួលស្វាគមន៍លោកម៉ាក្រុងនៅព្រះបរមរាជវាំងមុនចាប់ផ្តើមកិច្ចពិភាក្សានិងទទួលទានអាហារថ្ងៃត្រង់ជាមួយគ្នា។
លោកម៉ាក្រុងបានក្លាយជាមេដឹកនាំលោកខាងលិចដំបូងគេដែលជួបជាមួយព្រះអង្គម្ចាស់ បេនសាលម៉ាននៅក្នុងប្រទេសមហាសេដ្ឋីប្រេងចាប់តាំងពីអ្នកកាសែតអារ៉ាប៊ីសាអូឌីតលោកខាស្ហូហ្ស៊ីត្រូវបានសម្លាប់នៅក្នុងស្ថានកុងស៊ុលអារ៉ាប៊ីសាអូឌីតឯទីក្រុងអ៊ីស្តង់ប៊ុល កាលពីខែតុលា ឆ្នាំ ២០១៨។ ករណីសម្លាប់អ្នកកាសែតខាស្ហូហ្ស៊ីដោយភ្នាក់ងារអារ៉ាប៊ីសាអូឌីតនេះបានធ្វើឲ្យព្រះអង្គម្ចាស់បេនសាលម៉ានខូចមុខមាត់យ៉ាងខ្លាំងនៅលើឆាកអន្តរជាតិ។
ប្រធានាធិបតីបារាំងលោកម៉ាក្រុងបាននិយាយកាលពីថ្ងៃសុក្រ ទី៣ ធ្នូថា ការសន្ទនាជាមួយអារ៉ាប៊ីអាអូឌីតគឺចាំបាច់ដើម្បីស្ថិរភាពនៅក្នុងតំបន់។ យ៉ាងណាក៏ដោយ លោកម៉ាក្រុងថាលោកមិនដែលព្រងើយកន្តើយឡើយចំពោះកំណត់ត្រាសិទ្ធិមនុស្សរបស់ទីក្រុងរីយ៉ាដ។
ក្នុងអំឡុងពេលពិភាក្សាជាមួយព្រះរាជបុត្រស្នងរាជ្យអារ៉ាប៊ីសាអូឌីត គេរំពឹងថា លោកប្រធានាធិបតីបារាំងក៏ជជែកផងដែរពីប្រទេសលីបង់ដែលកំពុងរុំព័ទ្ធដោយវិបត្តិ ជាពិសេស សេដ្ឋកិច្ចលីបង់ដែលកាន់តែធ្លាក់ផុងចូលក្នុងវិបត្តិថែមមួយកម្រិតទៀត ក្រោយផ្ទុះជម្លោះការទូតដ៏ក្តៅគគុកជាមួយរដ្ឋឈូងសមុទ្រពែក្សមួយចំនួនក្នុងខែតុលា។ ដោយខឹងសម្បាចំពោះការអត្ថាធិប្បាយរបស់រដ្ឋមន្ត្រីក្រសួងព័ត៌មានលីបង់ថាសង្រ្គាមនៅយេម៉ែនគឺជាការឈ្លានពានរបស់ខ្លួន អារ៉ាប៊ីសាអូឌីតបានហាមឃាត់រាល់ការនាំចូលទំនិញពីលីបង់។
គេរំពឹងដែរថា លោកម៉ាក្រុងអាចរំងាប់កំហឹងរបស់អារ៉ាបីសាអូឌីតក្រោមហេតុផលនៃការលាលែងចេញពីតំណែងរបស់រដ្ឋមន្ត្រីព័ត៌មានលីបង់លោក កកដាអ៊ី (Kordahi)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ