អាកាសធាតុ៖ ត្រូវបន្ថែមការវិនិយោគលើថាមពលស្អាតស្អំ មួយគុណនឹង៧ដង នៅតាមប្រទេសកំពុងអភិវឌ្ឍន៍
សំណុំរឿងថវិកាវិនិយោគ ដើម្បីដោះស្រាយវិបត្តិអាកាសធាតុ គឺជាចំណុចសំខាន់បំផុត សម្រាប់ប្រទេសក្រី និងប្រទេសកំពុងអភិវឌ្ឍន៍។ យោងតាមរបាយការណ៍ចុងក្រោយ របស់ទីភ្នាក់ងារថាមពលអន្តរជាតិ គឺវិស័យថាមពលស្អាតស្អំ ដែលមិនបញ្ចេញឧស្ម័នកាបូនិក គេត្រូវតែបន្ថែមទំហំថវិកាវិនិយោគ រហូតដល់៧ដង ចាប់ពីឆ្នាំ២០៣០ទៅ ប្រសិនបើពិភពលោកយើង ចង់ទប់ស្កាត់ការកើនឡើងកំដៅផែនដី មិនឡើងលើសពី១,៥°c ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៥
ទីភ្នាក់ងារថាមពលអន្តរជាតិ បានអំពាវនាវថា ការវិនិយោគទាំងសាធារណៈ ទាំងឯកជន ក្នុងវិស័យថាមពលមិនមែនប្រភពហ្វូស៊ីល ពោលគឺជាថាមពលស្អាតស្អំ គឺត្រូវបង្កើនទំហំ ឲ្យបានយ៉ាងហោច៣ដង នៅតាមប្រទេសកំពុងអភិវឌ្ឍន៍។ មានន័យថា ថវិកាវិនិយោគដែលមានប្រមាណ ៧៧០ពាន់លានដុល្លារក្នុងឆ្នាំ២០២២ នឹងត្រូវដំឡើងដល់ខ្ទង់ ២២០០ ទៅ ២៨០០ពាន់លានដុល្លារ ក្នុងមួយឆ្នាំ ចាប់ពីឆ្នាំ២០៣០ទៅ។
ទំហំនេះ ត្រូវតែបន្តរក្សាដដែល រហូតដល់ឆ្នាំ២០៥០ ដើម្បីឈានទៅកាត់បន្ថយការបញ្ចេញឧស្ម័នកាបូនិក ទប់សីតុណ្ហភាពផែនដីយើង កុំឲ្យឡើងលើសពី ១,៥°C។ ហើយប្រសិនបើគេដកប្រទេសចិន ចេញពីក្នុងចំណោមប្រទេសសេដ្ឋកិច្ចលូតលាស់ គឺមានន័យថា ថវិកាវិនិយោគក្នុងវិស័យថាមពលស្អាតស្អំ គឺត្រូវតែបង្កើន មួយគុណនឹង៧ដងឯណោះ។ ពោលគឺ បង្កើន ពី២៦០ពាន់លានដុល្លារ ឡើងទៅ ខ្ទង់ ១៤០០ ទៅ ១៩០០ពាន់លានដុល្លារ។ នេះបើផ្អែកតាមការសន្និដ្ឋាន នៃរបាយការណ៍ ដែលត្រូវបានចូលរួមធ្វើ ដោយអង្គការ OCDE និង International Finance Corporation IFC ដែលជាផ្នែកមួយនៃធនាគារពិភពលោក។
សូមបញ្ជាក់ថា របាយការណ៍នេះ ត្រូវបានចេញផ្សាយមួយថ្ងៃមុនជំនួបកំពូល ស្តីពីកតិកាសញ្ញាហិរញ្ញវត្ថុថ្មី នៅទីក្រុងប៉ារីស ដែលមានកម្មវត្ថុពិភាក្សាគ្នា រៀចបំផែនការហិរញ្ញវត្ថុពិភពលោក ទប់ទល់វិបត្តិអាកាសធាតុ។ ដំណោះស្រាយដែលត្រូវតែឆ្លងកាត់ ការធ្វើអន្តរកម្មថាមពល ពីថាមពលហ្វូស៊ីល មកថាមពលកកើតឡើងវិញ ឬថាមពលស្អាតស្អំ។
ដោយអនុឡោមតាមកិច្ចព្រមព្រៀងទីក្រុងប៉ារីសស្តីពីអាកាសធាតុ ការវិនិយោគលើថាមពលស្អាតស្អំ បានកើនឡើងយ៉ាងខ្លាំង។ ក៏ប៉ុន្តែ ៩០%នៃទំហំវិនិយោគទាំងនេះ គឺមាននៅតែតាមប្រទេសសេដ្ឋកិច្ចនាំមុខ និងប្រទេសចិន ខណៈដែលប្រទេសក្រីក្រ កំពុងអភិវឌ្ឍន៍ មានត្រឹមត១០%ប៉ុណ្ណោះ។ ក្នុងចំណោមថវិកា ៧៧០ពាន់លានដុល្លារ វិនិយោគក្នុងវិស័យថាមពលស្អាតស្អំ គឺមាន៣ភាគ៤ទៅហើយ ដែលមាននៅតែក្នុងប្រទេស៣ធំៗ ចិន ឥណ្ឌា ប្រេស៊ីល។
គួរដឹងថា បច្ចុប្បន្ននេះ ប្រជាជនប្រមាណ៧៧៥លាននាក់ នៅតាមប្រទេសក្រីក្រ ប្រទេសកំពុងអភិវឌ្ឍន៍ ពុំមានចរន្តអគ្គិសនីប្រើប្រាស់ទេ កុំថាឡើយដល់ទៅថាមពលកកើតឡើងវិញ។ លោក Fatih Birol នាយកប្រតិបត្តិទីភ្នាក់ងារថាមពលអន្តរជាតិ បានលើកឡើងថា គេមិនអាចរំពឹងតែទៅលើការវិនិយោគសាធារណៈនោះទេ។ នៅតាមប្រទេសកំពុងអភិឌ្ឍន៍ ការវិនិយោគក្នុងវិស័យថាមពលស្អាតស្អំ គឺត្រូវតែមានប្រភពយ៉ាងហោចពីវិស័យឯកជន ចំនួន៦០%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ