អ្នកជំនាញ៖អំណោយជាគ្រាប់ធញ្ញជាតិដែលលោកពូទីនឲ្យប្រទេសអាហ្រ្វិកមិនមែនជាអំណោយសប្បុរសធម៌សុទ្ធសាធទេ
នៅថ្ងៃព្រហស្បតិ៍ ទី២៧ កក្កដា ប្រទេសរុស្ស៊ីបានធ្វើជាម្ចាស់ផ្ទះរៀបចំកិច្ចប្រជុំកំពូលរុស្ស៊ី-អាហ្រ្វិកនៅក្នុងទីក្រុង Saint-Petersbourg។ មានគណៈប្រតិភូមកពី ៤៩ប្រទេសអាហ្រ្វិក ក្នុងនោះមានប្រមុខចំនួន ១៧នាក់បានចូលរួមនៅក្នុងកិច្ចប្រជុំកំពូលរុស្ស៊ី-អាហ្រ្វិកឆ្នាំ ២០២៣ នេះ។ កិច្ចប្រជុំកំពូលលើកនេះបានធ្វើឡើងនៅក្នុងបរិបទនៃសង្រ្គាមរុស្ស៊ីឈ្លានពានអ៊ុយក្រែន និងចំពេលដែលរុស្ស៊ីបានសម្រេចចិត្តមិនបន្តកិច្ចព្រមព្រៀងនាំចេញគ្រាប់ធញ្ញជាតិអ៊ុយក្រែន។ ការដែលរុស្ស៊ីមិនព្រមបន្តកិច្ចព្រមព្រៀងមួយនេះបានជះផលវិបាកដល់បណ្តាប្រទេសអាហ្រ្វិកដែលពឹងលើគ្រាប់ធុញ្ញជាតិនាំពីអ៊ុយក្រែន។ តែថ្លែងនាឱកាសបើកកិច្ចប្រជុំកំពូល ប្រធានាធិបតីរុស្ស៊ីលោកពូទីនបានសន្យាផ្តល់គ្រាប់ធញ្ញជាតិរហូតដល់ ៥០ ០០០តោនឲ្យ ៦ប្រទេសអាហ្រ្វិកដោយមិនគិតលុយ។ តើជាអំណោយដោយសប្បរសធម៌ ឬមួយជាការដោះដូរ?។ មិនមែនជាអំណោយសប្បុរសធម៌មួយទេ តែក៏មានបង្កប់ដោយថ្នូរភូមិសាស្រ្តយុទ្ធសាស្រ្តនៅក្នុងនោះដែរ នេះជាការយល់ឃើញរបស់អ្នកជំនាញលោកសេបាស្យៀង អាប៊ីស។
ចុះផ្សាយនៅថ្ងៃ៖
ស្តាប់ - ០១:៤០
« វាច្បាស់ណាស់ថា កាយវិការរបស់រុស្ស៊ីចំពោះទ្វីបអាហ្រ្វិកពេលនេះមិនមែនគ្មានប្រយោជន៍នោះទេ។ នៅពេលដែលអស់លោកបានស្នើបញ្ជូនផលិតផលចំណីអាហារទៅឲ្យប្រទេសមួយចំនួនជាមួយនឹងលក្ខខណ្ឌដែលផ្ទុយពីច្បាប់ទីផ្សារផលិតផលចំណីអាហារនោះ មានន័យថាអ្វីដែលអស់លោកបានធ្វើជាមួយប្រទេសទាំងនោះមិនមែនជាកិច្ចសហប្រតិបត្តិការទេ។ មានន័យថាអ្វីដែលអស់លោកបានធ្វើនេះប្រៀបដូចជាទង្វើម៉ាហ្វីយ៉ាមានបង្កប់ដោយថ្នូរអ៊ីចឹងដែរ ដូចជាថា ត្រូវមានសមានចិត្តជាមួយខ្ញុំ កុំរិះគន់ទិតៀនខ្ញុំនៅអង្គការសហប្រជាជាតិ កុំបោះឆ្នោតប្រឆាំងខ្ញុំទៅលើសេចក្តីសម្រេចមួយចំនួនរបស់ក្រុមប្រឹក្សាសន្តិសុខ។
ក្នុងករណីនេះ ខ្ញុំនឹងបើករ៉ូប៊ីណេឲ្យធំបញ្ជូនគ្រាប់ធញ្ញជាតិឲ្យអស់លោក ហើយខ្ញុំថែមទាំងអាចមិនគិតលុយពីអស់លោក ឬមួយក៏គិតលុយដែរ តែមិនយកភ្លាមៗទេ។ ចូរកុំភ្លេចថា កិច្ចប្រជុំកំពូលរុស្ស៊ី អាហ្រ្វិកនៅទីក្រុង Saint-Petersbourg នេះធ្វើឡើងនៅក្នុងបរិបទទូទៅដែលមានប្រទេសមួយចំនួនក្នុងលោកមិនចង់ប្រកាន់យកជំហរណាមួយស្តីពីសង្រ្គាមអ៊ុយក្រែនទេ។ខ្ញុំ ខ្ញុំមានការសោកស្តាយខ្លាំងណាស់ដែលបានឃើញរុស្ស៊ីប្រើនយោបាយពាណិជ្ជកម្មកសិកម្មដើម្បីបង្កើនឥទ្ធិពលរបស់ខ្លួន។
ចំណែកភូមិសាស្រ្តយុទ្ធសាស្រ្តរបស់បស្ចិមលោកស្តីពីកសិចំណីអាហារនៅមានភាពអល់អែកដែលអាចធ្វើឲ្យបស្ចិមលោកបាត់បង់ទីផ្សារ និងបាត់ជាមួយគ្នានូវកិច្ចសន្ទនានយោបាយ និងការទូតជាមួយបណ្តាប្រទេសអាហ្រ្វិកទាំងនោះ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ