ឡុងដ៍បើកសន្និសីទអន្តរជាតិស្វែងរកជំនួយដើម្បីស្ថាបនាប្រទេសអ៊ុយក្រែនឡើងវិញ
ស្តារហេដ្ឋារចនាសម្ព័ន្ធ ដោះមីន លើកស្ទួយសេដ្ឋកិច្ចឡើងវិញ ផ្តល់ហិរញ្ញវត្ថុដល់សេវាសាធារណៈ ... ទាំងនេះជាកម្មវត្ថុនៃសន្និសីទអន្តរជាតិ ដែលកំពុងរៀបចំធ្វើនៅទីក្រុងឡុងដ៍ នាថ្ងៃពុធនិងព្រហស្បតិ៍ទី ២១-២២មិថុនានេះ។ បានការចូលរួមពីក្រុមមេដឹកនាំនិងតំណាងមកពីប្រមាណជាង៦០ប្រទេស ព្រមទាំងអង្គការក្រៅរដ្ឋាភិបាល មេដឹកនាំក្រុមហ៊ុនសហគ្រាសនានា សន្និសីទអន្តរជាតិដើម្បីស្ថាបនាអ៊ុយក្រែនឡើងវិញ លើកទីពីរនេះ សង្ឃឹមថានឹងអាចប្រមូលផ្តុំរដ្ឋ ស្ថាប័ន និងក្រុមហ៊ុនឯកជននៅលើពិភពលោកឱ្យជួយស្តារអ៊ុយក្រែនពីសង្គ្រាម។
ចុះផ្សាយនៅថ្ងៃ៖
ស្តាប់ - ០២:១៣
ប្រធានាធិបតីអ៊ុយក្រែន បានចូលរួមក្នុងសន្និសីទអន្តរជាតិនេះ តាមប្រព័ន្ធវីដេអូ។ ចំណែកលោកនាយករដ្ឋមន្ត្រីអង់គ្លេសលោក រីស៊ី ស៊ូណាក់ ដែលជាម្ចាស់ផ្ទះរៀបចំសន្និសីទ បាន បញ្ជាក់អំពីជំហរគាំទ្រឥតងាករេរបស់ក្រុមបស្ចិមលោកចំពោះអ៊ុយក្រែន រហូតទាល់តែបានឈ្នះសង្គ្រាម ហើយជួយស្ថាបនាប្រទេសឡើងវិញឱ្យបានសក្តិសមបំផុត។ ប៉ុន្តែចំណោទបច្ចុប្បន្ន តើគេអាចគាំទ្រដំណើរបែបបទជំនួយ តាមវិធីណា ដល់អ៊ុយក្រែន។ នេះជាការពន្យល់របស់លោកនាយករដ្ឋមន្ត្រីអង់គ្លេសដដែល។
កាលពីខែធ្នូ ប្រមុខរដ្ឋាភិបាលអាល្លឺម៉ង់ បានប្រៀបផែនការជួយអ៊ុយក្រែន ទៅនឹងផែនការអាមេរិកជួយអឺរ៉ុបក្រោយសង្គ្រាមលោកលើកទីពីរ។ ប្រទេសជាច្រើន ដូចយ៉ាងបារាំង និងស្ថាប័នខ្លះ បានប្រកាសឆន្ទៈទម្លាយកញ្ចប់ថវិកា សម្រាប់ផ្តល់ជំនួយដល់អ៊ុយក្រែនក្នុងសាងសង់ហេដ្ឋារចនាសម្ព័ន្ធស៊ីវិលឡើងវិញ។ អង់គ្លេស បំរុងប្រាក់កម្ចីពីធនាគារពិភពលោកចំនួន ៣ពាន់លានដុល្លារសម្រាប់ជួយសេវាសាធារណៈអ៊ុយក្រែនសម្រាប់រយៈពេលបីឆ្នាំ និងបន្ថែមដោយជំនួយទ្វេភាគី ២៤០លាន សម្រាប់ជួយដោះមីន និងមនុស្សធម៌។
សហគមន៍អន្តរជាតិកំពុងពិចារណាផងដែរ រកមធ្យោបាយស្របច្បាប់ទម្លាយមូលនិធិនិងលុយរុស្ស៊ីរាប់សិបពាន់លានដុល្លារដែលជាប់បង្កកទណ្ឌកម្ម យកមកស្ថាបនាប្រទេសអ៊ុយក្រែនឡើងវិញ។
ធនាគារពិភពលោកសន្យាផ្តល់២០០លានដុល្លារសម្រាប់ស្តារបណ្តាញអគ្គីសនី។ ធនាគារអឺរ៉ុប ដើម្បីស្ថាបនានិងអភិវឌ្ឍ ដែលធ្លាប់ប្រកាសផ្តល់ថវិកា២ពាន់លានអឺរ៉ូសម្រាប់ឆ្នាំ២០២២និង២០២៣ដល់អ៊ុយក្រែន នឹងប្រកាសនៅចំពោះអង្គសន្និសីទអន្តរជាតិលើកទីពីរនេះ នូវ ជំនួយពីរកញ្ចប់ទៀត គឺសម្រាប់ជួយក្រុមហ៊ុនកសិចំណីអាហារ និងបង្កើតមូលនិធិសម្រាប់ក្រុមហ៊ុនខ្នាតតូចនិងមធ្យម ព្រមទាំងពិធីសារព្រមព្រៀងបីក្នុងវិស័យថាមពល។
សេចក្តីការបន្ទាន់របស់អ៊ុយក្រែនភ្លាមនេះ បើតាមធនាគារពិភពលោក មានទំហំ១៤ពាន់លានដុល្លារ តែការស្ថាបនាប្រទេសស្តារសេដ្ឋកិច្ចជាទូទៅ ត្រូវការថវិកាដល់ទៅ ៤១១ពាន់លានដុល្លារឯណោះ។ នេះបើតាមការសិក្សាថ្មីចុងក្រោយរបស់ធនាគារពិភពលោក អង្គការសហប្រជាជាតិ សហភាពអឺរ៉ុប និងរដ្ឋាភិបាលអ៊ុយក្រែន។ ចំណាយនឹងរីកឡើងកាន់តែធំទៀត បើសង្គ្រាមនៅតែបន្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ