អង្គការសហប្រជាជាតិព្រមានពីគ្រោះថ្នាក់គំរាមកំហែងបរិស្ថាន ដោយសារការបូមយកខ្សាច់សមុទ្រ
ក្រុមអ្នកវិទ្យាសាស្រ្តសម្រាប់បរិស្ថានរបស់អង្គការសហប្រជាជាតិបានព្រមានពីគ្រោះថ្នាក់គំរាមកំហែងជីវចម្រុះ និងភាពធន់របស់ឆ្នេរសមុទ្រ ដោយសារការបូម ជីកយកដីខ្សាច់សមុទ្រក្នុងទ្រង់ទ្រាយធំ។ តាមអ្នកជំនាញបរិស្ថានរបស់អង្គការសហប្រជាជាតិ ខ្សាច់ និងគ្រួសប្រមាណ ៦ពាន់លានតោនត្រូវគេបូមយកចេញពីសមុទ្រ ក្នុងរយៈពេល១ឆ្នាំៗ។ ជាបរិមាណដ៏ច្រើនសន្ធឹកសន្ធាប់ ហួសសមត្ថភាពផលិតបានរបស់ធម្មជាតិ។
ចុះផ្សាយនៅថ្ងៃ៖
ស្តាប់ - ០២:៤៧
អង្គការសហប្រជាជាតិបានទាញសញ្ញាអាសន្នស្តីពីគ្រោះថ្នាក់បំផ្លាញបរិស្ថាន និងការគំរាមកំហែងជីវិតសត្វក្នុងសមុទ្រ ដោយសារតែការធ្វើអាជីវកម្មបូមយកខ្សាច់ និងគ្រួសពីក្នុងសមុទ្រ។ តាមអ្នកជំនាញបរិស្ថានរបស់អង្គការសហប្រជាជាតិ នៅក្នុងមួយឆ្នាំៗ ដីខ្សាច់ និងគ្រួសប្រមាណ ៦ពាន់លានតោន ត្រូវគេបូមយកចេញពីសមុទ្រ។
នេះជាលើកទី១ ដែលក្រុមអ្នកជំនាញរបស់អង្គការសហប្រជាជាតិ ផ្នែកបរិស្ថានអាចវាយតម្លៃ បរិមាណដីខ្សាច់ដែលគេជីកបូមពីសមុទ្រ ដោយប្រើកម្មវិធីបញ្ញាសិប្បនិម្មិត និងប្រព័ន្ធកំណត់អត្តសញ្ញាណរបស់កប៉ាល់បូម និងដឹកជញ្ជូនដីខ្សាច់នៅក្នុងពិភពលោក។
តាមអ្នកជំនាញខាងលើ បរិមាណខ្សាច់ និងគ្រួសដែលគេបូមចេញពីសមុទ្រអាចមានច្រើនជាងនេះ ព្រោះថា មានតែកប៉ាល់ប្រមាណ ៥០%ប៉ុណ្ណោះ ដែលចុះឈ្មោះ ក្នុងប្រព័ន្ធកំណត់អត្តសញ្ញាណស្វ័យប្រវត្តិ។ ម្យ៉ាង សកម្មភាពបូមខ្សាច់ ទ្រង់ទ្រាយតូច និងរបៀបគ្រួសារ មិនត្រូវបានរាប់បញ្ចូលក្នុងការគន់គណនារបស់ក្រុមជំនាញបរិស្ថានឡើយ។
អង្គការសហប្រជាជាតិធ្លាប់វាយតម្លៃថា នៅក្នុងចំណោមដីខ្សាច់ និងគ្រួស ៥០ពាន់លានតោនដែលគេប្រើ ក្នុងមួយឆ្នាំៗ សម្រាប់សំណង់ មាន ខ្សាច់ប្រមាណ ៦ពាន់លានតោន ត្រូវគេបូមចេញពីសមុទ្រ។ សមុទ្រខាងជើង សមុទ្រនៅអាស៊ីអាគ្នេយ៍ និងឆេ្នរសមុទ្រអាមេរិកសុទ្ធសឹងជាទីតាំងបូមខ្សាច់ដ៏សស្រាក់សស្រាំខ្លាំង។ ចិន អាមេរិក ហូឡង់ និងប៊ែលហ្ស៊ិកជាប្រទេសដែលមានកប៉ាល់ធំៗ បូមខ្សាច់សមុទ្រច្រើនជាងគេ នៅក្នុងពិភពលោក។
តាមអ្នកជំនាញរបស់អង្គការសហប្រជាជាតិ ប៊ែលហ្សិកផ្ទាល់ដែលបូមយកខ្សាច់នៅ សមុទ្រខាងជើង នៅអឺរ៉ុប ដឹងថា បើសិនជានៅបន្តល្បឿនដូចសព្វថ្ងៃនេះ ប៊ែលហ្ស៊ិកអាចមានខ្សាច់បូមសម្រាប់រយៈពេលតែ៨០ឆ្នាំទៀតប៉ុណ្ណោះ បន្ទាប់ពីនោះ គឺលែងមានខ្សាច់បូមតទៅទៀត។
បន្ថែមពីលើសកម្មភាពបូមខ្សាច់របស់មនុស្ស អ្នកជំនាញព្រមានពីការបាត់បង់ខ្សាច់ធម្មជាតិ ប្រមាណ ពី ១០ ទៅ ១៦ពាន់លានតោន ដែលទឹកទន្លេហូរនាំយកទៅចាក់ចោលក្នុងមហាសមុទ្រក្នុងមួយឆ្នាំៗ។
សម្រាប់អ្នកជំនាញ របស់អង្គការសហប្រជាជាតិ សង្គមរស់នៅរបស់មនុស្សពឹងផ្អែកខ្លាំងលើខ្សាច់ ជាគ្រឿងសំណង់ សម្រាប់សង់ផ្ទះ សាលារៀន មន្ទីពេទ្យ ផ្លូវថ្នល់ កញ្ចក់ ឬស្ថានីយវារីអគ្គិសនី ប៉ុន្តែ ជាមួយគ្នានោះ ខ្សាច់ក៏ដើរតួនាទីសំខាន់ដែរសម្រាប់ជីវិត ជីវចម្រុះក្នុងសមុទ្រ និងជីវិតរស់នៅរបស់មនុស្សនៅតាមឆ្នេរសមុទ្រ ព្រោះថា ដីខ្សាច់ដើរតួជាអ្នកកាពារទប់ទល់នឹងការឡើងកំពស់ទឹកសមុទ្រ។ ដូច្នេះ ការបូមយកដីខ្សាច់ច្រើនហួសហេតុ ហួសសមត្ថភាពផលិតរបស់ធម្មជាតិ មិនត្រឹមគំរាមកំហែងបរិស្ថាន ប៉ុន្តែ វាគ្រោះថ្នាក់ ប៉ះពាល់ ដល់ជីវភាពរស់នៅ ការធ្វើអាជីវកម្ម ប្រាក់ចំណូលសេដ្ឋកិច្ចរបស់ប្រជាជនរស់នៅជាប់មាត់សមុទ្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ