ឆ្នាំ២០២២ បារាំងបានផ្តល់លិខិតស្នាមស្នាក់នៅក្នុងនាមជាជនភៀសខ្លួន ចំនួនជាង៥៦០០០នាក់
ក្នុងឆ្នាំ២០២២កន្លងទៅ បារាំងបានផ្តល់លិខិតស្នាមស្នាក់នៅស្របច្បាប់ ក្នុងនាមជាជនភៀសខ្លួន ទៅឲ្យមនុស្សចំនួនជាង៥ម៉ឺន៦ពាន់នាក់។ នេះបើផ្អែកតាមរបាយការណ៍ប្រចាំឆ្នាំ របស់ការិយាល័យបារាំងគាំពារជនភៀសខ្លួន ចេញផ្សាយកាលពីថ្ងៃចន្ទ ទី៣កក្កដម្សិលមិញ។ យោងតាមតួលេខនេះ ជាសរុបគឺបារាំង បានទទួលយកជនភៀសខ្លួន បានជាងកន្លះលាននាក់ហើយ។
ចុះផ្សាយនៅថ្ងៃ៖
ស្តាប់ - ០៣:១១
ឆ្នាំ២០២២ មនុស្សចំនួន៥៦២៧៦នាក់ ត្រូវបានដាក់ឲ្យស្ថិតនៅក្រោមការការពាររបស់រដ្ឋបារាំង។ មានន័យថា ពួកគេត្រូវបានប្រគល់សិទ្ធិស្របច្បាប់ ឲ្យរស់នៅលើទឹកដីបារាំង ក្នុងនាមជាជនភៀសខ្លួន។ ចំនួនតួលេខនេះ គឺដោយរាប់ទាំងការសម្រេចយល់ព្រម នៅថ្នាក់ដំបូងដោយ ការិយាល័យបារាំងគាំពារជនភៀសខ្លួន Ofpra និងទាំងអ្នកដែលបានដាក់ពាក្យប្តឹងទាស់ ហើយត្រូវតុលាការជាតិនៃសិទ្ធិជ្រកកោន សម្រេចយល់ព្រម។
គិតត្រឹមថ្ងៃទី៣១ធ្នូ ២០២២ បារាំងបានផ្តល់លិខិតស្នាមក្នុងនាមជាជនភៀសខ្លួន ចំនួនសរុប ៥៤៧១០២នាក់។ នេះបើផ្អែកតាមការិយាល័យបារាំងគាំពារជនភៀសខ្លួន។ ក្នុងរយៈពេល៥ឆ្នាំជាប់គ្នាមកនេះ គឺជនភៀសខ្លួនមកពីប្រទេសអាហ្វហ្កានីស្ថាន ដែលមានចំនួនច្រើនជាងគេ។ ក្នុងចំណោមពាក្យសុំទាំងអស់ ១៣១០០០ គឺមាន១៧០០០ជាពាក្យសុំសិទ្ធិជ្រកកោនរបស់ជនភៀសខ្លួនអាហ្វហ្កានីស្ថាន។ ទំនោរនេះបានកើនឡើងខ្លាំង ជាពិសេសក្រោយការវិលត្រលប់មកកាន់អំណាចវិញ របស់ក្រុមតាលីបង់។
ដោយឡែក តួលេខចំនួនជនភៀសខ្លួនដែលបារាំងបានទទួល ក្នុងឆ្នាំ២០២២នេះ គឺមិនបានរាប់បញ្ចូលជនភៀសខ្លួន អ៊ុយក្រែនទេ ដែលបច្ចុប្បន្នមានចំនួនប្រមាណ១សែននាក់នៅបារាំង។ ច្បាប់បារាំង បានបង្កើតលក្ខន្តិកៈពិសេស សម្រាប់ប្រជាជនអ៊ុយក្រែន ដែលរត់គេចពីសង្គ្រាមឈ្លានបានរបស់រុស្ស៊ី ដោយអនុញ្ញាតឲ្យពួកគេ អាចស្នាក់នៅដោយស្របច្បាប់លើទឹកដីបារាំង ដោយមិនចាំបាច់រៀបចំពាក្យសុំសិទ្ធិជ្រកកោន។
ដោយឡែក ក្នុងឆ្នាំ២០២២កន្លងទៅ អាជ្ញាធរបារាំងក៏បានសង្កេតឃើញផងដែរ អំពីការកើនឡើងនៃចំនួនជនភៀសខ្លួនមកពីរុស្ស៊ី។ យ៉ាងហោចណាស់ មានប្រជាជនរុស្ស៊ី២៦១៧នាក់ ដែលបានមកសុំសិទ្ធិជ្រកកោននៅបារាំង ក្នុងឆ្នាំ២០២២។ មូលហេតុដែលជនភៀសខ្លួនរុស្ស៊ីបានលើកឡើង គឺការបារម្ភពីសុវត្ថិភាពសន្តិសុខ ដោយសារពួកគេប្រឆាំងនឹងសង្គ្រាមឈ្លានពានដែលរុស្ស៊ីធ្វើទៅលើអ៊ុយក្រែន ឬបារម្ភខ្លាចក្រែងត្រូវគេកេណ្ឌឲ្យទៅច្បាំងជាដើម។
សូមបញ្ជាក់ថា អំឡុងពេលនេះ រដ្ឋាភិបាលបារាំងកំពុងតែរៀបចំធ្វើសេចក្តីព្រាងច្បាប់ថ្មីមួយ ដើម្បីកំណែទម្រង់ច្បាប់គ្រប់គ្រងជនភៀសខ្លួននិងអន្តោប្រវេសន៍។ កម្មវត្ថុរបស់រដ្ឋាភិបាល គឺកាត់បន្ថយពេលវេលារងចាំនៃការធ្វើនីតិវិធីសម្រេច ដើម្បីអាចបណ្តេញអ្នកដែលមិនបានទទួលលិខិតស្នាម ចេញពីបារាំងឲ្យបានឆាប់បំផុត។ ទន្ទឹមគ្នានេះ ការិយាល័យបារាំងគាំពារជនភៀសខ្លួន បានប្រឹងប្រែងពន្លឿនរយៈពេលនីតិវិធី ពីជាង៨ខែនៅឆ្នាំ២០២១ មកនៅត្រឹមតែ៥ខែ ជាមធ្យម ក្នុងឆ្នាំ២០២២។ ជាមួយនឹងរយៈពេលនីតិវិធីខ្លី ចំនួនអ្នកដែលបានទទួលលិខិតស្នាមស្របច្បាប់ក៏បានកើនឡើងយ៉ាងរហ័ស ក្នុងពេលដ៏ខ្លី។ តែជាមួយគ្នានេះ អាជ្ញាធរធ្វើលិខិតអត្រានុកូលដ្ឋាន មានការយឺតយ៉ាវ មិនអាចឆ្លើយតប ឲ្យទាន់ពេលវេលា។ ការិយាល័យបារាំងគាំពារជនភៀសខ្លួន បានអំពាវនាវ ឲ្យអាជ្ញាធរសាធារណៈប្រឹងប្រឹងផ្តល់លទ្ធភាពនិងមធ្យោបាយ ខណៈចំនួនជនភៀសខ្លួនកាន់តែកើនឡើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ